ភ្នំពេញ ៖ ក្រសួងធនធានទឹកនិង ឧតុនិយម បាន អំពាវនាវឲ្យ ប្រជាពលរដ្ឋរស់នៅ ខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម និងពលរដ្ឋរស់នៅអមសង ខាងផ្លូវទឹក ព្រែក ទន្លេ និងតំបន់ទំនាបនានា ឲ្យរូសរាន់ប្រមូលផល ឲ្យបានទាន់ពេល ស្របពេល ដែលទឹក ទន្លេមេគង្គ នឹងហក់ឡើង ចូលទៅកាន់ព្រែកបឹង បួរ នៅពីថ្ងៃខាងមុខនេះហើយ។
យោងតាមសេចក្តីជូនដំណឹងរបស់ ក្រសួងធនធានទឹកនិងឧតុនិយម ចេញផ្សាយកាលពីថ្ងៃទី១៦កក្កដានេះ បានឲ្យដឹងថា បន្ទាប់ពី ធ្វើការតាមដាន និងព្យាករណ៍ លើស្ថានភាពអាកាសធាតុ និងស្ថានភាព ទឹកជំនន់ ទន្លេមេគង្គ រួចមក ក្រសួងធនធានទឹកនិង ឧតុនិយម សូមជម្រាប ជូនដំណឹងដល់ ក្រសួងស្ថាប័ន ពាក់ព័ន្ធ និងអាជ្ញាធរ ដែនដី និងបងប្អូន ប្រជាពលរដ្ឋ មេត្តា ជ្រាបថា ដោយសារឥទ្ធិពល របស់ប្រព័ន្ធ សម្ពាធទាប ដែលកើតឡើង និងកំពុង ស្ថិតនៅលើតំបន់ ផ្ទៃរងទឹកភ្លៀង របស់ ទន្លេមេគង្គ ក្នុងប្រទេសថៃ និងប្រទេសឡាវ បានធ្វើឲ្យ មានភ្លៀងធ្លាក់ជាបន្តបន្ទាប់ និងបង្កឲ្យទឹកទន្លេមេគង្គហក់ឡើង។
សេចក្តីជូនដំណឹងនោះបន្តថា ក្នុងអំឡុងពេលពី បីថ្ងៃខាងមុខ នេះទឹក ទន្លេមេគង្គ លើ ក្នុងប្រទេសកម្ពុជា នឹងហក់ឡើង ហើយចាប់ផ្តើម ហូរចូលទៅ តាមព្រែក និងតំបន់ទំនាប នានាដែលស្ថិតនៅអមសងខាងទន្លេមេគង្គលើ។ ជាមួយគ្នានេះក្រសួង អំពាវនាវឲ្យ ប្រជាពលរដ្ឋរស់នៅ ខេត្តស្ទឹងត្រែង ក្រចេះ ត្បូងឃ្មុំ និងកំពង់ចាម និងពលរដ្ឋរស់នៅអមសង ខាងផ្លូវទឹក ព្រែក ទន្លេ និងតំបន់ទំនាបនានា ឲ្យរួសរាន់ប្រមូលផល ឲ្យបានទាន់ពេល ស្របពេល ដែលទឹក ទន្លេមេគង្គ នឹងហក់ឡើង ចូលទៅកាន់ព្រែកបឹង បួរ នៅពីថ្ងៃខាងមុខនេះហើយ៕
Source: Kampuchea Thmey Daily
0 Comments