សៀមរាប ៖ នគរបាលប្រឆាំងគ្រឿងញៀនខេត្តបានសហការជាមួយកម្លាំងនគរបាលអង្គភាពការពារបេតិកភណ្ឌធ្វើការសកម្មភាពចុះបង្ក្រាបករណីជួញដូរនូវសារធាតុញៀន។ ហេតុការណ៍ចុះបង្ក្រាបករណីគ្រឿងញៀននេះធ្វើឡើងកាលពីវេលាម៉ោង១៧និង០០នាទី ថ្ងៃទី១៧ ខែកុម្ភៈ ឆ្នាំ២០១៥ ស្ថិតនៅចំណុចរុនតាដេវ ក្នុងភូមិចុងគោកចាន់ សង្កាត់គោកចក ក្រុង-ខេត្តសៀមរាប។
លោកវរសេនីយ៍ទោ អ៊ុំ សាអាត នាយការិយាល័យនគរបាលប្រឆាំងគ្រឿងញៀននៃស្នងការនគរបាលខេត្តបានសហការជាមួយកម្លាំងនគរបាលអង្គភាពការពារបេតិកភណ្ឌប្រាប់ថា ក្នុងការចុះបង្ក្រាបករណីខាងលើនេះ កម្លាំងជំនាញបានឈានដល់ធ្វើការឃាត់ខ្លួនបានជនសង្ស័យម្នាក់ រួចក៏ឈានដល់ធ្វើការឆែកឆេរក្នុងខ្លួនជនសង្ស័យរកឃើញថ្នាំញៀន រួចបន្តទៅឆែកនៅក្នុងផ្ទះឃើញវត្ថុតាងមួយចំនួនធំ។ លោកបន្តថា ជនសង្ស័យម្នាក់នេះមានឈ្មោះ ផែន ញ៉ាញ់ ភេទប្រុស អាយុ២៩ឆ្នាំមុខរបរលក់សៀវភៅនៅមុខអង្គរតូច រស់នៅភូមិនគរក្រៅ សង្កាត់គោកចក ក្រុងសៀមរាប(ជួញដូរ)ធ្លាប់ជាប់គុកជាង១ឆ្នាំនៅថ្ងៃទី១ ខែមករា ឆ្នាំ២០១៣ ពីបទជួញដូរគ្រឿងញៀន ហើយចេញមកវិញនៅថ្ងៃទី០១ ខែកក្កដា ឆ្នាំ២០១៤ ដកហូតបានវត្ថុតាងរួមមាន ម្សៅមេតំហ្វេតាមីនចំនួន១កញ្ចប់ទម្ងន់ស្មើនិង២,១ក្រាម ទូរស័ព្ទដៃចំនួន១៧គ្រឿង,ម៉ូតូសេ១២៥១គ្រឿងពណ៌ខ្មៅឆ្នាំ២០១១ គ្មានស្លាកលេខ,កាំបិតស្នៀត១,WY១ចំហៀងគ្រាប់,និងឧបករណ៍សម្រាប់វេចខ្ចប់មួយចំនួនធំ។ បច្ចុប្បន្នជនសង្ស័យខាងលើ រួមនឹងវត្ថុតាង ត្រូវបានកម្លាំងជំនាញកសាងសំណុំរឿងបញ្ជូនទៅតុលាការនៅព្រឹកថ្ងៃទី១៩ ខែកុម្ភៈ ឆ្នាំ២០១៥ ដើម្បីចាត់ការតាមនីតិវិធីច្បាប់៕
គឿនវ៉េត
0 Comments