ភ្នំពេញ ៖ យុវជនម្នាក់ត្រូវបានជនសង្ស័យពីរនាក់ជិះម៉ូតូមកកៀរ ឲ្យឈប់រួចដកកាំភ្លើងខ្លីមកភ្ជង់ប្លន់យកម៉ូតូបានសម្រេចហើយនាំគ្នាជិះគេចខ្លួនបាត់ ដោយសុវត្ថិភាព តែមិនមានធ្វើឲ្យជនរងគ្រោះរងរបួសនោះឡើយ។
ហេតុការណ៍នេះបានកើតឡើងនៅវេលាម៉ោង១និង៩នាទីរំលងអធ្រាត្រឈានចូលថ្ងៃទី២៣ខែកញ្ញាឆ្នាំ២០១៥ស្ថិតនៅតាមបណ្តោយផ្លូវបេតុងក្នុងភូមិព្រៃព្រីង ខាងជើងសង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះមានឈ្មោះម៉ុង លីដា ភេទប្រុសអាយុ២១ឆ្នាំមុខរបរជាជាងសំណង់បច្ចុប្បន្នស្នាក់ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញជិះមួយគ្រឿងម៉ាក ស៊ុយសុគីស្មាស់វី ពណ៌ស ពាក់ស្លាកលេខ ភ្នំពេញ១CB2881។
ជនសង្ស័យមានគ្នាពីរនាក់ជិះម៉ាកវ៉េវមួយគ្រឿង គ្មានស្លាកលេខប្រដាប់ដោយកាំភ្លើងខ្លី១ដើមមិនស្គាល់ម៉ាក។ តាមប្រភពពីសមត្ថកិច្ចបានឲ្យដឹងថា មុនពេលកើតហេតុបានជនរងគ្រោះជិះម៉ូតូម្នាក់ឯងចេញពីផ្ទះមិត្តភក្ដិនៅម្ដុំរោងចក្រ ឃ្យូអឹមអាយក្បែរកន្លែងកើតហេតុនោះដែរខណៈមកដល់ចំណុចកើតហេតុខាងលើស្រាប់មានជនសង្ស័យពីរនាក់មិនដឹងជាចេញមកពីចំណុចណាទេបានជិះម៉ូតូមួយគ្រឿងម៉ាកវ៉េវអត់ស្លាកលេខប្រដាប់ដោយកាំភ្លើងខ្លីមួយដើម មិនស្គាល់ម៉ាកជិះមកកៀរជនរងគ្រោះឲ្យចូលកៀនចិញ្ចើម ផ្លូវ ហើយដកកាំភ្លើងភ្ជង់ប្លន់យកម៉ូតូពីជនរងគ្រោះបានសម្រេចរួចជិះម៉ូតូត្រឡប់ក្រោយវិញគេចខ្លួនបាត់ដោយសុវត្ថិភាព។
ក្រោយពីកើតហេតុជនរងគ្រោះបានរត់ទាំងភ័យស្លន់ស្លោចូលក្នុងប៉ុស្តិ៍ចោមចៅ ដើម្បីមកដាក់ពាក្យបណ្តឹងក្រែងថ្ងៃណាមួយអាចតាមចាប់ជនជាប់សង្ស័យមកបាន។ គេសង្កេតឃើញថា ឲ្យតែមានកម្មវិធីបុណ្យទានប្រពៃណីធំៗដូចជាពេលបុណ្យចូលឆ្នាំ ឬបុណ្យភ្ជុំបិណ្ឌជាដើមក្រុមជនខិលខូចតែងតែឆក់ឱកាសធ្វើសកម្មភាពយ៉ាងងងើលហាក់គ្មានកោតខ្លាចសមត្ថកិច្ចឡើយ៕
ចោរប្រដាប់អាវុធពីរនាក់ជិះម៉ូតូមកកៀរ ភ្ជង់ប្លន់យកម៉ូតូពីយុវជនម្នាក់បានសម្រេច
0 Comments