បាត់ដំបង ៖ យុវជនម្នាក់ ដែលស្លៀកពាក់ឯកសណ្ឋានជា កម្លាំងនគរបាលជាតិ ដោយមានគ្រងឈុតត្រឹមត្រូវ ត្រូវបានកម្លាំងក្រុមបង្ការ បង្ក្រាបនៃស្នងការដ្ឋាននគរបាលខេត្តបាត់ដំបង ដែលជាកម្លាំងពិត ធ្វើការឃាត់ខ្លួននាំយកទៅកាន់ការិយាល័យដើម្បីសាកសួរ បន្ទាប់ពីមានប្រជាពលរដ្ឋប្តឹង និងរាយការណ៍ជាច្រើនលើកច្រើនសា ស្តីពីសកម្មភាពរបស់ក្រុមខ្លាហោះក្លែងក្លាយនេះរួចមក។
ក្រោយពីទទួលបានព័ត៌មានស្តីពីការសង្ស័យទៅលើបុគ្គលមួយរូប ដែលតែងតែធ្វើខ្លួននិងស្លៀកពាក់ឯកសណ្ឋានយ៉ាងត្រឹមត្រូវ ជាកងកម្លាំងនគរបាលជាតិ ផ្នែកក្រុមអន្តរាគមន៍ពិសេសរួចមក កម្លាំងបង្ការ បង្ក្រាប បានចេញប្រតិបត្តិការតាមឃ្លាំមើលអស់រយៈពេលជាច្រើនថ្ងៃដើម្បីតាមរកមុខសញ្ញានេះ។
ទីបំផុតជននេះបានបង្ហាញខ្លួននៅលើតូបប្រជាការពារ ដែលស្ថិតនៅខាងមុខវិទ្យាល័យសោហឺ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង កាលពីវេលាម៉ោង៩និង១០នាទីព្រឹក ថ្ងៃទី១ ខែធ្នូ ឆ្នាំ២០១៥ ទើបសមត្ថកិច្ចបាននាំខ្លួនយកទៅកាន់ការិយាល័យព្រហ្មទណ្ឌកម្រិតស្រាលដើម្បីសាកសួរអំពីបញ្ហានេះ ដោយនៅលើខ្លួនប្រាណយុវជនរូបនេះ មានស្លៀកពាក់ឯកសណ្ឋានឈុតខ្មៅ ដោយនៅពីក្រោយខ្នងមានដាក់អក្សរថា ស្នងការដ្ឋាននគរបាលខេត្តបាត់ដំបង ក្រុមបង្ការ បង្ក្រាប ហើយនៅចង្កេះគឺមានខ្នោះដៃមួយគូដាក់ក្នុងស្រោម ស្រោមកាំភ្លើងខ្លីមួយដោយមានកាំភ្លើងខ្លីមួយដើម( ជ័រ ) វិទ្យុទាក់ទងចំនួនពីរគ្រឿង ស្រោមបង់កាំភ្លើងខ្លីចំនួនពីរ និងប័ណ្ណសំគាល់ខ្លួនរបស់មន្ត្រីនគរបាលជាតិមួយសន្លឹក ដោយមានចុះហត្ថលេខាដោយលោកស្នងការនគរបាលក្រុងស ថេត ថែមទៀតផង ដោយបានបញ្ជាក់ថា រូបគេមានឈ្មោះ ណុប រស្មី ភេទប្រុស អាយុ២១ឆ្នាំ រស់នៅភូមិ១៣មករា សង្កាត់ព្រែកព្រះស្តេច ក្រុងបាត់ដំបង ជាសមាជិកក្រុមអន្តរាគមន៍ពិសេស លេខ៤៧១ ជំនាន់ទី២១ ក្រុមបង្ក្រាបខ្នាតធំ ដោយមានសុពលភាពរហូតដល់ឆ្នាំ២០១៨ ទើបផុតកំណត់។
នៅចំពោះមុខសមត្ថកិច្ចជននេះបានសារភាពថា ការបោះពុម្ពលើសម្លៀកបំពាក់គឺធ្វើឡើងនៅទីតាំងបោះពុម្ពក្បែរផ្សារបឹងឈូក ដោយឡែកប័ណ្ណសំគាល់ខ្លួន គឺគេបានលួចច្នៃធ្វើដោយខ្លួនឯង ដោយមិនបានពិចារណាទើបមានការខុសដូចជា លោកស្នងការខេត្តទៅជាលោកស្នងការនគរបាលក្រុងទៅវិញ។
នៅទីបំផុត ដោយយល់ឃើញថា ជននេះគឺត្រូវជាក្មួយរបស់មន្ត្រីនគរបាលចរាចរមួយរូបទើបលោកស្នងការ សម្រេចឲ្យធ្វើការអប់រំ ណែនាំ និងធ្វើកិច្ចសន្យាដោយបានដកហូតនូវសម្ភារៈទាំងអស់រួចឲ្យវិលត្រឡប់ទៅលំនៅដ្ឋានវិញ៕
ឃាត់ខ្លួនប៉ូលិសក្លែងក្លាយលួចបន្លំខ្លួនជាក្រុមខ្លាហោះ
0 Comments