កណ្ដាល ៖ បានប្រកាសបញ្ចេញថវិកាចំនួនជាង៦ម៉ឺនដុល្លារសម្រាប់ឧបត្ថម្ភសិស្សប្រលងជាប់បាក់ឌុបក្នុងឆ្នាំសិក្សា២០១៤-២០១៥នេះ។ ការប្រកាសនេះធ្វើឡើងក្នុងពិធីសំណេះសំណាលជាមួយសិស្សប្រលងជាប់និទ្ទេស(A) ចំនួន៣នាក់ និងសិស្សប្រលងជាប់បាក់ឌុប៤៩៣នាក់នៅក្នុងក្រុងតាខ្មៅ រួមនឹងលោកគ្រូ អ្នកគ្រូ និងថ្នាក់ដឹកនាំខេត្តកាលពីព្រឹកថ្ងៃទី២១ ខែកញ្ញា ឆ្នាំ២០១៥នេះ។
លោក ម៉ៅ ភិរុណ អភិបាល នៃគណៈអភិបាលខេត្តកណ្ដាលមានប្រសាសន៍ថា ក្នុងគោលនយោបាយលើកកម្ពស់វិស័យអប់រំ និងលើកទឹកចិត្តដល់សិស្សដែលប្រលងជាប់បាក់ឌុបក្នុងឆ្នាំសិក្សា២០១៤ល-២០១៥នេះ សាលាខេត្តកណ្ដាលបានបញ្ចេញថវិកាចំនួន៦០,៦៤០ដុល្លារ សហរដ្ឋអាមេរិកដើម្បីឧបត្ថម្ភដល់សិស្សនៅទូទាំងខេត្តកណ្តាលដែលប្រលងបាក់ឌុបជាប់នៅក្នុងឆ្នាំនេះ ដោយម្នាក់ៗត្រូវទទួលថវិកា១០០ដុល្លារសម្រាប់ការងារដាក់ពាក្យប្រលងរបស់ខ្លួនបន្តទៅថ្នាក់មហាវិទ្យាល័យ ដោយឡែកសិស្សជាប់និទ្ទេស(A)ចំនួន៣នាក់នៅក្នុងក្រុងតាខ្មៅទទួលបានម៉ូតូSCOPY ស៊េរីឆ្នាំ2015 ម្នាក់១គ្រឿង អមជាមួយនឹងថវិកា១០០ដុល្លារផងដែរ។
លោកបញ្ជាក់ថា ថវិកានេះមិនមែនជាថវិការបស់រដ្ឋនោះទេ ប៉ុន្តែជាថវិកាដែលទទួលបានពីការកៀរគរពីសម្បុរសជននានារួមមាន ថ្នាក់ដឹកនាំជុំវិញខេត្ត អ្នកវិនិយោគិនមួយចំនួន និងការ កៀរគរពីមិត្តភ័ក្ដិរបស់លោកមួយចំនួនទៀតផងដែរ។
សូមជម្រាបថា នៅទូទាំងខេត្តកណ្តាលមានបេក្ខជនដាក់ពាក្យប្រលងចំនួន៧,០៨៨នាក់ ប្រលងជាប់ចំនួន៣,៤៥១នាក់ ស្មើនឹង៤៨,៦៩ភាគរយ បើធៀបនឹងឆ្នាំមុនកើន២១,១២ភាគរយ ក្នុងនោះនិទ្ទេសA កើន៣នាក់ និងនិទ្ទេសBកើន៤៨នាក់ និទ្ទេសCកើន១១៦នាក់ និទ្ទេសD២៧៤នាក់និងនិទ្ទេសEកើន៣៣០នាក់៕
សាលាខេត្តកណ្ដាលបញ្ចេញថវិកាជាង៦ម៉ឺនដុល្លារឧបត្ថម្ភសិស្សជាប់បាក់ឌុប
0 Comments