ប្រទេសចិន បានអនុញ្ញាតឲ្យមានការទូទាត់ដោយផ្ទាល់រវាងប្រាក់យ័ន និងប្រាក់ហ្វ្រង់ស្វីស នៅក្នុងការខិតខំមួយបន្ថែមទៀត ដើម្បីជំរុញវត្ដមានរបស់រូបិយប័ណ្ណជាតិរបស់ខ្លួន នៅលើឆាកពិភពលោក ដោយធ្វើឲ្យប្រាក់នេះអាចចាយបានដោយសេរី។
ធនាគារប្រជាជនចិន PBOC បាននិយាយនៅក្នុងសេចក្ដីថ្លែងការណ៍មួយថា ដោយការចាប់ផ្ដើមឱ្យដំណើការនៅថ្ងៃអង្គារ រូបិយប័ណ្ណទាំងពីរនេះអាចត្រូវបានជួញដូរដោយផ្ទាល់ នៅលើប្រព័ន្ធពាណិជ្ជកម្មប្តូរប្រាក់បរទេសរបស់ចិន។ កាលពីមុន អ្នកជំនួញត្រូវប្ដូររូបិយប័ណ្ណនេះ តាមរយៈប្រាក់ដុល្លារអាមេរិក និងថា នីតិវិធីនេះ អាចបន្ថែមទៅលើការចំណាយប្រតិបត្តិការ។
ធនាគារ PBOC បានបន្ដថា នេះគឺជាជំហានដ៏សំខាន់មួយនៅក្នុងការពង្រឹងទំនាក់ទំនងសេដ្ឋកិច្ច និងពាណិជ្ជកម្មទ្វេភាគី រវាងចិន និងស្វីស។ យោងទៅតាមធនាគារនេះបានឲ្យដឹងថា ទង្វើនេះនឹងកាត់បន្ថយតម្លៃប្ដូរប្រាក់សម្រាប់ប្រទេសទាំងពីរ។ បច្ចុប្បន្ន រូបិយប័ណ្ណសកលសំខាន់ៗដូចជា ដុល្លារអាមេរិក ដុល្លារអូស្ដ្រាលី និងដុល្លារញូវហ្សឺឡែន ប្រាក់ផោនអង់គ្លេស ប្រាក់យេនជប៉ុន និងប្រាក់អឺរ៉ូ ព្រមទាំងប្រាក់រូបរបស់រុស្ស៊ី អាចត្រូវបានប្ដូរដោយផ្ទាល់ទៅជាប្រាក់យ័ន។
ធនាគារកណ្ដាលរបស់ប្រទេសចិន និងប្រទេសស្វីស បានចុះហត្ថលេខាលើកិច្ចព្រមព្រៀងមួយ នៅក្នុងខែមករា ដើម្បីបង្កើតមជ្ឈមណ្ឌលប្ដូរប្រាក់យ័ន នៅទីក្រុងហ្សូរិច ដើម្បីបង្កើនចំនួននៃកិច្ចការប្ដូរប្រាក់យ័ននៅអឺរ៉ុប។ នៅក្នុងឆ្នាំ២០១៤ ធនាគារទាំងឡាយបានចុះហត្ថលេខាលើកិច្ចព្រមព្រៀងរយៈពេល ៣ឆ្នាំ ស្ដីពីការប្ដូររូបិយប័ណ្ណ ដែលមានទឹកប្រាក់ ២៤ ពាន់លានដុល្លារ (១៥០ពាន់លានយ័ន) ដើម្បីជំរុញវិស័យពាណិជ្ជកម្ម។ ធនាគារកណ្ដាលរបស់ប្រទេសចិន បានចាប់ផ្ដើមនូវប្រព័ន្ធបង់ប្រាក់សកលមួយ កាលពីខែកន្លងមក ដើម្បីផ្ដល់ការធ្វើជំនួញឆ្លងកាត់ព្រំដែនជាប្រាក់យ័ន។ ប្រព័ន្ធនេះត្រូវបានគេរំពឹងថា នឹងកាត់បន្ថយដ៏សំខាន់នូវតម្លៃ និងពេលវេលាសម្រាប់ការផ្ទេរប្រាក់។
ប្រាក់យ័ន បានក្លាយទៅជារូបិយប័ណ្ណ ដែលគេចាយវាយបំផុតលំដាប់ថ្នាក់ទី៤ សម្រាប់ការបង់ប្រាក់ឆ្លងកាត់ព្រំដែននៅក្នុងខែសីហា ដោយមានប្រទេសជាង ១០០ ចាយវានៅក្នុងកិច្ចការជំនួញ។ ប្រទេសចិន ក៏កំពុងតែតម្រង់គោលដៅបញ្ចូលប្រាក់យ័នទៅក្នុងឋានៈរូបិយប័ណ្ណបម្រុងរបស់អង្គការមូលនិធិរូបិយវត្ថុអន្ដរជាតិ(IMF) ផងដែរ។ កាលពីខែកន្លងមក IMF បានផ្ដល់នូវសញ្ញាថា ខ្លួនហៀបនឹងបើកភ្លើងខៀវ ដើម្បីបញ្ចូលប្រាក់យ័នចិនទៅក្នុងក្រុមរូបិយប័ណ្ណបម្រុងនេះហើយ។ IMF នឹងសម្រេចនៅក្នុងខែនេះអំពីថា តើនឹងពង្រីកសមាសភាពរូបិយប័ណ្ណបច្ចុប្បន្ន មានប្រាក់ដុល្លារអាមេរិក ប្រាក់អឺរ៉ូអឺរ៉ុប ប្រាក់យេនជប៉ុន និងប្រាក់ផោនអង់គ្លេស ក្នុងសិទ្ធិដកប្រាក់ពិសេស SDR ដោយបន្ថែមប្រាក់យ័ន ឬក៏យ៉ាងណានោះទេ៕
RT
ក្រុងប៉េកាំង អនុញ្ញាតឲ្យមានការប្ដូរដោយសេរី រវាងប្រាក់យ័ន និងប្រាក់ ហ្វ្រង់ស្វីស
0 Comments