*ហេង ពន្លឺ ជួប ណក់ ស៊ីនួន
ប្រដាល់ ៖ រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងត្រូវឡើងប្រកួតសាកកណ្ដាប់ដៃជាមួយអ្នកប្រដាល់ ម៉ន ចាន់ដារ៉ា ក្លិបការិយាល័យទី៥ កងទ័ពជើងគោក នាព្រឹកថ្ងៃអាទិត្យ ទី៣០ ខែសីហា ឆ្នាំ២០១៥នេះ នៅលើសង្វៀនSEA-TV។
ម៉ន ចាន់ដារ៉ា ជាអ្នកប្រដាល់ជើងខ្លាំងស្រករក្រោយ ដែលមានផ្លែជង្គង់ល្អ ហើយដោយសារគេខ្ពស់ផងនោះ រឹតតែធ្វើឲ្យការប្រកួតរបស់គេល្អជាងមុនទៅទៀត។ ម្នាក់នេះ កណ្ដាប់ដៃមិនសូវជាល្អទេ តែបើស្នៀតជង្គង់ និងកែង គឺល្អតែម្ដង។
អ្នកប្រដាល់មកពីព្រែកឯងរូបនេះ ស្នៀតប្រដាល់ និងកាយសម្បទារបស់គេល្អហើយ គ្រាន់តែខ្វះបទពិសោធន៍ និងតិចនិកប្រកួតតែប៉ុណ្ណោះ ប្រសិនបើមានចំណុចទាំងពីរនេះទៀតនោះ មិនងាយនរណាបង្ក្រាបគេបានឡើយ។ ការប្រកួតចុងក្រោយនេះ គេវាយចាញ់ ចាន់ ប៊ុនហឿន អ្នកប្រដាល់ក្លិបនិរោធមានជ័យក្នុងទឹកទី២ ដែលបញ្ជាក់ថា គេខ្វះល្បិចកលក្នុងការប្រកួត។
រឿង សារ័ត្ន ជាអ្នកប្រដាល់ស្រករក្រោយ ប៉ុន្តែគេមានផ្លែល្អ ដែលអ្នកប្រដាល់ស្រករគ្នាមិនអាចយកឈ្នះលើរូបគេបាននោះឡើយ។ តែយ៉ាងណា គេប៉ះជាមួយ ម៉ន ចាន់ដារ៉ា អាចថាពិបាកសង្ឃឹមឈ្នះបន្តិច ព្រោះថា ម៉ន ចាន់ដារ៉ា ប្រកួតជាមួយអ្នកប្រដាល់ស្រករក្រោយដូចគ្នា គេរឹតតែមិនខ្លាចញញើតអ្វីទាំងអស់។
កណ្ដាប់ដៃ និងស្នៀតជើងទាត់របស់ សារ័ត្ន លឿន ហើយគេវាយទៅតាមលក្ខណៈបច្ចេកទេសល្អថែមទៀត។ ទោះជាយ៉ាងនេះក៏ដោយ ក៏ប្រហែលជាទប់ជាមួយ ម៉ន ចាន់ដារ៉ា មិនបាននោះទេ ដោយសារពុំអាចទប់ជាប់ជាមួយនឹងការវាយប្រហារដ៏ខ្លាំងក្លារបស់ ចាន់ដារ៉ា បាន។ ប៉ុន្តែយ៉ាងណា ជួបជាមួយ រឿង សារ័ត្ន លើកនេះ ម៉ន ចាន់ដារ៉ា ក៏មិនជាស្រួលខ្លួនប៉ុន្មានដែរ។
រឿង សារ័ត្ន គេប្រកួតចុងក្រោយ វាយឈ្នះជើងខ្លាំង លាស់ យីន (រាជសីហ៍បាបា) អ្នកប្រដាល់ក្លិបសម្រែករាជសីហ៍ដោយពិន្ទុ។ ចាំមើល តើ រឿង សារ័ត្ន អាចយកឈ្នះ ម៉ន ចាន់ដារ៉ា បានដែរឬអត់?
ហេង ពន្លឺ អ្នកប្រដាល់ក្លិបព្រៃទទឹងខេត្តបាត់ដំបង នឹងឡើងមកជួបប្រកួតជាមួយ ណក់ ស៊ីនួន អ្នកប្រដាល់ក្លិបឃ្លាំងមឿងកីឡាខេត្តពោធិ៍សាត់។ ពួកគេជួបគ្នាក្នុងប្រភេទទម្ងន់៥៤គីឡូ ក្រាម។
ពីរនាក់នេះ មិនដែលជួបគ្នាទេពីមុនមក។ រវាងអ្នកប្រដាល់ទាំងពីរនេះ បើគិតពីប្រវត្តិប្រកួតនោះ ណក់ ស៊ីនួន មិនដល់ហេងពន្លឺទេ ដោយពន្លឺគេឡើងប្រកួតច្រើនជាង ខណៈដែល ស៊ីនួន គេទើបបង្ហាញមុខបានប៉ុន្មានដងប៉ុណ្ណោះ។
ណក់ ស៊ីនួន គេមានស្នៀតប្រដាល់ល្អ និងខ្លាំង ដែលការប្រកួតចុងក្រោយនេះ គេវាយឈ្នះម៉ន សុភ័ក្រ ក្លិបការិយាល័យទី៥កងទ័ពជើងគោកដោយពិន្ទុ។ ផ្ទុយពី ហេង ពន្លឺ ប្រកួតលើកចុងក្រោយនេះ វាយចាញ់ ពេជ្រ ប៊ុនឆេន ក្លិបមជ្ឈមណ្ឌលកីឡាខ.ភ.មដោយពិន្ទុ។
សម្រាប់ការឡើងប្រកួតលើកនេះ ហេង ពន្លឺតាមមើលប្រហែលជាពិបាកយកឈ្នះ ណក់ ស៊ីនួន ទៀតក៏អាចថាបានដែរ ព្រោះថា ស៊ីនួន គេមានផ្លែល្អជាង និងស៊ុហ្វខ្លាំងជាង។ ចាំមើល តើរវាងណក់ ស៊ីនួន និងហេង ពន្លឺនេះ តើនរណាជាអ្នកឈ្នះនោះ?
ឡូញ វ៉ាន់ឌី អ្នកប្រដាល់ក្លិបពន្លឺវិបុលរិទ្ធី នឹងជួបប្រកួតជាមួយ ប្រាក់ វិឆ័យ អ្នកប្រដាល់ក្លិបតាឯកដំបងដែក ដោយប្រកួតក្នុងទម្ងន់៦០គីឡូក្រាម។ ពួកគេពីរនាក់នេះ មិនដែលប៉ះគ្នាទេពីមុនមក ។
វ៉ាន់ឌី ស្នៀតប្រដាល់របស់គេច្បាស់ និងមានផ្លែល្អ។ បែបនេះហើយ ទើបការប្រកួតរបស់គេតែងទទួលលទ្ធផលល្អ។ ប្រកួតចុងក្រោយនេះ គេប្រកួតឈ្នះ ហេង សំណាង អ្នកប្រដាល់ក្លិបព្រៃទទឹងខេត្តបាត់ដំបង ក្នុងទឹកទី៤។
សម្រាប់ការជួបជាមួយ ប្រាក់ វិឆ័យ លើកនេះ វ៉ាន់ឌី ប្រហែលជាជួបសំណាងល្អទៀតក៏អាចថាបានដែរ ដោយសារតែ ប្រាក់ វិឆ័យ ជាអ្នកប្រដាល់ថ្មី។ តែយ៉ាងណា ប្រាក់ វិឆ័យ ប្រកួតចុងក្រោយនេះ វាយឈ្នះ ណម សុខគា ក្លិបអប់រំកាយកីឡាខេត្តបាត់ដំបង ក្នុងទឹកទី៣៕
រឿង សារ័ត្ន សាកជាមួយ ម៉ន ចាន់ដារ៉ា នៅSEA-TV
0 Comments