ភ្នំពេញ ៖ សម្តេចវិបុលសេនាភក្តី សាយ ឈុំ អនុប្រធានគណបក្ស ប្រធានគណៈប្រចាំការអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះជួយរាជធានីភ្នំពេញកាលពីព្រឹកថ្ងៃទី៣ ខែមិថុនា បានជួបសំណេះសំណាលជាមួយសាខាបក្ស ប្រធានអនុសាខាបក្ស ប្រធានក្រុមបក្សចំនួន៥១២៨នាក់នៅខណ្ឌច្បារអំពៅក្នុងគោលបំណងរបស់សម្តេចគឺចង់ជួបសាកសួរសុខទុក្ខដល់សមាជិក សមាជិកក្រុមបក្សដើម្បីផ្លាស់ប្តូយោបល់ទៅវិញទៅមកដើម្បីឈានទៅទទួលជ័យជំនះលើការបោះឆ្នោតសកល ដែលប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ។
សម្តេចបានមានប្រសាសន៍ថា សម្រាប់អាណត្តិនេះ គណបក្សប្រជាជនកម្ពុជារបស់យើងមានលេខរៀងទី២០ ដែលងាយស្រួលចាំ ងាយស្រួលគូស គឺមានលេខរៀងនៅខាងក្រោមគេបំផុតដោយមានរូបសញ្ញាទេវតាបាចផ្កាជាសម្គាល់ទៀតផង ហើយដើម្បីទទួលបានជ័យជំនះនិងមានការគាំទ្រពីប្រជាពលរដ្ឋគឺសមាជិក សមាជិការបស់យើងទាំងអសត្រូវធ្វើអ្វីដែលល្អ និងចេះជួយប្រជាពលរដ្ឋពេលដែលពួកគាត់ជួបការលំបាកដោយពុំប្រកាន់និន្នាការនយោបាយឲ្យសោះ។ សំខាន់ជាងនេះគឺកុំលាបពណ៌ ឬវាយតម្លៃថា ពួកគាត់ជាមនុស្សបក្សនេះ ឬបក្សនោះហើយធ្វើការគាបសង្កត់ទៅលើគាត់ឲ្យសោះ។ ព្រោះថ្នាក់ដឹកនាំគណបក្សប្រជាជនកម្ពុជា ពុំដែលណែនាំឲ្យសមាជិក សមាជិកាធ្វើអំពើអាក្រក់ណាមួយដល់ប្រជាពលរដ្ឋឡើយ។ ដូចនេះហើយ ទើបគណបក្សប្រជាជនកម្ពុជាយើងទទួលបានជ័យជំនះរាល់ការបោះឆ្នោតសកលជារៀងរហូតមក។ ជាមួយគ្នានេះដែរសម្តេចវិបុលសេនាភក្តីបានសង្កត់ធ្ងន់ថា ក្រោយថ្ងៃជ័យជំនះ៧ មករា មានតែគណបក្សប្រជាជនទេ ដែលដឹកនាំប្រទេសតាំងពីបាតដៃទទេរហូតទទួលបានសន្តិភាពទូទាំងប្រទេស មានការអភិវឌ្ឍរីកចម្រើនឥតឈប់ឈរ និងទទួលបានការគាំទ្រពីអន្តរជាតិ។ សមិទ្ធផលជាច្រើនដែលកើតក្រោយថ្ងៃជ័យជម្នះ៧មករា ត្រូវបានថែរក្សាទុក និងបន្តអភិវឌ្ឍសមិទ្ធផលថ្មីៗជាច្រើនទៀតរួមមានផ្លូវ ស្ពានអាកាស ស្ពានឆ្លងកាត់ទន្លេ ផ្លូវក្រោមដី អាគារពាណិជ្ជកម្មខ្ពស់ៗលំដាប់អន្តរជាតិ ផ្សារទំនើប និងសមិទ្ធិផលថ្មីៗជាច្រើនទៀតនិងបន្តកើតមានឡើងនៅទូទាំងប្រទេស។ មានគណបក្សប្រជាជនកម្ពុជាប្រទេសជាតិមានការអភិវឌ្ឍរីកចម្រើនឥតឈប់ឈរ រួមគ្នាថែរក្សាសន្តិភាព ស្ថិរភាពនយោបាយអោយបានរឹងមាំ តាមរយៈការបោះឆ្នោតគាំទ្រគណបក្សប្រជាជនកម្ពុជា៕
Source: Kampuchea Thmey Daily
0 Comments