ប្រដាល់ ៖ អ្នកប្រដាល់ជើងខ្លាំងរបស់កម្ពុជា កែវ រំចង់ ក្លិបកងពលលេខ៨ភ្នំទ្រព្យ បានវាយចាញ់អ្នកប្រដាល់ថៃ Chhleung Det ដោយពិន្ទុ ក្នុងការជួបប្រកួតគ្នានាយប់ថ្ងៃទី១៣ធ្នូ នៅក្នុងព្រឹត្តិការណ៍ប្រដាល់ខ្មែរ-ថៃ លើសង្វៀនបាយ័នស្ទឹងមានជ័យ។
កែវ រំចង់ គេឡើងប្រកួតនេះ ជំនួស បឺត ខាំ អ្នកប្រដាល់ជើងខ្លាំងកម្ពុជា ក្លិបសាលវ័ន្តកីឡា និងជាម្ចាស់ខ្សែក្រវាត់ខារ៉ាបាវវគ្គ២ ដែលជួបគ្រោះថ្នាក់ចរាចរណ៍នោះ។ ហើយអ្នកប្រដាល់ថៃជាគូរបស់ បឺត ខាំ Chhorh Chai Petch Pracha នោះ ក៏ចេញវិញដែរ ដោយដាក់ Chhleung Det ឲ្យប្រកួតជាមួយ កែវ រំចង់ ក្នុងប្រភេទទម្ងន់៦៩គីឡូក្រាម។
អ្នកប្រដាល់ថៃ Chhleung Detនេះ ជាលើកទី២របស់គេហើយដែលជួបប្រកួតជាមួយ កែវ រំចង់នេះ ដែលកាលជួបគ្នាលើកមុន គេវាយស្មើពិន្ទុជាមួយ កែវ រំចង់ តែលើកនេះគេបានឈ្នះ រំចង់ ដោយពិន្ទុ បន្ទាប់ពីប្រកួតគ្នាប្រាំទឹកដោយគ្មានការជក់ចិត្តនោះ។
កែវ រំចង់ និង Chhleung Det ប្រកួតគ្នាដូចលេងៗ ដោយត្រូវអាជ្ញាកណ្ដាល លោក ធី ណារិទ្ធ ព្រមានឲ្យវាយមួយលើកជាពីរលើក ប៉ុន្តែពួកគេទាំងពីរនៅតែប្រកួតមិនអស់ពីសមត្ថភាពដដែល។
ជាចៃដន្យនៅក្នុងទឹកទី៤ Chhleung Det បានទាត់ចូលកញ្ចឹងក រំចង់ មួយ ជើងរាងស្រាលដែរទេ តែត្រូវអាជ្ញាកណ្ដាលរាប់ រំចង់ ៨។ ទោះជាយ៉ាងណាអ្នកប្រដាល់ទាំងពីរវាយគ្នារហូតដល់ចប់ទឹកទី៥ ដោយគ្មានការរំខានពីអាជ្ញាកណ្ដាល និងគណៈកម្មការបច្ចេកទេស ទោះជាពួកគេវាយគ្នារបៀបលេងបង្ហាញក្បាច់គុនក្តី។ អ្នកប្រដាល់ថៃ Chhleung Det ជាអ្នកទទួលបានជ័យជំនះឈ្នះដោយពិន្ទុ។
ចំណែកអ្នកប្រដាល់ថៃឈ្មោះ Jokkie Petch Pracha វិញ ត្រូវអ្នកប្រដាល់កម្ពុជា ចាន់ ស៊ីណាត ក្លិបនិរោធមានជ័យ វាយឲ្យសន្លប់ក្នុងទឹកទី៣ បន្ទាប់ពីត្រូវមួយកែងឆ្វេងរបស់ ស៊ីណាត វាយចំសៀតផ្កានោះ។
Jokkie នៅក្នុងទឹកទី២ បានវាយកែងឲ្យបែកឈាមក្បាល ចាន់ ស៊ីណាត ដែរ តែមិនធ្ងន់ធ្ងរនោះឡើយ គឺ ស៊ីណាត គេនៅតែប្រកួតរហូតមកដល់ទឹកទី៣ បានផ្ដួលអ្នកប្រដាល់ថៃនេះឲ្យសន្លប់ដោយសារកែងវិញ។ សុខ វាសនា អ្នកប្រដាល់ក្លិបឃ្លាំងមឿង បានវាយឈ្នះជើងថ្មី ធន់ ចាន់តាក់ អ្នកប្រដាល់ក្លិបមជ្ឈមណ្ឌលកីឡា ខ.ភ.ម ដោយពិន្ទុ ក្រោយពីវាយគ្នា៥ទឹកពេញនោះ។
*ឡុង សុវណ្ណឌឿន ចាញ់ឡៅ ស៊ីណាត ក្នុងជម្រុះខ្សែក្រវាត់KUBOTA ជុំទី២
ប្រដាល់ ៖ ឡុង សុវណ្ណឌឿន អ្នកប្រដាល់ក្លិបសាលវ័ន្តកីឡា ប្រកួតចាញ់ ឡៅ ស៊ីណាត អ្នកប្រដាល់ក្លិបកងពលតូចទ័ពឆ័ត្រយោង៩១១ដោយពិន្ទុ នៅក្នុងវគ្គជម្រុះខ្សែក្រវាត់Kubota ទម្ងន់៦៩គីឡូក្រាមជុំទី២ នារសៀលថ្ងៃអាទិត្យ ទី១៣ ខែធ្នូ ឆ្នាំ២០១៥នេះដែរ នៅលើសង្វៀនបាយ័នបឹងស្នោ។
ជាមួយនឹងជ័យជំនះនេះ នាំឲ្យ ឡៅ ស៊ីណាត ទទួលបាន៤ពិន្ទុ ក្នុងការប្រកួតពីរលើក ឯសុវណ្ណ ឌឿន គេបានតែ២ពិន្ទុប៉ុណ្ណោះ ក្នុងពីរប្រកួតដែរនោះ។
ឡៅ ស៊ីណាត ឈ្នះ ឡុង សុវណ្ណឌឿន ដោយសារកណ្ដាប់ដៃរបស់គេបានវាយចូលមុខសុវណ្ណឌឿន ច្រើន ធ្វើឲ្យ សុវណ្ណឌឿន ចាញ់ពិន្ទុរបស់ ស៊ីណាត ក្រោយពេលបញ្ចប់ការប្រកួតប្រាំទឹកនោះ។
នេះជាការបរាជ័យលើកទី៤របស់ ឡុង សុវណ្ណឌឿន ហើយ ដែលជួបប្រកួតជាមួយ ឡៅ ស៊ីណាត នេះ។ កាលពីជួបគ្នាក្នុងឆ្នាំ២០១២កន្លងមកនោះ សុវណ្ណឌឿន វាយចាញ់ពិន្ទុ ស៊ីណាត ទាំង៣ដង។
ក្រៅពីគូខ្សែក្រវាត់នេះ រិទ្ធ មុន្នី អ្នកប្រដាល់ក្លិបម្កុដរាជសីហ៍ បានប្រកួតឈ្នះ រឿម វណ្ណះ ក្លិបក្រសួងការពារជាតិជាតិដោយពិន្ទុ ក្រោយពីវាយគ្នាប្រាំទឹកពេញនោះ ។ចំណែក
អ្នកប្រដាល់ក្មេងស្រករក្រោយ ចាន់ សាន់ ក្លិបនិរោធមានជ័យ បានយកឈ្នះអ្នកប្រដាល់ជើងចាស់ គួន សុវណ្ណ ក្លិបសុភានូមានជ័យដោយពិន្ទុ។
ច្រិច កុសល អ្នកប្រដាល់ក្លិបកងពលតូចអន្តរាគមន៍លេខ៨ ប្រកួតចាញ់ សេង សុខចាន់ អ្នកប្រដាល់ក្លិបខេមរខ្លាហោះដោយពិន្ទុ ក្នុងការប្រកួតក្បាច់គុនចម្រុះ។ ឯ ចាន់ ទូច ក្លិបនិរោធមានជ័យ គេបានឈ្នះ កន ហេង ក្លិបសុភានូមានជ័យក្នុងទឹកទី២ ខណៈដែលខ្លួនគេសន្លប់ បន្ទាប់ពី កន ហេង វាយកែងពីក្រោយក្បាលបីបួនកែង ខុសពីលក្ខខណ្ឌប្រកួតដែលហាមមិនឲ្យវាយពីក្រោយនោះ។
*ឯម សាវឿន សងសឹក នេន វណ្ណា មិនបានសម្រេច
ប្រដាល់ ៖ ឯម សាវឿន អ្នកប្រដាល់ជើងខ្លាំងស្រករក្រោយ នៃក្លិបឫទ្ធីពោធិសែនជ័យបានប្រកួតនេន វណ្ណា អ្នកប្រដាល់ក្លិបខ្លារខិនមានរិទ្ធ នៅក្នុងទឹកទី៤ នាល្ងាចថ្ងៃអាទិត្យ ទី១៣ ខែធ្នូ ឆ្នាំ២០១៥នេះ នៅលើសង្វៀនបាយ័នបឹងស្នោ។
ឯម សាវឿន ចាញ់ដោយសារមិនអាចទប់ជាមួយនឹងជង្គង់របស់ នេន វណ្ណា ដែលវាយប្រហារមកលើគេ សឹងតែរាប់ភ្លេចក្នុងការប្រកួត៤ទឹកនោះ។
ចំណែក ម៉ន ចៅក្របី អ្នកប្រដាល់ក្លិបការិយាល័យទី៥ កងទ័ពជើងគោក ប្រកួតចាញ់ ហួន សុខនីម អ្នកប្រដាល់មហិទ្ធិឫទ្ធិតាដំបងដែកក្នុងទឹកទី៣ ខណៈដែល ម៉ន វិរៈ ក្លិបការិយាល័យទី៥ កងទ័ពជើងគោក ឈ្នះ ថន វាសនា ក្លិបនាគរាជមានជ័យដោយពិន្ទុ។
អ្នកប្រដាល់ ម៉ៅ សារ៉ែម អ្នកប្រដាល់ក្លិបនាគរាជមានជ័យដែរ ត្រូវ ចាន់ សុខហួន អ្នកប្រដាល់ជើងចាស់ក្លិបនិរោធមានជ័យ ផ្ដួលឲ្យសន្លប់ក្នុងទឹកទី១ ហើយ ឯម កានិត អ្នកប្រដាល់ក្លិបឫទ្ធីពោធិសែនជ័យ ក៏ត្រូវ ធន់ មករា ក្លិបមជ្ឈមណ្ឌលកីឡា ខ.ភ.ម ផ្ដួលឲ្យសន្លប់ក្នុងទឹកទី១ដែរ។
*បឺត សង្ឃឹម សងសឹក ឡុង ជិន បានសម្រេច ឯម៉ន ចាន់ដារ៉ា ឈ្នះចាន់ រក្សា ទឹក៤
ប្រដាល់ ៖ ម៉ន ចាន់ដារ៉ា អ្នកប្រដាល់ក្លិបការិយាល័យទី៥ កងទ័ពជើងគោក បានផ្ដួល ចាន់ រក្សា អ្នកប្រដាល់ក្លិបអេភូថងកីឡាក្នុងទឹកទី៤ នៅលើសង្វៀនបាយ័នស្ទឹងមានជ័យ នាល្ងាច ថ្ងៃសៅរ៍ ទី១២ ខែធ្នូ ឆ្នាំ២០១៥។
ចាន់ រក្សា ទៅមិនរួចជាមួយជង្គង់របស់ ម៉ន ចាន់ដារ៉ា នោះទេ។ ជាមួយនឹងជង្គង់ ម៉ន ចាន់ដារ៉ា ក៏នៅបញ្ចេញស្នៀតកែងវាយប្រហារ ចាន់ រក្សា ធ្វើឲ្យរក្សាបោះបង់ការប្រកួតតែម្ដង ក្នុងទឹកទី៤នោះ។
បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាក បានសងសឹក ឡុង ជិន អ្នកប្រដាល់ក្លិបខ្លារខិនមានរិទ្ធបានសម្រេច ដោយបានវាយឈ្នះ ឡុង ជិន ដោយពិន្ទុក្រោយពីប្រកួតប្រាំទឹកនោះ។ ចំណែក ឈុន បញ្ញា អ្នកប្រដាល់មកពីក្លិបរ៉ាហាប់ស្វាយប៉ាកដែរនោះ បាន ត្រូវ ឯម ខ្លឹមសរ អ្នកប្រដាល់ក្លិបឫទ្ធីពោធិសែនជ័យ វាយឲ្យចុះចាញ់ក្នុងទឹកទី៣ ហើយ ចាន់ រ៉ាដេត អ្នកប្រដាល់ជើងក្លិបនិរោធមានជ័យ ប្រកួតឈ្នះ ផាត់ សុដា អ្នកប្រដាល់ក្លិបអេភូថងកីឡាដោយពិន្ទុ៕
កែវ រំចង់ ចាញ់ Chhleung Det ស្មើ ខណៈចាន់ ស៊ីណាត ឈ្នះJokkie ក្នុងទឹកទី៣
0 Comments