អ្នកការទូតបាននិយាយកាលពីថ្ងៃចន្ទថា ប្រទេសរុស្ស៊ីបានស្នើឲ្យក្រុមប្រឹក្សាសន្តិសុខអង្គការសហប្រជាជាតិរៀបចំកិច្ចពិភាក្សាបិទទ្វារទាក់ទងនឹងសកម្មភាពយោធារបស់ប្រទេសទួរគីនៅក្នុងប្រទេសស៊ីរី និងអ៊ីរ៉ាក់ ដែលនេះជាសញ្ញាចុងក្រោយបំផុតនៃការបង្កើនភាពតានតឹងរវាងទីក្រុងមូស្គូ និងទីក្រុងអង់ការ៉ា។
អ្នកការទូតម្នាក់បានប្រាប់ Reuters ថា “យើងមិនមានសេចក្ដីលំអិតនោះទេ ប៉ុន្តែរុស្ស៊ីបានស្នើឲ្យពិភាក្សាអំពីបញ្ហានៃសកម្មភាពរបស់ទួរគី នៅក្នុងប្រទេសអ៊ីរ៉ាក់ និងប្រទេសស៊ីរី”។
អ្នកការទូតដដែលបាននិយាយបន្តថា កិច្ចពិភាក្សានេះត្រូវបានគេរំពឹងថា នឹងធ្វើឡើង បន្ទាប់ពីកិច្ចប្រជុំបិទទ្វាររបស់សមាជិកទាំង១៥ប្រទេសនៃក្រុមប្រឹក្សាលើបញ្ហានានា ដែលមិនទាក់ទងនឹងបញ្ហានេះដោយចាប់ផ្តើមនៅវេលាម៉ោង៣រសៀលថ្ងៃអង្គារ។
សហរដ្ឋអាមេរិក ដែលជាប្រធាននៃក្រុមប្រឹក្សាសន្តិសុខនៅខែនេះនឹងធ្វើជាប្រធានកិច្ចពិភាក្សា។
ក្រុមមន្ត្រីទួរគីបាននិយាយថា យន្តហោះរុស្ស៊ីដែលខ្លួនបានបាញ់ទម្លាក់នោះគឺបានរំលោភលើដែនអាកាសរបស់ប្រទេសទួរគី ហើយត្រូវបានព្រមានម្តងហើយម្តងទៀត។ ប៉ុន្តែក្រុងមូស្គូបាននិយាយថា យន្តហោះនេះគឺស្ថិតនៅលើប្រទេសស៊ីរីជាកន្លែង ដែលប្រទេសរុស្ស៊ីកំពុងបន្តយុទ្ធនាការអាកាសដើម្បីគាំទ្រកងកម្លាំងរបស់លោកប្រធានាធិបតី បាសា អាល់អាសាដ នៅក្នុងសង្គ្រាមស៊ីវិលរយៈពេលជិតប្រាំឆ្នាំ។
ដោយឡែកប្រទេសអ៊ីរ៉ាក់ក៏បានចោទប្រកាន់ទួរគីផងដែរថា បានរំលោភលើដែនអធិបតេយ្យភាពរបស់ខ្លួន ដោយការដាក់ពង្រាយកងកម្លាំងប្រដាប់អាវុធធុនធ្ងន់ទៅកាន់ជំរំមួយនៅជិតសមរភូមិជួរមុខនៅភាគខាងជើងប្រទេសអ៊ីរ៉ាក់កាលពីសប្ដាហ៍មុន។ អ៊ីរ៉ាក់បានគំរាមថា ខ្លួននឹងបញ្ជូនករណីនេះទៅកាន់ក្រុមប្រឹក្សាសន្តិសុខ លុះត្រាតែទួរគីដកកងទ័ពរបស់ខ្លួនចេញ។
ជាមួយគ្នានោះ ប្រទេសទួរគីបាននិយាយកាលពីថ្ងៃចន្ទថា ខ្លួននឹងមិនដកទាហានរាប់រយនាក់ដែលបានមកដល់កាលសប្ដាហ៍មុនចេញពីមូលដ្ឋាននៅភាគខាងជើងប្រទេសអ៊ីរ៉ាក់នោះទេ បើទោះជាត្រូវបានបញ្ជាដោយទីក្រុងបាដាដឲ្យដកពួកគេចេញក្នុងរយៈពេល៤៨ម៉ោងក៏ដោយ។
រដ្ឋាភិបាលទីក្រុងអង់ការ៉ាបាននិយាយថា កងទ័ពនៅទីនោះគឺជាផ្នែកមួយនៃបេសកកម្មអន្តរជាតិដើម្បីហ្វឹកហ្វឺន និងបំពាក់ដល់កងកម្លាំងអ៊ីរ៉ាក់ ដើម្បីប្រយុទ្ធប្រឆាំងនឹងក្រុមរដ្ឋឥស្លាម។ ប៉ុន្តែរដ្ឋាភិបាលអ៊ីរ៉ាក់បាននិយាយថា ខ្លួនមិនដែលបានអញ្ជើញកងកម្លាំងបែបនេះទេ៕
AFP
រុស្ស៊ីស្នើឲ្យក្រុមប្រឹក្សាសន្តិសុខអង្គការសហប្រជាជាតិពិភាក្សាពីសកម្មភាពរបស់ទួរគី ក្នុងប្រទេសស៊ីរី និងអ៊ីរ៉ាក់
0 Comments