ភ្នំពេញ ៖ រោងចក្រកាត់ដេរសំលៀកបំពាក់១កន្លែង យីហោ ស៊ីងហាយហ្វេង ហ្គាមេនខេបូឌា ដែលមានទីតាំងស្ថិតក្នុងភូមិរោងចក្រ សង្កាត់ភ្នំពេញថ្មី ខណ្ឌសែនសុខ ត្រូវភ្លើងឆេះបំផ្លាញផលិតផលសម្រេច និងសម្ភារៈផ្សេងៗទៀតខូចខាតអស់ស្ទើរតែទាំងស្រុង កាលពីវេលាម៉ោង៧យប់ ថ្ងៃទី២៤ខែសីហា ឆ្នាំ២០១៥ ដោយមិនដឹងមូលហេតុ និងសង្ស័យថាទុស្សេខ្សែភ្លើង។
តាមប្រភពព័ត៌មានពីប្រជាពលរដ្ឋនៅក្បែរកន្លែងកើតហេតុបានឲ្យដឹងថា នៅក្រោយពេលកម្មករចេញពីធ្វើការអស់ វេលាម៉ោង៦ល្ងាច ចុះដល់ម៉ោងប្រហែល៧យប់ ក៏មានផ្សែងហុយចេញពីខាងក្នុង ប៉ែកខាងក្រោយនៃរោងចក្រនេះយ៉ាងខ្លាំងដោយពុំដឹងមូលហេតុ បន្តិចក្រោយមកទៀត ដោយសារគ្មានវិធីទប់ស្កាត់ភ្លាមៗ ក៏បណ្ដាលឲ្យមានអណ្ដាតភ្លើងឆាបឆេះយ៉ាងសន្ធោសន្ធៅតែម្ដង រហូតមានរថយន្តពន្លត់អគ្គិភ័យបន្តកន្ទុយគ្នាមកពន្លត់ក៏មិនអាចសង្គ្រោះបានដែរ គឺបានត្រឹមតែទប់
ស្កាត់មិនឲ្យរាលដាលឆេះដល់ផ្ទះប្រជាពលរដ្ឋនៅក្បែរខាងនោះ។
លោក ម៉ក់ ហុង អធិការនគរបាលខណ្ឌសែនសុខបានមានប្រសាសន៍ថា អគ្គិភ័យនេះអាចបណ្តាលមកពីការទុស្សេខ្សែភ្លើងដែលមានចរន្តអគ្គិសនី។ លោកបន្តថា នៅក្នុងការជួយសង្គ្រោះនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យប្រមាណ២០គ្រឿង និងប្រើប្រាស់ទឹកអស់ចំនួន៣០ឡាន។
លោកបានបញ្ជាក់ថា មិនទាន់មានរបាយការណ៍ជាក់លាក់ពីតំណាងប្រធានក្រុមហ៊ុននេះថា ទ្រព្យសម្បត្តិដែលរងការបំផ្លាញដោយភ្លើងឆេះនោះមានតម្លៃជាសាច់ប្រាក់អស់ប៉ុន្មាននៅឡើយទេ។
លោកប្រាប់ថា យើងបានជួយបាញ់ទឹកពន្លត់ទប់ស្កាត់ផលិតផលសម្រេចបានមួយចំនួនដែលដែលបានវេចខ្ចប់រួចគ្រោងបញ្ចូលក្នុងទូកុងតឺន័រនោះ តែក្រៅពីនេះខូចអស់ទាំងស្រុងដូចជាក្រណាត់ ម៉ាស៊ីន និងសម្ភារៈផ្សេងៗទៀត។
លោក កែវ សុទ្ឋោធន៍ នាយប៉ុស្តិ៍នគរបាលរដ្ឋបាលសង្កាត់ភ្នំពេញថ្មីបានមានប្រសាសន៍ថា រោងចក្រនេះសង់អំពីដែកប្រក់ស័ង្កសីមានទំហំ៥០ គុណនឹង៦០ម៉ែត្រ មានម្ចាស់ឈ្មោះ វ៉ានី បានជួលទីតាំងនេះទៅឲ្យឈ្មោះ ធៀង ហុង ភេទប្រុស អាយុ៦០ឆ្នាំ ជនជាតិចិនតៃវ៉ាន់ និងជាថៅកែក្រុមហ៊ុនរោងចក្រកាត់ដេរនេះ។
តាមការបំភ្លឺរបស់លោក ធៀង ហុង ថៅកែរោងចក្រនេះបានប្រាប់សមត្ថកិច្ចថា ទ្រព្យសម្បត្តិនៅក្នុងរោងចក្រនេះមានកម្មករសរុប២៧០នាក់ ក្នុងនោះប្រុស៦០នាក់ និងមានម៉ាស៊ីនដេរចំនួន៤០០គ្រឿង។ ទ្រព្យសម្បត្តិទាំងនេះរាប់ទាំងផលិតផលសម្រេច ត្រូវបានភ្លើងឆេះខូចខាតអស់ចំនួន ៩០ភាគរយទៅហើយ ដែលមានទឹកប្រាក់រាប់សិបម៉ឺនដុល្លារ ត្រូវខាតបង់ដោយសារអគ្គិភ័យដ៏គួរឲ្យរន្ធត់ចិត្តនេះដោយពុំដឹងមូលហេតុច្បាស់។
ប៉ូលិស និងក្រុមអ្នកជួយសង្គ្រោះបានចំណាយពេលវេលាប្រហែលជាង២ម៉ោងក្នុងហេតុការណ៍នេះ ដើម្បីជួយពន្លត់ភ្លើងដែលឆាបឆេះចាប់តាំងម៉ោងប្រហែល៧ ដល់ម៉ោង៩យប់ តាមរបាយការណ៍របស់ប៉ូលិសមូលដ្ឋានបានបញ្ជាក់ថា មានរថយន្តពន្លត់អគ្គិភ័យចំនួន១៧គ្រឿងរបស់ប៉ូលិសនិងទាហានមកជួយបាញ់ពន្លត់ ដោយប្រើប្រាស់ទឹកអស់ចំនួន៣០ឡាន ទើបពន្លត់បានជោគជ័យទាំងស្រុង មិនឲ្យឆ្លងរាលដាលទៅដល់ផ្ទះប្រជាពលរដ្ឋជិតខាងបាន។
សូមរំលឹកថា កាលពីសប្ដាហ៍មុននេះ ក៏មានគ្រោះអគ្គិភ័យកើតឡើងនៅភូមិច្រេស សង្កាត់ភ្នំពេញថ្មីនេះដែរ ដោយបំផ្លាញទីតាំងសិប្បកម្មផលិតក្ដារបន្ទះកុងប្លាកេរ១ខ្នងដ៏ធំ ខូចខាតទ្រព្យសម្បត្តិអស់ទាំងតែម្ដង។ ហើយក៏បានសង្ស័យលើការទុស្សេចរន្តអគ្គិសនីដែរ៕
អគ្គិភ័យលេបត្របាក់រោងចក្រកាត់ដេរ១កន្លែង ខូចខាតស្ទើរតែទាំងស្រុង(Update)
0 Comments