ចាប់​ពី​ពេល​នេះ​ទៅ​រាល់​ការ​លក់​ ឬ​ចែកចាយ​ស៊ីម​កាត​របស់​ក្រុមហ៊ុន​ ត្រូវតែ​យក​អត្តសញ្ញាណប័ណ្ណ​

ភ្នំពេញ ៖ ចាប់​ពី​ពេល​នេះ​ទៅ​រាល់​ការ​លក់​ ឬ​ចែកចាយ​ស៊ីម​កាត​របស់​ក្រុមហ៊ុន​ ឬ​ភ្នាក់ងារ​ចែកចាយ​បន្ត​របស់​ក្រុមហ៊ុន​ ដាច់ខាត​ត្រូវតែ​យក​អត្តសញ្ញាណប័ណ្ណ ឬ​ឯកសារ​សម្គាល់​អត្តសញ្ញាណប័ណ្ណ​របស់​អតិថិជន។​

លោក​ឧត្ដមសេនីយ៍​ឯក ឆៃ ស៊ីណា​រិ​ទ្ធ អគ្គ​ស្នងការ​រង​នគរបាល​ជាតិ​ នៃ​ក្រសួងមហាផ្ទៃ រួម​ជា​មួយ​នឹង​លោក ម៉ូ​វ ចរិយា អគ្គនាយក​បញ្ញត្តិ​ករ​ទូរគមនាគមន៍​កម្ពុជា​បាន​មានប្រសាសន៍​ឲ្យ​ដឹង​នៅ​ក្នុង​សន្និសីទ​សារព័ត៌មាន​នា​រសៀល​ថ្ងៃ​ទី​២២ ​ខែ​កញ្ញា​ ឆ្នាំ​២០១៥​ នៅ​សណ្ឋាគារ​អ៊ី​ន​ធើ​កុងទីណង់​តាល់ ភ្នំពេញ ស្ដីពី​វិធានការ​ទប់ស្កាត់​ការចែក​ចាយ​ និង​លក់​ស៊ីម​កាត​ទូរស័ព្ទ​ចល័ត​ ដោយ​មិន​យក​អត្តសញ្ញាណ​ និង​ឯកសារ​សំគាល់​អត្តសញ្ញាណ​ផ្ទុយ​ពី​សារាចរ​អន្តរក្រសួង​លេខ​០០១​ សរ​.​ម​ផ​.​បទ​ចុះ​ថ្ងៃ​ទី​២៨​ ខែ​កុម្ភៈ ​ឆ្នាំ​២០១២។

ដោយ​ពិនិត្យ​ឃើញ​ថា ​កន្លងមក​ក្រុមហ៊ុន​ផ្តល់​សេវា​ទូរស័ព្ទ​ពុំ​ទាន់​អនុវត្ត​ឲ្យ​បាន​ពេញ​លេញ​ស្របតាម​ស្មារតី​សារាចរ​អន្តរក្រសួង​លេខ​០០១​ ស្ដីពី​ការគ្រប់គ្រង​ការ​ធ្វើ​អាជីវកម្ម​ និង​ការប្រើប្រាស់​សេវាកម្ម​ទូរគមនាគមន៍ ពិសេស​បណ្ដា​ក្រុមហ៊ុន​ផ្តល់​សេវា​ទូរស័ព្ទ រួម​ទាំង​ភ្នាក់ងារ​ចែកចាយ​បាន​ធ្វើ​ការ​លក់ ​ឬ​ចែកចាយ​ស៊ីម​កាត​ទូរស័ព្ទ​ដោយ​លក្ខណៈ​ប្រកួតប្រជែង​គ្នា​ដើម្បី​ដណ្ដើម​អតិថិជន​រហូត​ឈាន​ដល់​ការ​ពុំ​យក​អត្តសញ្ញាណប័ណ្ណ អ្នកប្រើប្រាស់​ជា​ពលរដ្ឋ​ខ្មែរ​ ក៏ដូចជា​បរទេស​ដោយ​មិនបាន​គិតដល់​ហានិភ័យ​ធ្ងន់ធ្ងរ​កើតមាន​ចំពោះ​សន្តិសុខ​ជាតិ និង​សុវត្ថិភាព​សង្គម។

ជាក់ស្ដែង​ឆ្លងតាម​ការស៊ើបអង្កេត ស្រាវជ្រាវ​លើ​ឧក្រិដ្ឋកម្ម​ធំៗ​មួយ​ចំនួន​កន្លងមក​ដូចជា អំពើ​ភេរវកម្ម ឧក្រិដ្ឋកម្ម​ឆ្លងដែន ការ​ជួញដូរ​គ្រឿងញៀន អំពើ​ជួញដូរ​មនុស្ស ការ​គំរាម​ជំរិត​ទារ​ប្រាក់ ឧក្រិដ្ឋជន​បាន​ប្រើប្រាស់​បណ្ដាញ​ទូរស័ព្ទ​ចល័ត​ដើម្បី​ធ្វើ​សកម្មភាព​ដោយ​ការប្រើប្រាស់​អត្ត​សញ្ញាណ​អ្នកដទៃ ឬ​គ្មាន​អត្តសញ្ញាណ​របស់​ជនល្មើស ​ត្រូវ​បាន​រក្សាទុក​ក្នុង​ទិន្នន័យ​របស់​ក្រុមហ៊ុន​ឡើយ។

លោក​ឧត្ដមសេនីយ៍​ឯក ឆៃ ស៊ីណា​រិ​ទ្ធ បាន​បញ្ជាក់​ថា ​សន្និសីទ​នេះ​ធ្វើឡើង​ក្នុង​គោលបំណង​ដើម្បី​ឲ្យ​ប្រជាពលរដ្ឋ​កម្ពុជា​ ក៏ដូចជា​ជនបរទេស​ទាំងអស់​ដែល​ស្នាក់នៅ​ប្រទេស​កម្ពុជា​បាន​ជ្រាប​ជា​ព័ត៌មាន​អំពី​ការប្រើប្រាស់​ប្រព័ន្ធ​ទូរគមនាគមន៍ និង​អំពី​គោលការណ៍​ដែល​រាជរដ្ឋាភិបាល ​ក៏ដូចជា​អន្តរក្រសួង ក្រសួងមហាផ្ទៃ ក្រសួង​ប្រៃសណីយ៍ ​និង​ទូរគមនាគមន៍​បាន​រៀបចំ​នូវ​គោលការណ៍ ​និង​កែសម្រួល​ក្នុង​ការ​គ្រប់គ្រង​ការប្រើប្រាស់​ប្រព័ន្ធ​ទូរគមនាគមន៍​នៅ​កម្ពុជា​កាន់តែ​មាន​ភាព​មួយ​ល្អ​ប្រសើរ ដែល​អាច​ទប់ស្កាត់​បាន​នូវ​រាល់​ការប្រើប្រាស់​មធ្យោបាយ​ទូរគមនាគមន៍​ក្នុង​ការ​ប្រព្រឹត្តិ​បទ​ល្មើស​ផ្សេងៗ​ដូចជា​ អំពើ​ភេរវកម្ម ឧក្រិដ្ឋកម្ម​ឆ្លងដែន ការ​ជួញដូរ​គ្រឿងញៀន អំពើ​ជួញដូរ​មនុស្ស ការ​គំរាម​ជំរិត​ទារ​ប្រាក់​ជាដើម។

ហេតុនេះ​ដើម្បី​ធានា​កិច្ចសហការ​អនុវត្តន៍​ឲ្យ​មាន​ប្រសិទ្ធភាព​នូវ​សារាចរ​អន្តរ​ក្រសួង អគ្គ​ស្នងការដ្ឋាន​នគរបាល​ជាតិ ​សហការ​ជាមួយ​ប​ញ្ញ​តិ្ត​ករ​ទូរគមនាគមន៍​កម្ពុជា​ចាត់វិធានការ​រដ្ឋបាល ​ឬ​តាមច្បាប់​ជា​ធរមាន​ចំពោះ​ក្រុមហ៊ុន ​ឬ​ភ្នាក់ងារ​ចែកចាយ​បន្ត​របស់​ក្រុមហ៊ុន​ណា​ដែល​មិន​អនុវត្ត​តាម​ដោយ​ម៉ឺងម៉ាត់​បំផុត។​

ក្នុង​នោះ​ក៏​មាន​ការ​ទុក​រយៈពេល​០៣​ខែ​ចាប់​ពី​ថ្ងៃ​ប្រកាស​ព័ត៌មាន ដើម្បី​អនុញ្ញាត​ឲ្យ​ប្រតិបត្តិ​ករ​ធ្វើការ​កែសម្រួល ​ឬ​លុបចោល​ទៅលើ​ស៊ីម​កាត​ទាំង​ឡាយ​ណា​ដែល​ក្រុមហ៊ុន​បាន​លក់ ឬ​ចែក​ចាយ​ដោយ​គ្មាន​អត្តសញ្ញាណប័ណ្ណ ឬ​ឯកសារ​សម្គាល់​អត្តសញ្ញាណ​។

អំឡុង​ពេលនេះ​ប្រតិបត្តិ​ករ​ត្រូវ​ជូនដំណឹង​ដល់​អតិថិជន​អ្នកប្រើប្រាស់​របស់​ខ្លួន​ទាំង​ពលរដ្ឋ​ខ្មែរ​ និង​ជនបរទេស​ដែល​កំពុង​ប្រើប្រាស់​បណ្ដាញ​របស់​ខ្លួន ហើយ​ពុំ​ទាន់​មាន​អត្តសញ្ញាណប័ណ្ណ ឬ​ឯកសារ​សម្គាល់​អត្តសញ្ញាណ​ឲ្យ​មក​បំពេញ​តាម​កាលកំណត់ បើ​ពុំ​ដូច្នេះ​ទេ​ នឹង​ត្រូវ​លុបចេញ​ពី​បណ្ដាញ​ប្រើប្រាស់​ជា​ស្វ័យប្រវត្តិ។​

សេចក្ដី​ប្រកាស​ព័ត៌មាន​នេះ​ធ្វើឡើង​នៅ​រាជធានី​ភ្នំពេញ​ ដោយមាន​ការចូលរួម​ពី​តំណាង​អគ្គ​ស្នងការដ្ឋាន​នគរ​បាល​ជាតិ ក្រសួងមហាផ្ទៃ បញ្ញត្តិ​ករ ទូរគមនាគមន៍​កម្ពុជា អគ្គាធិការ​ដ្ឋាន ក្រសួង​ប្រៃសណីយ៍ និង​ទូរគមនាគមន៍ ព្រមទាំង​បណ្ដា​ប្រតិបត្តិ​ករ​ផ្តល់​សេវា​ទូរស័ព្ទ​ចល័ត​ទាំងអស់​កំពុង​ប្រតិបត្តិការ​នៅ​ក្នុង​ព្រះរាជាណាចក្រ​កម្ពុជា​រួម​មាន ក្រុមហ៊ុន​Viettel(Cambodia) Pte.,Ltd. ក្រុមហ៊ុន Smart Axiata Co.,Ltd ក្រុមហ៊ុន CamGSM Co.,Ltd .​ក្រុមហ៊ុន​Cambodia Advance Communications Co.,Ltd (CADCOMMS)​ក្រុមហ៊ុន Xinwei (Cambodia) Telecom Co.,Ltd និង​ក្រុមហ៊ុន South East Telecom (Cambodia) Co., Ltd.(SEATEL)៕

​ ​

​

ចាប់​ពី​ពេល​នេះ​ទៅ​រាល់​ការ​លក់​ ឬ​ចែកចាយ​ស៊ីម​កាត​របស់​ក្រុមហ៊ុន​ ត្រូវតែ​យក​អត្តសញ្ញាណប័ណ្ណ​