ស្ទឹងត្រែង ៖ ជនសង្ស័យ២នាក់ពាក់ព័ន្ធ និង ក្នុងករណីចែកចាយគ្រឿងញៀន ត្រូវបានកម្លាំងអាវុធហត្ថឃាត់ខ្លួន កាលពីវេលាម៉ោង ១១និង៥៥នាទី ថ្ងៃទី១១ ខែវិច្ឆិកា ឆ្នាំ២០១៥នៅតាមផ្លូវម្នាក់និងបានចុះឡោមព័ទ្ធ ឃាត់បានម្នាក់ទៀត នៅចំណុចផ្ទះជនសង្ស័យ ស្ថិតក្នុងភូមិព្រែកសង្កាត់ ក្រុងស្ទឹងត្រែង។
លោកវរសេនីយ៍ទោដួង វិចិត្រប្រធានមន្ទីរព័ត៌មាន និង សន្តិសុខអាវុធហត្ថខេត្តបានឲ្យដឹងថា ជនសង្ស័យ២នាក់ ដែលសមត្ថកិច្ចឃាត់ខ្លួន មាន១ឈ្មោះម៉ុំ សារុំភេទស្រី អាយុ៣០ឆ្នាំ ជនជាតិខ្មែររស់នៅភូមិព្រែក សង្កាត់ ក្រុងស្ទឹងត្រែង ២ឈ្មោះ ឡេ វ៉ាន់តែវ ភេទប្រុស អាយុ៣៨ឆ្នាំ ជាជនជាតិខ្មែរ ស្រុកកំណើតនៅខេត្តស្វាយរៀង។
លោកវរសេនីយ៍ទោបានបន្តឲ្យដឹងទៀតថា ការឃាត់ខ្លួនសង្ស័យ២នាក់ខាងលើ ស្ថិតក្រោមការអង្កេតបទល្មើសជាក់ស្តែងរបស់ភ្នាក់ងារសម្ងាត់របស់អាវុធហត្ថ ក្រោយពីស៊ើបអង្កេតដឹងថា ពួកគេពាក់ព័ន្ធនឹងចែកចាយប្រើប្រាស់នូវសារធាតុញៀនខុសច្បាប់។
លោកបន្តថា ក្រោយពីស្រាវជ្រាវដឹងថា ពួកគេមានការពាក់ព័ន្ធក្នុងករណីខាងលើនោះ សមត្ថកិច្ចបានរៀបចំវិធានញុះញង់លក់ ទិញ ទើបឈានដល់ការឃាត់ខ្លួន ជនសង្ស័យទាំង២នាក់រួម និង វត្ថុតាងថ្នាំញៀន៣គ្រាប់កន្លះ ប្រភេទមេតំហ្វេតាមីន (WY) ខណៈជនសង្ស័យធ្វើសកម្មភាព នាំយកគ្រឿងញៀនទៅបក្សពួកគេ ក្រោយសាកសួរ ទើបឈានទៅធ្វើការឡោមព័ទ្ធផ្ទះ ដែលជាអ្នកចែកចាយ និង ឃាត់ខ្លួនបានស្ត្រីម្នាក់ទៀតបញ្ជូនទៅកាន់ទីបញ្ជាការអាវុធហត្ថខេត្ត។
បច្ចុប្បន្នជនសង្ស័យទាំង២នាក់រួមនឹងវត្ថុតាងថ្នាំញៀន ត្រូវបានអាវុធហត្ថរៀបចំសំណុំរឿងបញ្ជូនខ្លួនទៅកាន់តុលាការ ដើម្បីចាត់ការបន្តទៅតាមនីតិវិធីច្បាប់៕
បន្ទាប់ពីឡោមព័ទ្ធរួចឃាត់ខ្លួនជនសង្ស័យ២នាក់ពាក់ព័ន្ធ និង ចែកចាយគ្រឿងញៀន
0 Comments