កំពង់ស្ពឺ ៖ រមណីយដ្ឋានអំពែភ្នំ ដែលខេត្តកំពង់ស្ពឺចាត់ទុកថា ជាមណ្ឌលកម្សាន្តមួយធំជាងគេក្នុង ខេត្តកកើតឡើងជាយូរឆ្នាំមកហើយ ដោយការវិនិយោគក្រុមហ៊ុនក្នុងស្រុក។
នៅពេលចូលដល់រមណីយដ្ឋានមួយនេះមានទីតាំងជាប់មាត់ស្ទឹង បើយកម៉ូតូចូលត្រូវបង់លុយ២០០០៛ តែបើផ្ញើម៉ូតូយកថ្លៃ១៥០០៛ ហើយមិនសូវមានរោងអង្គុយទទួលទានច្រើនទេ ឃើញតែរោងប្រក់ស្បូវមានស្ថានភាពចាស់ៗខ្លះទៅហើយ ដែលធ្វើឲ្យភ្ញៀវក្នុងស្រុកមានការរិះគន់ទៅនឹងម្ចាស់រមណីយដ្ឋានមួយនេះថា មិនមានភាពទៅមុខ មិនឈានជើងក្នុងការទាក់ទាញភ្ញៀវ ឲ្យបានស្អាតល្អជាងមុនបានច្រើននោះឡើយ។ សូម្បីតែស្ថានភាពស្ពានយោលមានតែឈ្មោះ ពុំមានការកែលំអធ្វើយ៉ាងណាឲ្យទំនើប និងប្រណិតជាងមុន ដោយឃើញតែបន្ទះក្តារក្រាលពុក បាក់ជាច្រើនអន្លើ ហើយខ្សែកាបទ្រាបបាតក្ដារក្រាលក៏មានសភាពច្រេះពុកផុយបណ្ដើរៗហើយដែរ ធ្វើឲ្យអ្នកទស្សនាញញើត នឹងឆ្លងកាត់ស្ពានយោលនេះ ហើយភាគច្រើនមានតែកុមារតូចៗចូលចិត្តដើរឆ្លងកាត់ស្ពានយោលដែលគួរណាម្ចាស់រមណីយដ្ឋានអំពែភ្នំពិនិត្យឡើងវិញខ្លាចក្រែងបាក់ ធ្លាក់ក្មេងៗជាយថាហេតុកើតស្មានមិនដល់នោះឡើយ។
មុននឹងឈានជើងចូលឆ្លងកាត់ស្ពានយោលគឺត្រូវបង់លុយក្នុងម្នាក់៥០០៛ជាមុនសិនទៅដល់បុរសម្នាក់ ដែលម្ចាស់រមណីយដ្ឋានចាត់ឲ្យមកចាំទទួលលុយពីភ្ញៀវអ្នកដំណើរ។ បុរសវ័យចំណាស់ ដែលអង្គុយលើក្បាលស្ពានយោល ហើយមិនប្រាប់ឈ្មោះនោះទេដោយការបញ្ជាក់ថា រូបគាត់ស៊ីឈ្នួលចាំទទួលលុយពីអ្នកដំណើរស៊ីប្រាក់ថ្ងៃក្នុង១ថ្ងៃ១៥០០០៛ ប៉ុណ្ណោះ រីឯរឿងអ្វីៗផ្សេងគាត់អត់ដឹងអ្វីទាំងអស់។
បុរសចំណាស់នោះបន្តថា ក្នុងមួយថ្ងៃៗភ្ញៀវក្នុងស្រុកឆ្លងកាត់ស្ពានយោលនេះប្រមាណជា២០០នាក់។ រមណីយដ្ឋានអំពែភ្នំមាន សួនសត្វដែរ តែភ្ញៀវក្នុងស្រុកនិយមធ្វើដំណើរឆ្លងកាត់ស្ពានយោលទៅត្រើយម្ខាងស្ទឹងឆ្ពោះទៅកាន់ វត្តអំពែភ្នំតែម្តង ដើម្បីទស្សនាហ្វូងសត្វស្វារាប់រយនៅទីនោះបង្កនូវសភាពអ៊ូអរសប្បាយភ្នែកច្រើន ទាំងមនុស្សចាស់ និងក្មេង៕
ភ្ញៀវក្នុងស្រុកទៅកម្សាន្តស្ពានយោលអំពែភ្នំ ១ថ្ងៃជិត២០០នាក់
0 Comments