រដ្ឋមន្ត្រីក្រសួងការបរទេសរុស្ស៊ី លោក Sergey Lavrov បាននិយាយថា គំនិតនៃការបែងចែកប្រទេសអ៊ីរ៉ាក់នឹងមិនត្រូវបានយល់ព្រមដោយទីក្រុងមូស្គូឡើយ។ លោកបានសង្កត់ធ្ងន់ថាឧបាយកលបែបនេះគឺជារឿងហួសសម័យហើយប្រទេសអ៊ីរ៉ាក់គួរតែកំណត់អនាគតដោយខ្លួនឯង។
លោក Lavrov បាននិយាយថា ប្រទេសរុស្ស៊ីនឹងមិនទទួលយកនូវសំណើបែបនេះដែលបានសម្ដែងដោយអនុប្រធានាធិបតីសហរដ្ឋអាមេរិកលោក Joe Biden បានឡើយដែលលោកបាននិយាយដោយផ្ទាល់ថា អ៊ីរ៉ាក់ត្រូវតែពុះចែកជាតំបន់ សៀ និងស៊ុននីតាមអ្វីដែលពួកឃឺដចង់បាន។
លោក Lavrov បានចាត់ទុកការលើកឡើងរបស់លោក Biden ថាជា “ការមិនទទួលខុសត្រូវនិងមិនអាចទទួលយកបាន” ។ លោកបានសង្កត់ធ្ងន់ថា “យើងមិនអាចធ្វើរឿងបែបនេះបាននោះទេ ។ យើងជឿថាប្រជាជនអ៊ីរ៉ាក់ដែលមានដូចជា សៀ ស៊ុននីនិងឃឺដ ត្រូវតែសម្រេចចិត្តដោយខ្លួនឯងពីវិធីដែលត្រូវរស់នៅជាមួយគ្នា” ។
ការកត់សម្គាល់របស់លោក Lavrov បានធ្វើឡើងបន្ទាប់ពីមានសេចក្ដីរាយការណ៍ថា អនុប្រធានាធិបតី Joe Biden កំពុងសម្រេចចិត្តថាតើ លោកគួរឈរឈ្មោះបោះឆ្នោតប្រធានាធិបតីដែរឬក៏អត់។ គំនិតនៃវិសហមជ្ឈការប្រទេសអ៊ីរ៉ាក់នេះត្រូវបានសម្ដែងដោយលោក Biden នៅដើមឆ្នាំ ២០០៦ ក្នុងអត្ថបទទាក់ទងនឹងប្រទេសអ៊ីរ៉ាក់មួយក្នុងកាសែត New York Times ។
សហរដ្ឋអាមេរិកបានរួមគ្នាជាមួយនឹងក្រុមចម្រុះអន្តរជាតិមួយធ្វើសង្គ្រាមនៅប្រទេសអ៊ីរ៉ាក់ក្នុងឆ្នាំ ២០០៣ ក្រោមលេសដើម្បីលុបបំបាត់អាវុធប្រល័យលោកដែលបង្កើតឡើងដោយរបបរបស់លោក សាដាំ ហូសេន ។ បន្ទាប់ពីរបបនេះបានដួលរលំ អាវុធប្រល័យលោកមិនដែលត្រូវបានរកឃើញឡើយហើយអតីតមេដឹកនាំរូបនេះត្រូវបានព្យួរកដោយអាជ្ញាធរអ៊ីរ៉ាក់ថ្មីនៅថ្ងៃទី ៣០ ខែធ្នូ ឆ្នាំ ២០០៦ ។
សង្គ្រាមនៅអ៊ីរ៉ាក់បានបន្តរហូតដល់ឆ្នាំ ២០១១ និងបានសម្លាប់ជីវិតជនជាតិអ៊ីរ៉ាក់អស់ជិត១,៥ លាននាក់និងទាហានរបស់ក្រុមចម្រុះយ៉ាងហោចណាស់ ៦០០០ នាក់។
សង្គ្រាមស៊ីវិលនៅក្នុងប្រទេសអ៊ីរ៉ាក់បានចាប់ផ្ដើមភ្លាមបន្ទាប់ពីការដកកងកម្លាំងកាន់កាប់កំពុងបន្ត។ មនុស្សរាប់ពាន់នាក់បានស្លាប់នៅក្នុងទង្វើភេរវកម្មនិងការប៉ះទង្គិចគ្នា។
នាពេលបច្ចុប្បន្ននេះ ស្ថានភាពនៅក្នុងប្រទេសអ៊ីរ៉ាក់កំពុងធ្ងន់ធ្ងរយ៉ាងខ្លាំងដោយការរីកចម្រើននៃរដ្ឋឥស្លាម។ ក្រុមសកម្មប្រយុទ្ធមួយនេះបានចាប់យកទឹកដីអ៊ីរ៉ាក់ជាបន្តបន្ទាប់៕
RT
លោក Lavrov រិះគន់គំនិតរបស់លោក Biden ដែលចង់ឲ្យប្រទេសអ៊ីរ៉ាក់ពុះចែកជាផ្នែក
0 Comments