ភ្នំពេញ ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា រសៀលថ្ងៃទី១១ ខែធ្នូ បានអនុញ្ញាតឱ្យលោក An Tong Chun អនុប្រធានសភាប្រជាជនជាន់ខ្ពស់ នៃសាធារណរដ្ឋប្រជាមានិតប្រជាធិបតេយ្យកូរ៉េ ចូលជួបសម្តែងការគួរសម ខណៈដែលលោកដឹកនាំគណៈប្រតិភូមកចូលរួមមហាសន្និបាតសភាតំបន់អាស៊ី APA លើកទី៨ ដែលកម្ពុជារៀបចំជាម្ចាស់ផ្ទះ។
លោក កែវ ពិសិដ្ឋ អ្នកនាំពាក្យរដ្ឋសភាបានឱ្យដឹងក្រោយជំនួបនោះថា ក្នុងជំនួបនេះសម្តេចបានសម្តែងការស្វាគមន៍យ៉ាងកក់ក្ដៅដល់លោកលោក An Tong Chun អនុប្រធានសភាប្រជាជនជាន់ខ្ពស់ នៃសាធារណរដ្ឋប្រជាមានិតប្រជាធិបតេយ្យកូរ៉េ និងគណៈប្រតិភូ ដែលបានអញ្ជើញមកចូលរួមមហាសន្និបាតសភាតំបន់អាស៊ីលើកទី៨នៅកម្ពុជានាពេលនេះ។ នេះជាការរួមចំណែកឱ្យមហាសន្និបាត APAលើកទី៨ នៅកម្ពុជាទទួលបានជោគជ័យ។ សម្តេចបានលើកឡើងថា ប្រទេសយើងទាំងពីរកម្ពុជា និងសាធារណរដ្ឋប្រជាមានិតប្រជាធិបតេយ្យកូរ៉េ ធ្លាប់មានទំនាក់ទំនងជាមួយគ្នា ជាយូរណាស់មកហើយ តាំងពីជំនាន់អតីតព្រះករុណា សម្តេចព្រះរតនកោដ នរោត្តម សីហនុ ជាមួយអតីតប្រមុខដឹកនាំកូរ៉េ គឺលោកសេនាប្រមុខ គីម អ៊ីលស៊ុង។ ទំនាក់ទំនងនេះគឺជាមោទនភាពសម្រាប់អ្នកជំនាន់ក្រោយបន្តឱ្យបានល្អប្រសើរនេះកាន់តែរឹងមាំខ្លាំងក្លាថែមទៀត។ ជាមួយនេះដែរសម្តេចក៏បានអបអរសាទរ និងវាយតម្លៃខ្ពស់ចំពោះកិច្ចសហប្រតិបត្តិការរវាងរដ្ឋាភិបាលនៃប្រទេសទាំងពីរ ដែលបានបន្តកិច្ចសហប្រតិបត្តិការជាមួយគ្នាទាំងក្នុងក្របខ័ណ្ឌទ្វេភាគី ពហុភាគី ធ្វើយ៉ាងណាគាំទ្រគ្នាទៅវិញទៅមកលើឆាកអន្តរជាតិ។ ទន្ទឹមនេះសម្តេចក៏បានអបអរសារទរនិងវាយតម្លៃខ្ពស់ចំពោះការរីកចម្រើនឥតឈប់ឈររបស់សាធារណរដ្ឋប្រជាមានិតប្រជាធិបតេយ្យកូរ៉េ ដែលសម្រេចបានក្នុងការកសាង និងអភិវឌ្ឍន៍ជាតិទទួលបានយ៉ាងត្រចះត្រចង់។ រដ្ឋសភាកម្ពុជាគាំទ្ររាល់ការជំរុញកិច្ចសហប្រតិបត្តិការល្អបន្ថែមទៀតរវាងរដ្ឋាភិបាលប្រទេសទាំងពីរ។ ជាពិសេស កិច្ចប្រជុំរវាងគណៈកម្មាធិការចំរុះប្រទេសទាំងពីរកម្ពុជា-កូរ៉េស្តីពីកិច្ចសហប្រតិបត្តិការ លើវិស័យសេដ្ឋកិច្ច ពាណិជ្ជកម្ម វិទ្យាសាស្ត្រ និងបច្ចេកទេស ដោយជំរុញឱ្យរដ្ឋាភិបាលប្រទេសទាំងពីរបន្តកិច្ចសហប្រតិបត្តិការនេះបន្ថែមទៀត។ ជាមួយគ្នានេះដែរសម្តេចក៏បានផ្តាំផ្ញើនូវការសាកសួរសុខទុក្ខចំពោះលោក គីម យូណាម ប្រធានសភាជាន់ខ្ពស់ប្រជាជនកូរ៉េ និងថ្នាក់ដឹកនាំជាន់ខ្ពស់នៃសាធារណរដ្ឋប្រជាមានិតប្រជាធិបតេយ្យកូរ៉េ សូមជួបតែជោគជ័យថ្មីៗបន្ថែមទៀតក្នុងការអភិវឌ្ឍ និងកសាងសង្គមជាតិ។
លោក An Tong Chun អនុប្រធានសភាប្រជាជនជាន់ខ្ពស់ នៃសាធារណរដ្ឋប្រជាមានិតប្រជាធិបតេយ្យកូរ៉េ បានថ្លែងអំណរគុណចំពោះរដ្ឋសភាកម្ពុជា ដែលបានទទួលស្វាគមន៍គណៈប្រតិភូកូរ៉េយ៉ាងរាក់ទាក់កក់ក្តៅ ក្រោមស្មារតីសាមគ្គីភាព មិត្តភាពដ៏ជិតស្និទ្ធបំផុត។ លោកក៏បានអបអរសាទរដែលសភាកម្ពុជា បានទទួលជាម្ចាស់ផ្ទះរៀបចំមហាសន្និបាតAPAលើកទី៨នាពេលនេះ។ លោកក៏បានអបអរសាទរផងដែរចំពោះសម្ដេចប្រធាន ដែលត្រូវមហាសន្និបាតជ្រើសរើសជាប្រធាន APA លើកទី៨ ក្នុងអាណត្តិ២០១៥-២០១៦។ លោកបានលើកឡើងថា ប្រទេសនានាលើសកលលោកបានដឹងហើយថា កម្ពុជា-សាធារណរដ្ឋកូរ៉េមានទំនាក់ទំនងជាមួយគ្នាជាយូរមកហើយ ដែលទំនាក់ទំនងដ៏ល្អនេះស្ថាបនាឡើងដោយអតីតប្រមុខដឹកនាំរបស់លោកសេនាប្រមុខគីមអ៊ីលស៊ុង ជាមួយនិងព្រះករុណាសម្តេចព្រះរតនកោដ នរោត្តស៊ីហនុ ។ លោកបន្ថែមថា សព្វថ្ងៃលោកសេនាប្រមុខគីម ចុងអ៊ុន បានយកចិត្តទុកដាក់ក្នុងការបន្តជំរុញទំនាក់ទំនងមិត្តភាពរវាងកម្ពុជា-កូរ៉េនេះឱ្យឱ្យកាន់តែរឹងមាំខ្លាំងក្លាថែមទៀត។ សភាជាន់ខ្ពស់ប្រជាជនកូរ៉េ សូមវាយតម្លៃខ្ពស់ចំពោះកិច្ចខិតខំប្រឹងប្រែងរបស់សម្តេចប្រធានក្នុងការបន្តរួមចំណែកពង្រឹងទំនាក់ទំនងកិច្ចសហប្រតិបត្តិការប្រទេសទាំងពីរជាពិសេស រវាងស្ថាប័ននីតិប្បញ្ញត្តិប្រទេសទាំងពីរ។ ប្រពៃណីដ៏ល្អប្រសើរនេះត្រូវបានបន្តជំរុញឱ្យទំនាក់ទំនងនេះកាន់តែមានការរីកចម្រើនឡើង។ លោកថ្លែងថា សភាកូរ៉េជាធម្មតាពុំសូវបានទៅចូលរូមសន្និបាតAPAនៅឯប្រតេសផ្សេងៗ ដោយឡែកដោយសារតែមហាសន្និបាតលើកនេះ កម្ពុជាធ្វើជាម្ចាស់ផ្ទះ ដូច្នេះហើយលោកបានដឹកនាំគណៈប្រតិភូសភាប្រជាជនជាន់ខ្ពស់កូរ៉េមកចូលរួមនាពេលនេះ។ លោកបញ្ជាក់ថា ប្រទេសយើងទាំងពីរកម្ពុជា-សាធារណរដ្ឋប្រជាមានិតប្រជាធិបតេយ្យកូរ៉េមិនគ្រាន់តែមានទំនាក់ទំនងផ្នែកការទូតនោះទេប៉ុន្តែ ទំនាក់ទំនងសេដ្ឋកិច្ច វប្បធម៌ និងបច្ចេកទេសនឹងត្រូវបានយកចិត្តទុកដាក់បន្តពង្រឹងពង្រីកបន្ថែមទៀត។ ប្រជាជនកូរ៉េបានស្គាល់ច្បាស់សម្តេចប្រធានរដ្ឋសភា ព្រោះថា សម្តេចប្រធានបានលះបង់ទាំអកម្លាំងកាយ ចិត្ត ដើម្បីធ្វើយ៉ាងណាឱ្យមានភាពរុងរឿងប្រទេសជាតិ។ លោកសង្ឃឹមថា ទំនាក់ទំនងកិច្ចសហប្រតិបត្តិការរវាងប្រទេសយើងទាំងពីរត្រូវបានបន្តឱ្យកាន់តែរឹងមាំខ្លាំងក្លាថែមទៀត។
លោកក៏បានអញ្ជើញសម្តេចប្រធានអញ្ជើញទៅធ្វើទស្សនកិច្ចជាផ្លូវការនៅសាធារណរដ្ឋប្រជាមានិតប្រជាធិបតេយ្យកូរ៉េផងដែរ។ ជាការឆ្លើយតបបានទទួលយកនូវការអញ្ជើញនេះ ហើយចាំរើសពេលវេលាសមស្របណាមួយសម្តេចនឹងដឹកនាំគណៈប្រតិភូទៅធ្វើទស្សនកិច្ចនៅប្រទេសកូរ៉េ៕
អនុប្រធានសភាប្រជាជនជាន់ខ្ពស់កូរ៉េខាងជើងអបអរសាទរ ចំពោះសម្តេចប្រធានរដ្ឋសភា ដែលបានទទួលធ្វើជាប្រធានសភាAPA លើកទី៨
0 Comments