ព្រៃវែង ៖ មានគ្រោះថ្នាក់ចរាចរណ៍មួយបានកើតឡើងរវាងរថយន្តក្រុងរបស់ក្រុមហ៊ុនហូជីមិញរាជធានីភ្នំពេញ បានបើកបុកលោកតាម្នាក់ដែលជិះកង់ស្លាប់គួរឲ្យអាណោចអាធ័មបំផុត។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីថ្ងៃទី៩ ខែធ្នូ ឆ្នាំ២០១៥ លើកំណាត់ផ្លូវជាតិលេខ១ ស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក ខេត្តព្រៃវែង វេលាម៉ោង៩និង៤០នាទីព្រឹក។
ប្រភពព័ត៌មានពីប្រជាពលរដ្ឋបានឃើញហេតុការណ៍នេះបានឲ្យកម្ពុជាថ្មីដឹងថា មុនពេលកើតហេតុ គេឃើញលោកតាម្នាក់បានជិះកង់ពីទិសខាងលិចទៅកើត លុះពេលមកដល់ចំណុចកើតហេតុនោះ ស្រាបតែមានរថយន្តក្រុងមួយគ្រឿងរបស់ក្រុមហ៊ុនទីក្រុងហូជីមិញរាជធានីភ្នំពេញពាក់ស្លាកលេខ51B.142.26 ទិសដៅស្របគ្នា បានបុកលោកតាចំពីក្រោយយ៉ាងពេញទំហឹងបណ្ដាលឲ្យជនរងគ្រោះបោកក្បាលនឹងថ្នល់ស្លាប់ភ្លាមៗនៅកន្លែងកើតហេតុ។
ពាក់ព័ន្ធករណីគ្រោះថ្នាក់ខាងលើនេះ សមត្ថកិច្ចនគរបាលស្រុកកំពង់ត្របែកបានឲ្យអ្នកយកព័ត៌មានយើងដឹងថា អ្នកបើករថយន្តក្រុងខាងលើមិនត្រូវបានស្គាល់អត្តសញ្ញាណនោះទេ ដោយសារតែរថយន្តនោះដឹកភ្ញៀវទេសចរច្រើន ហើយទំនងអ្នកបើកបរបន្លំខ្លួនជាមួយភ្ញៀវយចុះគេចខ្លួនបាត់តែម្ដង។ ក្នុងនោះដែរ ជនរងគ្រោះខាងលើមានឈ្មោះ ម៉ៅ បាត់ ភេទប្រុស អាយុ៦៨ឆ្នាំ រស់នៅភូមិត្រពាំងរន ឃុំកន្សោមអក ស្រុកកំពង់ត្របែក ខេត្តព្រៃវែង ចំណែកសពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
បច្ចុប្បន្ន កង់ និងរថយន្ត ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកកំពង់ត្របែករង់ចាំដោះស្រាយតាមនីតិវិធីច្បាប់៕
រថយន្តក្រុងហូជីមិញរាជធានីភ្នំពេញបុកមនុស្សស្លាប់ទៀតហើយ(Update)
0 Comments