ភ្នំពេញ ៖ បុរសជនជាតិម្នាក់បានរងរបួសបែកក្បាល និងបាក់ដៃឆ្វេងម្ខាង ដោយសារតែត្រូវរថយន្តឡិចស៊ីសRx300 ដែលបើកបរដោយបុរសជនជាតិបារាំងម្នាក់បានបើកកៀរម៉ូតូម៉ាកfino បណ្ដាលឲ្យដួលរបួសធ្ងន់ជនជាតិចិនម្នាក់ ហើយព្យាយាមបើករត់ដល់ចំណុចស្ពាន់អាកាសតិចណូ ក្នុងមូលដ្ឋានខណ្ឌទួលគោក ទើបសមត្ថកិច្ចឃាត់បាន។
ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី០៨ ខែធ្នូ ឆ្នាំ២០១៥ នៅចំណុចមុខក្រសួងការពារជាតិ តាមបណ្ដោយផ្លូវមហាវិថីសហព័ន្ធរុស្សី ក្នុងសង្កាត់ស្រះចក ខណ្ឌដូនពេញ។
ប្រភពព័ត៌មានពីកន្លែងកើតហេតុបានឲ្យដឹងថា នៅវេលាកើតហេតុ គេឃើញរថយន្តម៉ាកឡិចស៊ីសRx300 ពាក់ស្លាកលេខភ្នំពេញ២s-៤៧៥៦ បើកបរដោយបុរសចំណាស់ជនជាតិបារាំងម្នាក់ រួមដំណើរជាមួយកូនស្រី២នាក់ ធ្វើដំណើរតាមមហាវិថីសហព័ន្ធរុស្សី ក្នុងទិសដៅពីលិចទៅកើត លុះមកដល់ចំណុចកើតហេតុ បើកប៉ះកៀរនឹងម៉ូតូម៉ាកfino ពណ៌ទឹកក្រូច ពាក់ស្លាកលេខភ្នំពេញ១z-២៦១០ បើកបរដោយបុរសជនជាតិចិន ដែលធ្វើដំណើរតាមទិសគ្នា បណ្ដាលឲ្យដួលរបួសបែកក្បាល និងបាក់ដៃឆ្វេងម្ខាង។
ប្រភពព័ត៌មានបានបន្តទៀតថា ខណៈពេលរថយន្តបើកកៀរម៉ូតូឲ្យរបួសធ្ងន់ហើយនោះរថយន្តបង្កមិនបានឈប់មើល ឬទទួលខុសត្រូវនោះទេ ហើយបែរជាព្យាយាមបើករត់រហូតចំណុចក្រោមស្ពានអាកាសតិចណូ ទើបសមត្ថកិច្ចឃាត់បានទាំងរថយន្ត និងម្ចាស់រថយន្តឲ្យមកទទួលខុសត្រូវក្នុងហេតុការណ៍គ្រោះថ្នាក់នោះ។
បច្ចុប្បន្នជនរងគ្រោះត្រូវបាននគរបាលចរាចរណ៍បញ្ជូនទៅសង្គ្រោះភ្លាមៗ ចំណែកម្ចាស់រថយន្ត រួមទាំងរថយន្ត ត្រូវសមត្ថកិច្ចឃាត់ខ្លួនដើម្បីដោះស្រាយតាមនីតិវិធី៕
ជនជាតិបារាំងបើកឡិចស៊ីសប៉ះកៀរម៉ូតូដួល របួសជនជាតិចិនម្នាក់
0 Comments