ភ្នំពេញ ៖ គណៈរដ្ឋមន្ត្រីបាន ធ្វើការអនុម័ត ទៅលើសេចក្ដីព្រាងអនុក្រឹត្យ ស្ដីពីការដាក់ឱ្យអនុវត្តប្លង់គោលប្រើប្រាស់ដីរាជធានីភ្នំពេញ ក្នុងសម័យប្រជុំពេញអង្គរបស់ខ្លួន នាព្រឹកថ្ងៃទី ១១ ខែធ្នូ ឆ្នាំ២០១៥ ក្រោមអធិបតីភាព ដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា។
ក្រោយថ្ងៃរំដោះ៧ មករា ឆ្នាំ១៩៧៩ ទីក្រុងភ្នំពេញបានស្តារ និងកសាងឡើងវិញជាបន្តបន្ទាប់រដ្ឋាភិបាលនៅពេលនោះបានចាប់ផ្តើមពីស្ថានភាព ដែលមានតែបាតដៃទទេ ខិតខំប្រឹង ប្រែងអស់ពីសមត្ថភាព ដែលបេសកកម្មចម្បង គឺធានាការពារឱ្យការរស់ឡើងវិញរបស់ប្រជាជន ពោលគឺការរត់ប្រណាំងរវាងសេចក្តីស្លាប់ និងភាពរស់រានឡើងវិញក្នុងដំណាក់កាលទី១ ចន្លោះពីឆ្នាំ ១៩៧៩-១៩៩២ ការស្តារប្រព័ន្ធហេដ្ឋារចនាសម្ព័ន្ធឡើងវិញក្នុងដំណាក់កាលទី២ នៅចន្លោះឆ្នាំ១៩៩៣-២០០៣ ហើយបច្ចុប្បន្ននេះ គឺជាដំណាក់កាលគិតពីចក្ខុវិស័យអភិវឌ្ឍន៍ដោយចីរភាព។
ក្រោមកិច្ចខិតខំប្រឹងប្រែងជាបន្តបន្ទាប់របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានដាក់ចេញនូវការកែទម្រង់ពីសេដ្ឋកិច្ចផែនការ មកជាសេដ្ឋកិច្ចទីផ្សារសេរី បានបង្កលក្ខណៈឲ្យមានការស្តារឡើងវិញ និងការរីកចម្រើនលើគ្រប់វិស័យ។ ដោយឡែក រាជធានីភ្នំពេញបានទទួលការអភិវឌ្ឍន៍យ៉ាងលឿនហួសពីការស្មាន។ ប៉ុន្តែទន្ទឹមនឹងនេះ ទីក្រុងភ្នំពេញក្នុងពេលបច្ចុប្បន្ន ក៏បាននឹងកំពុងជួបប្រទះនឹងបញ្ហាប្រឈមថ្មីៗជាច្រើនដូចជាកំណើនប្រជាជនខ្ពស់រហូតដល់២,៣៤% (ប្រហែលជិតមួយម៉ឺនគ្រួសារក្នុងមួយឆ្នាំ) ចំនួនប្រជាជនសរុបនៅភ្នំពេញមានជិត២លាននាក់ (១.៦៨៨.០៤៤នាក់តាមការធ្វើអង្កេតចន្លោះជំរឿនប្រជាសាស្ត្រកម្ពុជាឆ្នាំ២០១៣ នៃក្រសួងផែនការ) និងមានដង់ស៊ីតេប្រមាណជា២៤៦៨នាក់/គម២ ហើយអាចកើនដល់៣លាននាក់នៅឆ្នាំ២០២០។
ដំណើរនគរូបនីយកម្ម និងកំណើនការសាងសង់សំណង់ធំៗថ្មីៗជាច្រើន (សំណង់អគារខ្ពស់លើសពី៥ជាន់មានប្រមាណ៦២៨កន្លែង និងសំណង់បុរីមានជាង១១០ទីតាំង) ពង្រាយនៅទាំងខណ្ឌក្នុងក្រុង និងជាយក្រុង និងបានជំរុញការរីកទីក្រុង ទៅតំបន់ខាងក្រៅ ចេញពីខណ្ឌកណ្តាលក្រុងស្ទើរតែហួសពីព្រំប្រទល់រដ្ឋបាលរបស់ខ្លួន។ ជាមួយគ្នានេះ ចំនួនមធ្យោបាយដឹកជញ្ជូន (ចំនួនរថយន្តប្រមាណជា៣៤ម៉ឺនគ្រឿង និងទោចក្រយានយន្តមានជាង១.៧លានគ្រឿង) និងកំពុងបន្តកើនឡើងជារៀងរាល់ថ្ងៃ បង្កការកកស្ទះចរាចរណ៍ និងការបំពុលបរិស្ថានគួឱ្យកត់សម្គាល់ពីមួយថ្ងៃទៅមួយថ្ងៃ។
ប្លង់គោលប្រើប្រាស់ដីរាជធានីភ្នំពេញឆ្នាំ២០៣៥ ជាឯកសារយុទ្ធសាស្ត្រគោល បម្រើឲ្យមហិច្ឆតារបស់រាជរដ្ឋាភិបាលក៏ដូចជាសាលារាជធានីភ្នំពេញ មានគោលដៅ និងទស្សនវិស័យដល់ឆ្នាំ២០៣៥ ក្នុងការគ្រប់គ្រងតម្រង់ទិសការអភិវឌ្ឍន៍សេដ្ឋកិច្ច ក្នុងព្រំប្រទល់រដ្ឋបាលរាជធានី និងតំបន់ទីប្រជុំជនពាក់ព័ន្ធទាំងឡាយនៅជាប់ជុំវិញ ឆ្លើយតបនឹងកំណើននៃការវិនិយោគឯកជន និងប្រជាជនក្នុងរាជធានី តាមរយៈការតម្រង់ទិស និងជុំការវិនិយោគសាធារណៈស្របតាមរបបសេដ្ឋកិច្ចទីផ្សារសេរី និងការអភិវឌ្ឍន៍តាមបែបប្រជាធិបតេយ្យថ្នាក់ក្រោមជាតិ។
បម្រើគោលដៅខាងលើ ប្លង់គោលនេះនឹងតម្រង់ទិសការអភិវឌ្ឍន៍ហេដ្ឋារចនាសម្ព័ន្ធគាំទ្រធំៗ ប្រព័ន្ធផ្លូវ ប្រព័ន្ធទឹកស្អុយ ទឹកស្អាត បឹង កំពង់ផែ ព្រលានយន្តហោះ ឧទ្យាន និងលំហបៃតង ការរៀបចំគោលនយោបាយលំនៅដ្ឋាន ការអភិរក្សបេតិកភណ្ឌទីក្រុង តាមរយៈការការពារបរិស្ថាន និងការធ្វើតុល្យកម្មនៃការប្រើប្រាស់ធនធានធម្មជាតិ និងបង្កើតឲ្យមានផែនការគ្រប់គ្រងមួយច្បាស់លាស់នៃធនធានដី ទឹក ថាមពល ប្រព័ន្ធអេកូឡូស៊ី ព្រៃឈើ រ៉ែ។ល។ និងការកំណត់ទីតាំងបរិក្ខារសាធារណៈចាំបាច់នានា ជាមួយការកំណត់ត្រឹមឆ្នាំ ២០២០ យ៉ាងយូរជាឆ្នាំនៃការផ្ទៀងផ្ទាត់ និងការធ្វើការកែសម្រួលឡើងវិញ។
ក្នុងចក្ខុវិស័យដល់ឆ្នាំ២០៣៥ ភ្នំពេញសម័យតេជោ រាជធានីភ្នំពេញជាបេះដូងរបស់ប្រទេសកម្ពុជា ជាមជ្ឈមណ្ឌល នយោបាយ សេដ្ឋកិច្ច ពាណិជ្ជកម្ម វប្បធម៌ ប្រកបដោយសក្តានុពលប្រកួតប្រជែង និងមានការអភិវឌ្ឍប្រកបដោយវឌ្ឍនភាព សមធម៌ និងចីរភាព នៅទីតាំងភូមិសាស្ត្រពិសេសនៃទន្លេចតុមុខដែលជាអត្តសញ្ញាណតែមួយគ្មានពីរ៕
គណៈរដ្ឋមន្ត្រីអនុម័តប្លង់គោលប្រើប្រាស់ដីរាជធានីភ្នំពេញ
0 Comments