ភ្នំពេញ ៖ បុរសម្នាក់ដែលគេស្គាល់ថា ជាចុងភៅនៅភោជនីយដ្ឋានបណ្តែតទឹកអាល់ហ្វាមេគង្គ ដេកស្លាប់នៅក្នុងបន្ទប់ជួល ដែលសមត្ថកិច្ចអះអាងថា ជនរងគ្រោះស្លាប់ដោយសារខ្យល់គខណៈដេកក្នុងបន្ទប់ជួលម្នាក់ឯងគ្មានអ្នកណាដឹង។
ហេតុការណ៍នេះមានការភ្ញាក់ផ្អើលកាលពីល្ងាចថ្ងៃទី១០ខែធ្នូឆ្នាំ២០១៥ នៅក្នុងបន្ទប់ជួលលេខ១៤ ផ្លូវកែវចិន្តាក្រុមទី៨ ភូមិ៣ សង្កាត់ខណ្ឌជ្រោយចង្វារ ខណៈមិត្តភក្តិជាចុងភៅដូចគ្នាបាត់មិនឃើញទៅធ្វើការ ក៏នាំគ្នាមករកដល់បន្ទប់ជួលក៏ឃើញទ្វារជាប់គន្លឹះខាងក្នុង ពេលគាស់ទ្វារមើលឃើញជនរងគ្រោះដេកស្លាប់រឹងទៅហើយ រួចក៏ប្តឹងសមត្ថកិច្ចមកពិនិត្យ។
ជនរងគ្រោះត្រូវបានគេស្គាល់ឈ្មោះ កៅ សាអែម អាយុ៣១ឆ្នាំ មុខរបរជាចុងភៅហាងអាល់ហ្វាមេគង្គ សព្វថ្ងៃស្នាក់នៅទីតាំងកើតហេតុខាងលើ មានស្រុកកំណើតភូមិវាល ឃុំស្ពឺ ស្រុកចំការលើខេត្តកំពង់ចាម។
បើតាមមិត្តភក្តិជនរងគ្រោះនិយាយថា ជនរងគ្រោះធ្លាប់ទៅធ្វើការជាចុងភៅជាមួយគ្នារាល់ថ្ងៃតែនៅថ្ងៃកើតហេតុបាត់គេមិនឃើញមកធ្វើការ ក៏ទូរសព្ទ័រក តែតេចូលរហូតមិនមានអ្នកលើក ពេលនោះមានការសង្ស័យ ក៏នាំគ្នាមករកដល់បន្ទប់ក៏ឃើញទ្វារជាប់គន្លឹះខាងក្នុង ហើយឃើញកង្ហារនៅវិល ពេលនោះក៏សម្រេចចិត្តគាស់ទ្វារមើលស្រាប់តែឃើញជនរងគ្រោះដេកស្លាប់រឹងទៅហើយ រួចក៏ប្តឹងសមត្ថកិច្ចមកពិនិត្យ។
បន្ទាប់សមត្ថកិច្ចបច្ចេកទេសពិនិត្យ ធ្វើកោសល្យវិច័យបញ្ជាក់ថា ជនរងគ្រោះស្លាប់ដោយគាំងបេះដូង ដែលខ្មែរយើងនិយមហៅថាខ្យល់គស្លាប់ មិនមានចំណុចសង្ស័យផ្សេងឡើយ រួចក៏ទាក់ទងហៅក្រុមគ្រួសារដឹកយកទៅធ្វើបុណ្យតាមប្រពៃណីនៅស្រុកកំណើត៕
បុរសម្នាក់ដេកស្លាប់ក្នុងបន្ទប់ជួលសមត្ថកិច្ចអះអាងថាខ្យល់គ
0 Comments