បន្ទាយមានជ័យ ៖ ពលរដ្ឋ និងក្រុមអាជីវករដែលដឹកទំនិញពីក្រុងប៉ោយប៉ែតទៅតាមបណ្ដាស្រុកក្រុង និងបណ្ដាខេត្តផ្សេងៗ បានធ្វើការរិះគន់ទៅលើគយចល័តខេត្តចំណុចផ្លូវ៥០ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ថារាល់ការដឹកទំនិញ មិនថាមាន ឬគ្មានពន្ធទេ សុទ្ធតម្រូវឲ្យបង់លុយក្បាលឡានថ្លៃបាយ និងបង់លុយប្រចាំខែសម្រាប់រថយន្តដឹកទំនិញគេចពន្ធ។
ក្រុមអាជីវករដែលរកស៊ីបង់ពន្ធខាងលើបានឲ្យដឹងទៀតថា សព្វថ្ងៃ ពួកគាត់រកស៊ីមិនសូវបានចំណេញប៉ុន្មានទេ ព្រោះត្រូវបង់លុយថ្លៃក្បាលឡាន ឬថ្លៃបាយ ទើបអាចទៅបាន តែបើឈ្មួញរកស៊ីគេចពន្ធវិញ ត្រូវបង់ជាជើង ឬបង់ជាខែឲ្យក្រុមគយចល័តខេត្តដែលឈរជើងចំណុចផ្លូវ៥០ ទើបពុំមានការបង្ក្រាប និងគ្មានការឈប់ត្រួតពិនិត្យ។ ការឲ្យពួកគាត់បង់លុយគ្រប់ពេលដឹកទំនិញ ដែលការបង់នេះអាចបង់ជាខែក៏បាន ពី១៥០ ទៅ២០០ដុល្លារក្នុងមួយខែ ឬបង់ជាចំនួនជើងរថយន្តក៏បាន ដែលតម្លៃត្រូវបង់ គឺអាស្រ័យលើចំនួនជើងបានដឹក ហើយការបង់នេះដែរ អាចមកបង់ផ្ទាល់នៅស្នាក់ការគយចល័តផ្លូវ៥០ក៏បាន ឬវេតាមវីងក៏បាន។ ក្រៅពីការបង់ខាងលើ ការបង់ថ្លៃបាយទឹកពេលត្រួតពិនិត្យឯកសារ ពីមួយម៉ឺនទៅ២ម៉ឺនរៀល តាមរថយន្តតូច-ធំទោះបីជាទំនិញរបស់ពួកគាត់បង់ពន្ធរួចក៏ដោយ។
គួររំឭកថា កន្លងមក លោក គោស៊ុំ សារឿត អភិបាលខេត្តបន្ទាយមានជ័យបានធ្វើការហាមប្រាមដល់អាជ្ញាធរមានសមត្ថកិច្ចមិនឲ្យមានការដាក់កុងត្រូលជជុះជំរិតទារប្រាក់ពីប្រជាពលរដ្ឋ ព្រោះការដាក់កុងត្រូលជជុះនេះវាជាអំពើខុសច្បាប់។ ហើយចំពោះកុងត្រូលគយដែលកន្លងមកមានច្រើនកន្លែងលោកបានឲ្យបង្រួមឲ្យមានតែមួយ។
ចំពោះបញ្ហានេះវិញ គ្រាន់តែតាមផ្លូវជាតិលេខ៥ ពីប៉ោយប៉ែតមកទីរួមខេត្តបន្ទាយមានជ័យប្រវែងផ្លូវ៤៥គីឡូម៉ែត្រមានកុងត្រូលជជុះរបស់គយចល័តខេត្តដែលធ្វើសកម្មភាពយកលុយពីឈ្មួញដឹកទំនិញគេចពន្ធដល់ទៅបីកន្លែង៕
គ្រប់ទំនិញមានពន្ធ និងគ្មានពន្ធ សុទ្ធតែត្រូវបង់លុយតាមវីង និងដោយផ្ទាល់
0 Comments