សៀមរាប ៖ ដោយមើលឃើញពីការលំបាករបស់ពលរដ្ឋក្រក្រី កងរាជអាវុធហត្ថខេត្តបានធ្វើសកម្មភាពមនុស្សធម៌ ដោយបាននាំអំណោយ និងគ្រឿងឧបភោគបរិភោគមួយចំនួនដល់ពលរដ្ឋក្រក្រីនៅសង្កាត់ទឹកវិល ក្រុងសៀមរាប កាលពីថ្ងៃទី០៨ ខែធ្នូនេះ។
លោកវរសេនីយ៍ត្រី ឡុង ចាន់រិទ្ធ នាយរងមន្ទីរស្រាវជ្រាវបទល្មើសព្រហ្មទណ្ឌ នៃកងរាជអាវុធហត្ថខេត្តសៀមរាបបានឲ្យដឹងថា ក្រោមការផ្ដល់ឱវាទជាប្រចាំលើកិច្ចការសប្បុរសធម៌ពីលោក ឧត្ដមសេនីយ៍ត្រី ប៉ោ វណ្ណនិត ដែលជាមេបញ្ជាការ នៃកងរាជអាវុធហត្ថខេត្តសៀមរាបបាននាំយកអំណោយមនុស្សធម៌មួយចំនួនទៅចែកជូនពលរដ្ឋក្រីក្រជួបការលំបាក។
លោកបន្តថា គ្រួសារទីទាល់ក្រចំនួន០២គ្រួសារ ត្រូវបានក្រុមការងារមនុស្សធម៌របស់អាវុធហត្ថខេត្តនេះស្រាវជ្រាវរកឃើញ និងបាននាំយកអំណោយមួយចំនួនទៅចែកជូនដល់លំនៅឋានរបស់ពួកគាត់តែម្ដង។
គ្រួសារក្រីក្រទាំងនេះមាន ១-ក្រុមគ្រួសាររបស់លោក ស៊ួត ស៊ុត និងភរិយា ដែលមានកូនក្នុងបន្ទុកដល់ទៅ១២នាក់ បច្ចុប្បន្នរស់នៅភូមិទឹកថ្លា សង្កាត់ទឹកវិល ក្រុងសៀមរាប ខេត្តសៀមរាបទទួលបានអំណោយរួមមាន អង្ករ១បាវ ,មី១កេស ,ទឹកក្រូច១យួរ ,ទឹកត្រី១យួរ ,ទឹកស៊ីអ៊ីវ១យួរ និងត្រីខ១យួរ។ បន្ថែមលើនេះទៅទៀតក៏មានដូចជា អំបិល ស្ករស ប្រេងឆា ប៊ីចេង សាប៊ូ នំធុង សារុង ប្រេងកូឡា ព្រមទាំងថវិកាចំនួនដប់ម៉ឺនរៀលផងដែរ។ ២-ក្រុមគ្រួសាររបស់លោកយាយ ជួប ថន និងកូនស្រី ដែលមានលំនៅដ្ឋានក្នុងភូមិបន្ទាយឈើ សង្កាត់ទឹកវិល ក្រុងសៀមរាប ខេត្តសៀមរាប។ លោកយាយ ជួប ថន គាត់មានជំងឺប្រចាំកាយ ចំណែកឯកូនស្រីនោះទៅទៀត ក៏មានសតិមិនល្អផងដែរ។ គ្រួសារនេះទទួលបានអំណោយរួមមាន ផ្ទះ១ខ្នង ទំហំ៣ម៉ែត្រ ៤ជ្រុង,អង្ករ២ការុង,មី១កេស,ទឹកក្រូច១យួរ ,ទឹកត្រី១យួរ ,ទឹកស៊ីអ៊ីវ១យួរ និងត្រីខ១យួរ។
លើសពីនេះទៅទៀតក៏មានផងដែរនូវអំបិល ស្ករស ប្រេងឆា សារុង ប៊ីចេង សាប៊ូ នំធុង អាវ មុង កន្ទេល ប្រេងកូឡា ព្រមទាំងសម្ភារៈសម្រាប់ផ្ទះបាយ១ឈុត និងថវិកាចំនួន២០ម៉ឺនរៀល។
ទន្ទឹមគ្នានោះដែរ ពលរដ្ឋបានថ្លែងអំណរគុណចំពោះកងរាជអាវុធហត្ថខេត្តដែលបានជួយរួមចំណែកដល់ពលរដ្ឋដែលមានការខ្វះខាតក្នុងជីវភាពប្រចាំថ្ងៃឲ្យកាន់តែប្រសើរឡើងវិញ៕
ការងារមនុស្សធម៌ គឺជាការចាំបាច់ដែលកម្លាំងអាវុធហត្ថធ្វើទៅបាន
0 Comments