ភ្នំពេញ ៖ តំណាងរាស្ត្រ និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន្ត បានអះអាងថា ចាប់តាំងពីទឹកដីកម្ពុជាក្រោម ត្រូវបានបារាំងប្រគល់ឲ្យវៀតណាម នៅឆ្នាំឆ្នាំ១៩៤៩ មិនដែលមានរដ្ឋាភិបាលខ្មែរណាមួយ បានយកថ្ងៃទី៤ ខែមិថុនា ជាទិវាបាត់បង់ទឹកដីកម្ពុជាក្រោមទេ។
លោក សុខ ឥសាន្ត លើកឡើងបែបនេះ បន្ទាប់ពីតំណាងសហគមន៍ខ្មែរកម្ពុជាក្រោម បានទាមទារឲ្យយកថ្ងៃទី០៤ ខែមិថុនា ជាថ្ងៃបុណ្យជាតិ ដើម្បីកាន់ទុក្ខការបាត់បង់ទឹកដីកម្ពុជាក្រោម។
អ្នកនាំពាក្យរូបនោះលើកឡើងថា បន្ទាប់ពីសភាកូសាំងស៊ីន និងសភាសហភាពបារាំង បានអនុម័តប្រគល់ដែនដីកម្ពុជាក្រោមទៅឲ្យស្តេចបាវដាយ នៃប្រទេសអណ្ណាម លោកប្រធានាធិបតី វ៉ាំងសង់អូរីយ៉ូល នៃប្រទេសបារាំង បានចុះហត្ថលេខាលើក្រឹត្យមួយចុះ ថ្ងៃទី០៤ ខែមិថុនា ឆ្នាំ១៩៤៩ ប្រគល់ដែនដីកម្ពុជាក្រោម រួមទាំងកោះត្រល់ផងទៅឲ្យស្តេចបាវដាយ នៃប្រទេសអណ្ណាម តាំងពីពេលនោះមក។ លោកបញ្ជាក់ថា ក្នុងព្រះរាជបូជនីយកិច្ចរបស់ព្រះករុណា សម្តេចព្រះ នរោត្តម សីហនុ ក្នុងការទាមទារឯករាជ្យ ព្រះអង្គបានទ្រង់ទាមទារតែទឹកដីកម្ពុជា ដែលមានក្រឡាផ្ទៃ១៨១០៣៥ គម២ សព្វថ្ងៃ ដោយមិនមានដែនដីកម្ពុជាក្រោម រួមទាំងកោះត្រល់ផងទេ។
លោក សុខ ឥសាន្ត លើកឡើងទៀតថា ក្រោយបានសម្រេចការទាមទារបានឯករាជ្យជូនមាតុភូមិកម្ពុជារួចហើយ នៅថ្ងៃទី០៩ ខែវិច្ឆិកា ឆ្នាំ១៩៥៣ ព្រះអង្គត្រូវបានប្រជាជនកម្ពុជា ទទួលស្គាល់ព្រះអង្គជាព្រះបិតាឯករាជ្យជាតិរហូតមក។ លោកបន្តថា “ចាប់តាំងពីឆ្នាំ១៩៤៩ រហូតមកដល់ពេលនេះ ប្រទេសកម្ពុជា មានរាជរដ្ឋាភិបាល និងរដ្ឋាភិបាលប្រមាណ៧០ ដែលមិនមានរាជរដ្ឋាភិបាល និងរដ្ឋាភិបាលណាមួយ យកថ្ងៃ០៤ ខែមិថុនា ធ្វើជាទិវាបាត់បង់ដែនដីកម្ពុជាក្រោមឡើយ”។
សូមបញ្ជាក់ថា កាលពីព្រឹកថ្ងៃទី០៤ ខែមិថុនា ឆ្នាំ២០១៨ អង្គការ សមាគម និងពលរដ្ឋខ្មែរកម្ពុជាក្រោម បានរួមគ្នារៀបចំប្រារព្ធខួប៦៩ឆ្នាំ នៃការបាត់បង់ទឹកដីកម្ពុជាក្រោម ដែលពិធីនេះរៀបចំឡើងនៅភូមិគោកឃ្លាង សង្កាត់គោកឃ្លាង ខណ្ឌសែនសុខ រាជធានីភ្នំពេញ ក្រោមអធិបតីភាព ព្រះអង្គម្ចាស់ក្សត្រិយ៍ ស៊ីសុវត្ថិ ពង្សនារីមុនីពង្ស ព្រះរាជតំណាង ព្រះមហាក្សត្រ កម្ពុជា ដោយមានអ្នកចូលរួមប្រមាណ៥០០នាក់ ក្នុងនោះ ព្រះសង្ឃប្រមាណជាង២០០អង្គ។
តាមលោក ថាច់ សេដ្ឋា ប្រធានសហគមន៍ខ្មែរកម្ពុជាក្រោមបានបញ្ជាក់ថា ពិធីនេះត្រូវបានរៀបចំឡើងក្នុងខួប៦៩ឆ្នាំ ដែលអាណាគមបារាំងបានផ្ទេរទឹកដីខ្មែរកម្ពុជាក្រោមទៅឲ្យវៀតណាមគ្រប់គ្រងរហូតមកដល់សព្វថ្ងៃ។ ជាមួយគ្នានោះលោកបានសម្តែងនូវក្តីរីករាយចំពោះពលរដ្ឋខ្មែរកម្ពុជាក្រោម ដែលបានរៀបចំពិធីដូចគ្នានេះ នៅតំបន់នានា ក៏ដូចជាវត្តអារាម។ តាមលោក ថាច់ សេដ្ឋា ទឹកដីខ្មែរកម្ពុជាក្រោមមានផ្ទៃក្រឡា៦៨០៩៦៥ គីឡូម៉ែត្រក្រឡា ហើយបច្ចុប្បន្នខ្មែររស់នៅជាង១៦លាននាក់ មានវត្តព្រះពុទ្ធសាសនាចំនួន៥៦៧វត្ត និងមានព្រះសង្ឃគង់នៅជាង២ម៉ឺនអង្គ។
ជាមួយនឹងការលើកឡើងខាងលើនេះ លោក ថាច់ សេដ្ឋា ក៏ដូចជាតំណាងយុវជនខ្មែរក្រោម បានលើកឡើងជាច្រើនទាក់ទងនឹងប្រវត្តិទឹកដីកម្ពុជាក្រោម ថែមទាំងទាមទារឲ្យយកថ្ងៃទី០៤ មិថុនា ជាទិវាកាន់ទុក្ខទៀតផង៕
Source: Kampuchea Thmey Daily
0 Comments