កំពង់ឆ្នាំង ៖ អាជ្ញាធរ និងប្រជាពលរដ្ឋឃុំស្រែថ្មី ស្រុករលាប្អៀរ ថ្មីៗនេះបានធ្វើការរិះគន់យ៉ាងខ្លាំងចំពោះក្រុមហ៊ុនម៉ៅការដឹកសំរាមនៅក្នុងក្រុងកំពង់ឆ្នាំង ដែលបានយកសំរាមទៅចាក់ចោលពាសវាលពាសកាល និងយ៉ាងអានាធិបតេយ្យតាមដងផ្លូវក្នុងភូមិសន្ទូច និងនៅជើងភ្នំក្នុងភូមិគុលគប់ ដែលមានក្លិនស្អុយអសោច និងគេបានធ្វើការដុតសំរាមហ៊ុយផ្សែងជះក្លិនឈ្ងៀម ប៉ះពាល់ដល់បរិស្ថានរស់នៅ និងសុខភាពរបស់ប្រជាពលរដ្ឋ។
ករណីនេះលោកមេឃុំស្រែថ្មីស្រុករលាប្អៀរបាននិយាយឲ្យដឹងនៅល្ងាចថ្ងៃទី១២ ខែធ្នូ ឆ្នាំ២០១៥ ថានៅតាមផ្លូវកៅស៊ូក្នុងភូមិសន្ទូច ខាងលិចរបងជាប់មជ្ឈមណ្ឌលស៊ីម៉ាក់គេឃើញមានគំនរសំរាមមួយចំនួនស្អុយរលួយ មានរោមមាន់ និងកាកសំណល់ផ្សេងៗ ដែលគេបានលួចចាក់ចោលពាសវាលពាសកាល ធ្វើឲ្យមានការប៉ះពាល់ដល់អ្នក ដែលបានធ្វើដំណើរ និងរស់នៅក្នុងភូមិនោះ។
ដោយឡែកនៅជើងភ្នំក្នុងភូមិគុលគប់វិញ គេបានឃើញមានការចាក់សំរាមយ៉ាងអានាធិបតេយ្យនៅលើដី ដែលមានទំហំប្រមាណជាង២ហិកតា ដោយគ្មានជីករណ្តៅដាក់សំរាមឡើយ ហើយសំរាមទាំងអស់នោះត្រូវបានគេដុតចោលឆេះជារៀងរាល់ថ្ងៃ ធ្វើឲ្យមានក្លិនមានផ្សែងឈ្ងៀម ប៉ះពាល់ដល់បរិស្ថាន និងសុខភាពរបស់ប្រជាពលរដ្ឋ។ ករណីខាងលើនេះគេមិនដែលឃើញស្ថាប័នពាក់ព័ន្ធចុះមកត្រួតពិនិត្យទប់ស្កាត់ ឬដោះស្រាយបញ្ហានោះឡើយ។
លោកមេឃុំស្រែថ្មី និងប្រជាពលរដ្ឋរស់នៅក្នុងភូមិទាំងពីរខាងលើនេះ ស្នើសុំលោកអភិបាលខេត្តកំពង់ឆ្នាំង និងអង្គភាពពាក់ព័ន្ធ មេត្តាជួយចុះមកត្រួតពិនិត្យ នៅក្នុងទីតាំងចាក់សំរាមខាងលើនេះ និងជួយមានវិធានការបន្ទាន់ណាមួយដោះស្រាយផលប៉ះពាល់ជូនប្រជាពលរដ្ឋផង។ កន្លងមកអាជ្ញាធរមូលដ្ឋាន និងប្រជាពលរដ្ឋក៏ធ្លាប់បានដឹងថា អាជ្ញាធរខេត្តមានផែនការរៀបចំជីករណ្តៅដាក់សំរាមដ៏ធំមួយនៅចំណុចជើងភ្នំខាងលើនេះ ប៉ុន្តែផែនការខាងលើនេះមិនដឹងពេលណាគេអនុវត្តន៍នោះឡើយ។
ទាក់ទងនឹងរឿងសំរាមនេះ កាលពីព្រឹកថ្ងៃទី១២ ខែធ្នូ ឆ្នាំ២០១៥នេះ លោក ឈួរ ច័ន្ទឌឿន អភិបាលខេត្តកំពង់ឆ្នាំងបានប្រាប់ឲ្យក្រុមអ្នកកាសែតយើងដឹងថា លោកអរគុណណាស់ចំពោះអ្នកកាសែតយើង ដែលបានរាយការណ៍រឿងនេះជូនលោក នៅក្នុងសប្ដាហ៍បន្ទាប់នេះលោកនឹងចាត់តាំងក្រុមការងារចម្រុះ និងអង្គភាពពាក់ព័ន្ធចុះទៅពិនិត្យករណីនេះ ហើយចាត់វិធានការណ៍ទប់ស្កាត់ និងដោះស្រាយផលប៉ះពាល់ឲ្យបានជូនប្រជាពលរដ្ឋនៅក្នុងមូលដ្ឋានខាងលើ។
លោកអភិបាលខេត្តក៏បានបញ្ជាក់ឲ្យដឹងដែរថា គម្រោងជីករណ្តៅដាក់សំរាមរបស់ខេត្តពិតជាមានមែន ប៉ុន្តែគម្រោងនោះគឺជាជំនួយរបស់ធនាគារមួយ ហើយគម្រោងនេះមិនទាន់ធ្លាក់មកដល់ខេត្តនៅឡើយ ទើបការដោះស្រាយមានការលំបាក និងយឺតយ៉ាវ៕
ប្រជាពលរដ្ឋ និងអាជ្ញាធរឃុំស្រែថ្មី ស្នើសុំលោកអភិបាលខេត្តជួយមានវិធានការណ៍ទប់ស្កាត់ការចាក់សំរាមចោលយ៉ាងអានាធិបតេយ្យ
0 Comments