ពោធិ៍សាត់ ៖ យ៉ាងហោចណាស់ក៏មានមនុស្សបីនាក់រងរបួស (ធ្ងន់ពីរ និងស្រាលម្នាក់) ដែរ ដោយសារតែភ្លើងឆាបឆេះ ពួកគេពេលដែលព្យាយាមចូលយកអីវ៉ាន់ និងពន្លត់ភ្លើងកំពុងឆេះតូបចាប់ហួយរបស់ខ្លួន ក្រោយពីម្ចាស់ចាក់សាំងលក់ឲ្យគេ ហើយមានការផ្ទុះសេខ្សែភ្លើងនោះ។
ហេតុការណ៍នេះបានកើតឡើងនៅវេលាម៉ោង៤និង៣០នាទីទៀបភ្លឺថ្ងៃទី១១ ខែធ្នូ ឆ្នាំ២០១៥ ស្ថិតក្នុងភូមិផ្លូវលួង ឃុំកញ្ជរ ស្រុកកណ្ដៀង ខេត្តពោធិ៍សាត់។
លោកហែម សុផល នាយប៉ុស្តិ៍នគរបាលឃុំកញ្ជរ បានស្រង់សម្ដីម្ចាស់តូបលក់អីវ៉ាន់ឈ្មោះ ឆេង គឹមតឹង អាយុ៦១ឆ្នាំ រស់នៅភូមិខាងលើ ដែលបានរៀបរាប់ថា ផ្ទះគាត់រស់នៅ ដែលត្រូវភ្លើងឆេះនេះជាតូបតៀមជាប់ដីធ្វើពីដែក ទំហំ ៥គុណ៨ ប្រក់និងបាំងជញ្ជាំងស័ង្កសី ហើយនៅម៉ោងខាងលើ គ្រួសារគាត់បាននាំគ្នាភ្ញាក់ពីដំណេក រួចងើបចាក់សាំងលក់ឲ្យគេ ក៏ផ្ទុះសេខ្សែភ្លើង ឆាបឆេះនៅក្នុងផ្ទះនោះ។ ដោយឃើញស្ថានភាពបែបនេះ គ្រួសារគាត់ បាននាំគ្នាព្យាយាមយកសម្ភារៈ និងពន្លត់អគ្គីភ័យ រហូតត្រូវភ្លើងឆាបឆេះរលេះរលួយខ្លួនរបួសធ្ងន់ពីរនាក់ និងរបួសស្រាលម្នាក់។ ចំណែកអីវ៉ាន់ចាប់ហួយ សំលៀកបំពាក់ សំបុត្រកំណើត២សន្លឹក លុយដុល្លារ និងលុយខ្មែរសរុប១៦លានរៀលក៏ត្រូវអគ្គិភ័យឆាបឆេះអស់ដែរ។
អ្នករបួសបីនាក់ទី១.ឈ្មោះ សេង គឹម ហ៊ួយ អាយុ២៦ឆ្នាំ ភេទប្រុស ទី២.ឈ្មោះ នាង សុខន អាយុ ៥៨ឆ្នាំ ភេទស្រី(អ្នកទាំង២ រងរបួសធ្ងន់) និងទី៣. ឈ្មោះ សេង គឹមពៅ អាយុ១៨ឆ្នាំ ភេទប្រុសរងរបួសស្រាល។ អ្នកទាំងអស់នៅភូមិកើតហេតុខាងលើ ហើយត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ៕
ទុស្សេខ្សែភ្លើងឆេះរបួស៣នាក់ និងឆេះសម្ភារៈរួមទាំងលុយ១៦លានរៀល
0 Comments