ភ្នំពេញ ៖ នេះជាការបញ្ជាក់របស់ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបេឡារូសប្រចាំកម្ពុជា ដែលបានថ្លែងនៅក្នុងបទសម្ភាសន៍ដាច់ដោយឡែកជាមួយបណ្តាញព័ត៌មានឈានមុខគេចំនួន៣ នៅកម្ពុជា ដែលមានទូរទស្សន៍ជាតិកម្ពុជា រស្មីកម្ពុជា និងកម្ពុជាថ្មីកាលពីថ្ងៃត្រង់ថ្ងៃទី២៥ ខែសីហា ឆ្នាំ២០១៥ នៅសណ្ឋាគារកាំបូឌីយ៉ាណា រាជធានីភ្នំពេញ។
លោកវ៉ា ឡឺរី សាដូខូ (Valery Sadokho) បានលើកឡើងថា មកដល់ពេលនេះ លោកបានមកដល់ប្រទេសកម្ពុជាចំនួន៦ លើករួចមកហើយ ដែលក្នុងនោះលើកទី១កាលពីឆ្នាំ២០១១ ហើយនៅពេលនេះលោកបានឃើញពីការរីកចម្រើនយ៉ាងខ្លាំងរបស់ប្រទេសកម្ពុជា។ លោកបន្តថា សម្តេចអគ្គមហាសេនាបតីតេជោ ហ៊ុន សែន ក៏ធ្លាប់បានទៅបំពេញទស្សនកិច្ចនៅបេឡារូសកាលពីឆ្នាំមុន ដែលដំណើរទស្សនកិច្ចនេះបានធ្វើឲ្យប្រទេសទាំងពីរមានទំនាក់ទំនងកាន់តែល្អ ហើយធ្វើឲ្យសេដ្ឋកិច្ចនៃប្រទេសទាំងពីរក៏បានរីកចម្រើនខ្លាំងផងដែរ។
លោកឯកអគ្គរដ្ឋទូតបានលើកឡើងទៀតថា ដោយសារតែទំនាក់ទំនងរវាងប្រទេសទាំងពីរ កាន់តែមានភាពប្រសើរឡើងនេះ បេឡារូសបានដំឡើងរោងចក្រត្រាក់ទ័រនៅប្រទេសកម្ពុជា ហើយការដំឡើងរោងចក្រនេះ ដោយសារតែកម្ពុជាជាប្រទេសកម្ពុជាកសិកម្ម ដូច្នេះបេឡារូសចង់ឲ្យប្រទេសកម្ពុជាមានភាពងាយស្រួលនៅក្នុងការធ្វើកសិកម្ម។ លោកបន្តថា នៅក្នុងដំណើរទស្សនកិច្ចរបស់នាយករដ្ឋមន្ត្រីកម្ពុជា សម្តេចក៏បានទៅមើលរោងចក្រដំឡើងត្រាក់ទ័រ ហើយនៅពេលដែលប្រទេសកម្ពុជាមានការរីកចម្រើនលើវិស័យកសិកម្ម ដែលមានដំណាំកៅស៊ូ និងអង្ករជាដើម បេឡារូសនឹងសុំទិញនាំចូលទៅប្រទេសរបស់ខ្លួន។
ជាមួយនឹងការលើកឡើងខាងលើនេះ លោក Valery Sadokho បានអះអាងថា នៅក្នុងដំណើរទស្សនកិច្ចនៅកម្ពុជានាពេលនេះ លោកបានជួបជាមួយក្រុមហ៊ុនជាច្រើន ហើយដែលអាចនឹងធ្វើការជាមួយគ្នានាពេលខាងមុខ។ លោកបន្តថា ឆ្នាំ២០១៥នេះ ទំនាក់ទំនងបេឡារូស និងកម្ពុជាមានរយៈពេល២០ឆ្នាំហើយ ដែលទំនាក់ទំនងនេះក៏បានធ្វើឲ្យមានការផ្លាស់ប្ដូរមុខមាត់យ៉ាងច្រើន ក៏ដូចជាធ្វើឲ្យប្រទេសទាំងពីរមានទំនាក់ទំនងផ្លាស់ប្ដូររលើទំនិញផ្សេងៗលើវិស័យពាណិជ្ជកម្ម។ លោកឯកអគ្គរដ្ឋទូតបានលើកឡើងទៀតថា ប្រទេសទាំងពីរអាស្រ័យទៅលើយុវជនជំនាន់ក្រោយ ហើយនៅបេឡារូសមានសាលាឧត្តមសិក្សាជាច្រើនសម្រាប់ទទួលសិស្សពីកម្ពុជា ប៉ុន្តែឧត្តមសិក្សានៅបេឡារូសមិនសម្រាប់ទទួលតែ សិស្ស និស្សិតទៅពីកម្ពុជាទេ ក៏សម្រាប់សិស្សមកពីទូទាំងពិភពលោកផងដែរ។ លោកបន្តថា នៅបេឡារូសមានជំនាញខាងបច្ចេកទេសជាច្រើន ជាពិសេសខាងគ្រឿងយន្តកសិកម្ម ដូច្នេះបេឡារូសនឹងបើកសាលាជំនាញ អាយធីមួយនៅកម្ពុជា ដើម្បីឲ្យយុវជននិងសិស្ស និស្សិតបានចូលរៀនសាលាជំនាញនេះ។
បើតាមឯកអគ្គរដ្ឋទូតបានបញ្ជាក់ថា សាលាជំនាញនេះប្រើរយៈពេលតែ៥-៦ ខែប៉ុណ្ណោះ និងអាចយកទៅប្រើការបាន។ តាមលោកឯកអគ្គរដ្ឋទូតលើកឡើងដែរថា ប្រទេសបេឡារូសជាប្រទេសមានស្ថិរភាពនយោបាយ ដូច្នេះបេឡារូសរង់ចាំជួយ និងធ្វើកិច្ចសហប្រតិបត្តិការជាមួយប្រទេសកម្ពុជាជានិច្ច។ បេឡារូស គឺជាប្រទេសមួយស្ថិតនៅក្នុងសហភាពសូវៀត ហើយនៅឆ្នាំ១៩៩០បេឡារូសទទួលបានឯករាជ្យពីសហភាពសូវៀត ហើយនៅពេលនោះ ព្រះករុណា ព្រះមហាវីរក្សត្របានផ្តល់មេដាយដល់បេឡារូសនាពេលនោះ ដែលធ្វើទំនាក់ទំនងរវាងប្រទេសទាំងពីរចាប់ផ្ដើមរីកចម្រើនជារៀងរហូត។
អ្វីដែលធ្វើឲ្យប្រទេសទាំងពីរមានទំនាក់ទំនងកាន់តែល្អ និងរីកចម្រើនទៀតនោះគឺចាប់ផ្តើមឡើងនៅពេលមានដំណើរទស្សនកិច្ចរបស់ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែនទៅ កាន់បេឡារូស ដែលដំណើរទស្សនកិច្ចទាំងនោះបានធ្វើឲ្យបេឡារូសឈានដល់ការបង្កើតរោងចក្រនៅថ្ងៃនេះ។ លោកបញ្ជាក់ដែរថា នៅក្នុងដំណើរទស្សនកិច្ចនៅកម្ពុជានា ពេលនេះដែរ លោកក៏បានជួបជាមួយរដ្ឋមន្ត្រីក្រសួងកសិកម្ម ដោយបានពិភាក្សាគ្នាទៅលើការធ្វើឲ្យរីកចម្រើនខាងវិស័យកសិកម្ម ហើយក្នុងនោះ បេឡារូសបានត្រៀមរួចជាស្រេច ដើម្បីផលិតផលមួយចំនួនពីកម្ពុជា ដូចជាកៅស៊ូ និងអង្ករជាដើម។
ទាក់ទងទៅដល់វិស័យទេសចរណ៍ លោកValery Sadokho បានបញ្ជាក់ថា លោកបានទៅដល់ខេត្តសៀមរាបនៃប្រទេសកម្ពុជារួចហើយ និងបានចាប់អារម្មណ៍យ៉ាងខ្លាំងទៅលើតំបន់ទេសចរណ៍ ជាពិសេសសម្បត្តិវប្បធម៌ដ៏អស្ចារ្យរបស់កម្ពុជា ដូច្នេះលោកនឹងជំរុញឲ្យមានជើងហោះហើរដើម្បីឲ្យប្រជាពលរដ្ឋនៅប្រទេសបេឡារូសបានធ្វើដំណើរងាយស្រួលមកទេសចរណ៍ នៅប្រទេសកម្ពុជា។ ដោយឡែកខាងវិស័យឧស្សាហកម្ម លោកឯកអគ្គរដ្ឋទូតបានបញ្ជាក់ថា ចង់ឲ្យមានការនាំក្រណាត់ពីប្រទេសកម្ពុជាទៅដេរនៅប្រទេសបេឡារូស ដើម្បីផលិតនាំចេញទៅអឺរ៉ុបខាងកើត។
ទាក់ទងទៅដល់ការដំឡើងរោងចក្រកសិកម្មផ្សេងៗនៅប្រទេសកម្ពុជា លោកឯកអគ្គរដ្ឋទូតបានថ្លែងបញ្ជាក់ថា នឹងដំឡើងនៅឆ្នាំក្រោយ ដោយសារតែខាងក្រសួងកសិកម្មតម្រូវឲ្យរាយឈ្មោះរោងចក្រដែលត្រូវដំឡើងនោះ។ តែទោះជាយ៉ាងណាក៏នៅមានការកំណត់តម្លៃផ្សេងៗនៅពេលដែលរោងចក្រផលិតបាន ថាតើប្រជាពលរដ្ឋកម្ពុជាអាចមានលទ្ធភាពទិញយកទៅប្រើប្រាស់បានដែរឬទេ៕
សាធារណរដ្ឋបេឡារូសគ្រោងពង្រីកខ្លួនជាមួយនឹងផ្នែកកសិកម្ម និងបច្ចេកទេសនៅកម្ពុជា
0 Comments