កំពង់ធំ ៖ លោក ឈុន ឈន់ ប្រធានក្រុមប្រឹក្សាខេត្តកំពង់ធំ បានអញ្ជើញជាអធិបតីក្នុងពិធីទិវាជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣ ព្រឹកថ្ងៃទី ១១ ខែធ្នូ ឆ្នាំ ២០៥។ដោយមានអ្នកចូលរួមប្រមាណជាង៣០០នាក់។ បន្ទាប់ពីសុន្ទរកថាស្វាគមន៍របស់ លោក អ៊ាប ឈុនស្រ៊ាង អនុប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តនិងការអាននូវសារលិខិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយ ឯកឧត្ដម គង់ វិមាន អភិបាលរងខេត្ត រួចមក។ មានមតិសំណេះសំណាលលោក ឈុន ឈន់ បានលើកឡើងថា រាល់ឆ្នាំនាថ្ងៃទី ៣ ខែ ធ្នូ គឺ ជាថ្ងៃដែលអង្គការសហប្រជាជាតិបានកំណត់ជាទិវាជនពិការអន្តរជាតិ។
ក្នុងឆ្នាំ ២០១៥នេះ គឺជាខួបលើកទី៣៣ នៃទិវាជនពិការអន្តរជាតិ និងខួបលើកទី១៧ នៃទិវាជនពិការកម្ពុជាយើងហើយមានប្រធានបទ គឺ រួមគ្នាបង្កលក្ខណងាយស្រួលដល់ជនពិការដើម្បីបរិស្ថានគ្មានពិការភាព។ លោកបានបន្តទៀតថា ប្រទេសកម្ពុជាបានឆ្លងកាត់សង្គ្រាម និងរបបប្រល័យពូជសាសន៍ ដែលបន្សល់ទុកនូវផលវិបាកជាច្រើនក្នុងនោះមានអត្រាជនពិការខ្ពស់ណាស់ ក្រៅពីនោះប្រជាពលរដ្ឋក៏ត្រូវរងគ្រោះមួយចំនួន ដែលនាំឲ្យមានពិការភាពដូចជា រងគ្រោះថ្នាក់ដោយចរាចរ គ្រោះថ្នាក់ដោយសារគ្រាប់មីន និងកាកសំណល់ជាតិផ្ទុះដែលសេសសល់ពីសង្គ្រាម គ្រោះថ្នាក់ការងារពិការតាំងពីកំណើតចាស់ជរាខ្វះអាហារ និងមូលហេតុផ្សេងៗទៀត ។ ទន្ទឹមនេះរដ្ឋាភិបាល ដែលមានសម្ដេចអគ្គសេនាបតីតេជោ ហ៊ុន សែន ជាប្រមុខ បានយកចិត្តទុកដាក់ខ្ពស់អំពីជនពិការដោយមានកម្មវិធីយុទ្ធសាស្ត្រដើម្បីដាក់បញ្ចូលជាយុទ្ធសាស្ត្រសំខាន់ៗ ដើម្បីឆ្លើយតបទៅនឹងតម្រូវការរបស់ជនពិការសំដៅលើកកម្ពស់ស្ថានភាពរស់នៅរបស់ជនពិការឲ្យកាន់តែប្រសើរឡើង និង ចូលរួមរាល់សកម្មភាពក្នុងសង្គម ដែលជាការលើកទឹកចិត្តយ៉ាងខ្លាំងដល់បងប្អូនជនពិការ។
ចុងក្រោយលោកបានផ្ដាំផ្ញើដល់បងប្អូនជនពិការ ទាំងអស់ខិតខំបង្កើនសមត្ថភាពរបស់ខ្លួនតាមរយៈចលនាកីឡា សិល្បៈវប្បធម៌ដើម្បីរួមចំណែកក្នុងការថែរក្សាអភិវឌ្ឍន៍សេដ្ឋកិច្ចស្របតាមពាក្យថា ពិការភាពនៅលើរាង្គកាយ តែទឹកចិត្តមិនពិការទេ។ កម្មវិធីចប់បន្ទាប់ពីគណៈអធិបតីចែកអំណោយជានិម្មិតរូបដល់ជនពិការចំនួន១០រូបផងដែរ ៕
ខេត្តកំពង់ធំប្រារព្ធពិធីជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣
0 Comments