ភ្នំពេញ ៖ អាចចាត់ទុកថា នេះជាព្យុះព័ត៌មានរសើបថ្មីមួយទៀត ដែលបានវាយបោកបក់មកលើជីវិតឯកជនរបស់តារាចម្រៀងឈួន សុវណ្ណឆៃ ដែលរយៈពេលកន្លងមកនាងមានរឿងអាស្រូវមួយចំនួន ត្រូវបានមជ្ឈដ្ឋានក្នុងចង្កោមអ្នកសិល្បៈលួចទម្លាយឲ្យអ្នកកាសែតបានដឹង និងចុះផ្សាយរួចមកហើយនោះ។ ថ្មីៗនេះអ្នកនាងឈួន សុវណ្ណឆៃត្រូវបានគេនាំគ្នានិយាយថា ការបាត់វត្តមានរបស់នាងពីវិស័យសិល្បៈរយៈពេលជជាងកន្លះឆ្នាំនេះ គឺនាងបានលួចទៅសំងំសម្រាលកូន ហើយកូនដែលទើបសម្រាលនេះដែរគេមិនទាន់ដឹងច្បាស់ថា ជាកូនរបស់នាងជាមួយអតីតស្វាមីឈ្មោះប្រាក់ គន្ធីដែលបានលែងលះគ្នាជាយូរមកហើយនោះ ឬក៏ជាកូនរបស់បុរសម្នាក់ពាក់ផ្កាយពេញស្មាឬយ៉ាងណានោះទេ។
វាជារឿងគួរឲ្យសង្ស័យបំផុតសម្រាប់មហាជន នៅពេលដែលទទួលបានដឹងថា តារាចម្រៀងអ្នកនាងឈួន សុវណ្ណឆៃត្រឡប់មកកាន់សង្វៀនសិល្បៈវិញបន្ទាប់ពីសំងំសម្រាលកូនទី៣ ហើយបើតាមប្រភពព័ត៌មានពីអ្នកសិល្បៈ ដែលចូលចិត្តនិយាយដើមគេបាននាំគ្នាទំលាយថា ឈួន សុវណ្ណឆៃហាក់បីដូចជាកំពុងតែព្យាយាមវេចខ្ចប់លាក់ទុក ចំពោះរឿងអាស្រូវថ្មីរបស់នាងទាក់ទងទៅនឹងរឿងលួចទៅសំងំសម្រាលកូននេះ។
មូលហេតុដែលនាងលាក់លៀមយ៉ាងនេះគឺដោយសារតែខ្លួននាងផ្ទាល់មិនច្បាស់ថា តើកូននេះជាកូនរបស់ប្តីនាង ដែលបានលែងលះគ្នាឬយ៉ាងណា? ដូច្នេះដើម្បីកុំឲ្យមហាជនដឹងនឹងនាំគ្នានិយាយខ្ចរខ្ចាយនោះនាងមានតែបង្ខំចិត្តគេចវេះមិនសារភាពចំពោះរឿងអាស្រូវដែលគេនិយាយថា នាងបានលួចទៅសម្រាលកូននោះ។ កន្លងមកគេធ្លាប់បានឃើញតារាចម្រៀងឈួន ស្រីម៉ៅរូបនេះធ្លាប់បានសរសេរសារមួយ នៅលើបណ្តាញគេហទំព័រហ្វេសប៊ុករបស់នាងថា «នឹងលែងមានទៀតហើយភាពឯការបស់នាងខណៈ ដែលនាងរកបានបុរសថ្មីជាទីពឹងពាក់នោះ!»។ តាមរយៈការសរសេរសាររៀបរាប់របស់តារាចម្រៀងឈួន សុវណ្ណឆៃនេះដែរគេអាចសន្និដ្ឋានបានថា នាងកំពុងតែរួមរស់ជាមួយបុរសមានឥទ្ធិពលណាម្នាក់ ដោយគ្រាន់តែនាងស្ទាក់ស្ទើរក្នុងការបង្ហាញមុខរហូតពន្យារពេលមានកំណើតកូនទី៣នោះ។ គេនៅមិនទាន់ដឹងច្បាស់នៅឡើយទេអំពីអត្តសញ្ញាណបុរស ដែលជាឪពុកបានផ្តល់កំណើតឲ្យកូនទី៣នេះ ពីព្រោះ«កម្ពុជាថ្មី»មិនអាចទាក់ទងសួរនាំតារាចម្រៀងអ្នកនាងឈួន សុវណ្ណឆៃបានទេកាលពីព្រឹកថ្ងៃទី២០មិថុនានេះ ហើយសង្ឃឹមថា តារាសិល្បៈរូបនេះ នឹងធ្វើការបកស្រាយជូនមហាជនឲ្យបានជ្រាបផងដែរ៕
0 Comments