ភ្នំពេញ ៖ ការដ្ឋានសាងសង់ស្ថានីយបូមទឹកបឹងត្របែក ស្ថិតនៅលើកំណាត់ផ្លូវ២៧១ ជិតច្រមុះជ្រូក ក្បាលថ្នល់ខណ្ឌចំការមន មកដល់ពេលនេះ ការដ្ឋានទាំងមូលសម្រេចបានស្ទើរតែ១០០%ហើយ ពោលគឺនៅក្នុងសប្តាហ៍នេះ នឹងដាក់អោយដំណើរការម៉ូទ័រថ្មី១១គ្រឿង ដែលមានសមត្ថភាពបូមទឹកកើនឡើង៣ដង បើធៀបសមត្ថភាពស្ថានីយបូមទឹកចាស់ ដើម្បីរំដោះទឹកចេញពីភាគខាងត្បូងរាជធានីភ្នំពេញនៅក្នុងរដូវវស្សានេះ។
មន្ត្រីរដ្ឋបាលរាជធានីភ្នំពេញបានឲ្យដឹងថា មកដល់នឹងព្រឹកថ្ងៃទី០៤ មិថុនានេះ ក្រុមការងារជំនាញនៃមន្ទីរសាធារណការ និងដឹកជញ្ជូនរាជធានីភ្នំពេញបាននិងកំពុងធ្វើតេស្តម៉ូទ័របូមទឹកថ្មី ចំនួន ៥គ្រឿងនៅស្ថានីយបឹងត្របែកនេះ ហើយក្នុងសប្តាហ៍នេះ ម៉ូទ័រថ្មីចំនួន ១១គ្រឿង នឹងដាក់អោយដំណើរការទាំងអស់ ដែលមានសមត្ថភាពបូមទឹក ២៣,៣ម៉ែត្រគូបក្នុង១វិនាទី គឺមានន័យថា កម្លាំងវានឹងកើន ៣ដង បើធៀបនឹងសមត្ថភាពស្ថានីយបូមទឹកចាស់។
លោកសាំពិសិដ្ឋប្រធានមន្ទីរសាធារណការ និងដឹកជញ្ជូនរាជធានីភ្នំពេញធ្លាប់បានបញ្ជាក់ហើយថា ស្ថានីយបូមទឹកបឹងត្របែកបានបំពាក់ម៉ូទរ័ថ្មីខ្នាតធំចំនួន១១គ្រឿង។ ម៉ូទរ័ថ្មីនេះ មានសមត្ថភាពបូមទឹក ២៣,៣ម៉ែត្រគូបក្នុង ១វិនាទី គឺកើន ៣ដង ធៀបនឹងស្ថានីយចាស់។
ក្រៅពីកសាងស្ថានីយនេះហើយ រដ្ឋបាលរាជធានីភ្នំពេញក៏បានដំណើរការស្តារ និងបុកស៊ីផាយអមប្រឡាយបឹងត្របែកផងដែរ ដើម្បីបើកមុខទឹកឲ្យហូរបានលឿនក្នុងការនាំទឹកមកផ្គត់ផ្គង់ស្ថានីយបូមបឹងត្របែកឲ្យបានទាន់ពេលវេលា។
បើតាមមន្ត្រីជំនាញរដ្ឋបាលរាជធានីក៏បានបញ្ជាក់ដែរថា កម្ពស់ទឹក ដែលត្រូវតម្កល់ក្នុងប្រឡាយត្រូវមានកម្ពស់៣ម៉ែត្រ៨០ តែបើកម្ពស់ទឹកឡើងដល់៦ម៉ែត្រ១៥ គឺម៉ូទ័របូមថ្មីនេះ អាចដំណើរការបូមដោយស្វ័យប្រវត្តិតែម្តង។ តាមរយៈស្ថានីយបូមទឹកបឹងត្របែកថ្មីនេះ នឹងកាត់បន្ថយការលិចលង់ដោយសារជំនន់ទឹកភ្លៀងនៅក្នុងភូមិសាស្ត្រខណ្ឌ៣ គឺខណ្ឌដូនពេញ,ខណ្ឌ៧មករា និងខណ្ឌចំការមន៕
Source: Kampuchea Thmey Daily
0 Comments