បន្ទាយមានជ័យ ៖ បុរសម្នាក់ក្នុងចំណោមមនុស្ស៧នាក់ដើរបេះជ័រចុងក្នុងពៃតាមបន្ទាត់ព្រំដែនជាន់មីនដាច់ជើងខាងស្តាំ និងខ្ទិចជើងឆ្វេង ហើយកំពុងត្រូវបានសម្រាកព្យាបាល នៅមន្ទីរពេទ្យបង្អែកស្រុកថ្មពួកខេត្តបន្ទាយមានជ័យ។
តាមការឲ្យដឹងពីសមត្ថកិច្ចឈរជើងការពារព្រំដែនកម្ពុជា ថៃត្រងចំនុចកើតហេតុបានឲ្យដឹងថាការជាន់មីនផ្ទុះខាងលើកើតទ្បើងកាលពីវេលាម៉ោង៩ និង២០នាទីថ្ងៃទី២២ ខែសីហា ឆ្នាំ២០១៥នៅខាងលិចបង្គោលសីមាលេខ ២៧ស្ថិតនៅក្នុងភូមិសាស្ត្រភូមិទ្រពាំងធ្លក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ដោយមុនកើតហេតុមានប្រជាជនខ្មែរចំនួន៧នាក់ដើរបេះជ័រចុងក្នុងចំណោម៧នាក់នេះមានម្នាក់ឈ្មោះសឿម ឌី ភេទប្រុស អាយុ២២ឆ្នាំ រស់ នៅ ភូមិបារ៉ាយ ឃុំបន្ទាយអំពិល ស្រុកបន្ទាយអំពិល ខេត្តឧត្តរមានជ័យ បានដើរជាន់មីនម៉ាកK58ដាច់ជើងខាងស្ដាំម្ខាង ជើងខាង ឆ្វេងខ្ទិច។
ក្រោយកើតហេតុជនរងគ្រោះ ត្រូវបានក្រុមហេឡូត្រាស សង្គ្រោះបន្ទាន់ ដឹកយកទៅមន្ទីរពេទ្យស្រុកថ្មពួក។ បច្ចុប្បន្នជនរងគ្រោះកំពុងតែសម្រាកព្យាបាលនៅមន្ទីរពេទ្យបង្អែកស្រុកថ្មពួក៕
ដើរបេះជ័រចុងតាមព្រំដែនជាន់មីនដាច់ជើងខាងស្តាំ និងខ្ទិចជើងឆ្វេង
0 Comments