ខណៈពេលដែលកិច្ចពិភាក្សាស្ដីពីកិច្ចព្រមព្រៀងអាកាសធាតុសកលបានចូលដល់ពេលចុងក្រោយដ៏មានសារៈសំខាន់ក្នុងទីក្រុងប៉ារីសនៅសប្ដាហ៍នេះ រដ្ឋមន្ត្រីមកពី១៩៥ប្រទេសកាលពីយប់ថ្ងៃចន្ទបាននិយាយម្ដងម្នាក់អំពីភាពបន្ទាន់នៃការឈានដល់កិច្ចព្រមព្រៀងមួយដែលសមរម្យចំពោះគ្រប់ភាគីទាំងអស់។
ប៉ុន្តែការបែកបាក់ត្រូវបានលាតត្រដាងជាថ្មីម្តងទៀត នៅក្នុងសេចក្ដីថ្លែងការណ៍របស់រដ្ឋមន្ត្រីការបរទេស និងបរិស្ថានដែលបានចូលរួមកិច្ចពិភាក្សានៅខាងក្រៅទីក្រុងប៉ារីស បន្ទាប់ពីអ្នកចរចាថ្នាក់ទាបបានប្រគល់ពង្រាងកិច្ចព្រមព្រៀងមួយកាលពីចុងសប្ដាហ៍ស្ដីពីបញ្ហាសំខាន់ៗមួយចំនួននៅមិនទាន់ដោះស្រាយបាន។
រដ្ឋមន្ត្រីការបរទេសបារាំងលោក Laurent Fabius បាននិយាយនៅពេលពិធីបើកកិច្ចពិភាក្សាអាកាសធាតុកម្រិតខ្ពស់មួយថា “គោលបំណងនិងតម្រូវការគឺច្បាស់លាស់។ យើងត្រូវការកិច្ចព្រមព្រៀងអាកាសធាតុជាសកលមួយ”។
ដោយឡែករដ្ឋមន្ត្រីក្រសួងបរិស្ថាន និងធនធានទឹកសឹង្ហបុរីលោក Masagos Zulkifli បានអំពាវនាវឲ្យមានការចូលរួមជាសកលនៅក្នុងកិច្ចព្រមព្រៀងថ្មីនេះ។
លោកបាននិយាយថា “យើងមិនគួរមើលស្រាលសក្ដានុពលនៃកិច្ចព្រមព្រៀងជាសកល ដែលភ្ជាប់គ្រប់ភាគីទាំងអស់នៃអនុសញ្ញា (អនុសញ្ញាក្របខ័ណ្ឌសហប្រជាជាតិស្ដីពីការប្រែប្រួលអាកាសធាតុ ឬ UNFCCC) ដើម្បីអនុវត្តសកម្មភាពអាកាសធាតុនោះទេ”។
រដ្ឋមន្ត្រីក្រសួងនេះបាននិយាយថា ប្រទេសសឹង្ហបុរីបានប្ដេជ្ញាចិត្តក្នុងការប្រយុទ្ធប្រឆាំងនឹងការប្រែប្រួលអាកាសធាតុ ហើយថា សាធារណរដ្ឋមួយនេះបានសន្យានឹងកាត់បន្ថយអាំងតង់ស៊ីតេការបំភាយឧស្ម័ន៣៦ភាគរយពីកម្រិតឆ្នាំ២០០៥នៅឆ្នាំ២០៣០។
លោក Masagos បានឲ្យដឹងទៀតថា បើទោះបីជាប្រទេសសឹង្ហបុរីជាអ្នកបញ្ចេញតូចមួយ (០,១១ ភាគរយនៃការបំភាយពិភពលោក) ក៏ដោយ យើងនឹងបន្តការរួមចំណែកកិច្ចសហប្រតិបត្តិការបច្ចេកទេសនិងចែករំលែកបទពិសោធន៍ការអភិវឌ្ឍប្រកបដោយនិរន្តរភាពរបស់យើង។ លោកបានបន្តទៀតថា ប្រទេសសិង្ហបុរីបានបណ្តុះបណ្តាលមន្ត្រីជិត ១១ ០០០ នាក់មកពីប្រទេសកំពុងអភិវឌ្ឍក្នុងបញ្ហាការប្រែប្រួលអាកាសធាតុ។
“វានឹងត្រូវការរយៈពេលច្រើនសប្ដាហ៍”
បញ្ហាចម្រូងចម្រាសជាច្រើននៅតែត្រូវការ ដើម្បីដោះស្រាយរួមទាំងការទទួលខុសត្រូវរបស់ប្រទេសអភិវឌ្ឍន៍ និងប្រទេសកំពុងអភិវឌ្ឍន៍ផងដែរ។
ឯកអគ្គរដ្ឋទូតអាហ្វ្រិកខាងត្បូង Nozipho J Mxakato-Diseko ដែលបាននិយាយក្នុងនាមនៃក្រុមប្រទេសកំពុងអភិវឌ្ឍចំនួន៧៧ និងប្រទេសចិនបានអំពាវនាវកាលពីថ្ងៃចន្ទឲ្យមានការគាំទ្រផ្នែកហិរញ្ញវត្ថុនិងភាពច្បាស់លាស់លើកម្រិតនៃការគាំទ្រផ្នែកហិរញ្ញវត្ថុកាន់តែច្រើនឡើងពីប្រទេសអភិវឌ្ឍន៍ទៅជួយប្រទេសកំពុងអភិវឌ្ឍន៍ ដើម្បីដោះស្រាយជាមួយនឹងការផ្លាស់ប្ដូរអាកាសធាតុ។
ប្រទេសឥណ្ឌា និងបណ្ដាប្រទេសកំពុងអភិវឌ្ឍន៍ធំៗផ្សេងទៀតបានលើកឡើងសិទ្ធិរបស់ពួកគេក្នុងការប្រើប្រាស់ផូស៊ីលឥន្ធនៈ ដើម្បីជំរុញសេដ្ឋកិច្ចរបស់ខ្លួន និងបានអះអាងថា បណ្ដាប្រទេសអភិវឌ្ឍន៍ត្រូវទទួលខុសត្រូវជាប្រវត្តិសាស្ត្រសម្រាប់ការបង្កើនកម្រិតនៃកាបូនឌីអុកស៊ីតនៅក្នុងបរិយាកាស៕
Today
កិច្ចពិភាក្សាបម្រែបម្រួលអាកាសធាតុ ៖ ការបែកបាក់គ្នាបានលាតត្រដាង ខណៈក្រុមមេដឹកនាំធ្វើការលើកិច្ចព្រមព្រៀង
0 Comments