ភ្នំពេញ ៖ បុរសជាបងថ្លៃស្រវឹងស្រាឡូឡាជេរគេឯង ត្រូវបានអ្នកជិតខាងវាយ និងគំរាម បន្ទាប់មកត្រូវបានគេអះអាងថា ត្រូវប្អូនថ្លៃរបស់ខ្លួនវាយសម្លាប់ លុះដឹងដល់ក្រុមគ្រួសារសព ត្រូវបានគេឆ្លើយបង្វែងដានថាស្លាប់ ដោយសារធ្លាក់ពីលើកង់បី។ ក្រោយពីសមត្ថកិច្ចចុះស្រាវជ្រាវ ទើបដឹងថា ការស្លាប់របស់ជនរងគ្រោះ ដោយសារមានគេវាយ។
ករណីខាងលើនេះ បានកើតឡើងតាំងពីល្ងាចថ្ងៃទី៣ខែមិថុនា ប៉ុន្ដែដោយសារតែការព្យាយាមលាក់បាំងទើបរហូតដល់ព្រឹកថ្ងៃទី៤ ខែមិថុនា ឆ្នាំ២០១៨នេះ សមត្ថកិច្ចចុះពិនិត្យនៅក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ។
តាមប្រភពព័ត៌មានបានឲ្យដឹងថា បុរសរងគ្រោះខាងលើឈ្មោះ សូត្រ សំ ហៅត្នោត អាយុ៤០ឆ្នាំ មុខរបរអ្នករត់ម៉ូតូកង់បី មានប្រពន្ធឈ្មោះ យឺន សារៀម អាយុ៣៧ឆ្នាំ មានមុខរបរលក់ដូរ សព្វថ្ងៃស្នាក់នៅកន្លែងកើតហេតុខាងលើ។ នៅមុនពេលកើតហេតុបុរសរងគ្រោះ បានផឹកស្រាស្រវឹងជោគជាំ ហើយស្រែកជេរម្ចាស់ផ្ទះជួល ពេលនោះម្ចាស់ផ្ទះជួលក៏បានកាន់អំបោសជន្លរកវាយ និងដេញចេញ។ បន្ទាប់មកម្ចាស់បន្ទប់រូបនោះ ក៏បានដើរចូលទៅក្នុងផ្ទះវិញ ព្រោះជាប់រវល់មានមានភ្ញៀវមកលេងផ្ទះផង។
ប្រភពដដែលបានបន្តទៀតថា ចំណែកជនរងគ្រោះបានបន្ដទៅជេរប្រពន្ធរបស់ខ្លួនថែមទៀត ហើយខណៈនោះក៏មានបុរសម្នាក់ទៀតឈ្មោះ អ៊ុម ជ័យលក្ខ័ ដែលមានផ្ទះស្ថិតនៅជិតនោះ ដើរទៅទះមួយកំផ្លៀង ព្រមទាំងស្រែកថាឈប់មកឡូឡានៅមុខផ្ទះអញទៀត។ ក្រោយពីទះកំផ្លៀងជនរងគ្រោះរួច បុរសនេះក៏បានដើរចេញទៅបាត់។ បន្ទាប់មកទៀតក៏មានបុរសម្នាក់ទៀតឈ្មោះ យឺន សំអូន អាយុប្រហែលជាង២០ឆ្នាំ ត្រូវជាប្អូនថ្លៃរបស់ជនរងគ្រោះ បានមកដល់ក៏ស្ដីបន្ទោសអោយជនរងគ្រោះជាបងថ្លៃ រហូតឈានដល់ប្រើហិង្សា ដោយវាយ និងទាត់ធាក់យ៉ាងច្រើនទៅលើជនរងគ្រោះបណ្ដាលអោយដួលដេកទៅលើដីសន្លប់ឈឹង។
ប្រភពដដែលបានឲ្យដឹងទៀតថា ឃើញដូចនោះ ប្រពន្ធនិងម្ចាស់បន្ទប់ជួលក៏បាននាំជនរងគ្រោះទៅកាន់មន្ទីរពេទ្យ ដើម្បីសង្គ្រោះបន្ទាន់ ប៉ុន្តែពេលទៅដល់គ្រូពេទ្យបានប្រាប់ថា ជនរងគ្រោះស្លាប់បាត់ទៅហើយ ទើបដឹកសពត្រឡប់ទៅកាន់ផ្ទះជួលវិញ ហើយពូខាងប្រពន្ធជនរងគ្រោះ ខលប្រាប់សាច់ញាតិជនរងគ្រោះដោយម្ដងប្រាប់ថា ជនរងគ្រោះត្រូវរថយន្តបុកស្លាប់ លុះសាច់ញាតិទៅដល់បែរជាប្រាប់ថាជនរងគ្រោះធ្លាក់ពីលើកង់បីស្លាប់ទៅវិញ។ ដោយមានការសង្ស័យរហូតដល់វេលាព្រឹកថ្ងៃទី៤ ខែមិថុនា សាច់ញាតិជនរងគ្រោះបានប្ដឹងនគរបាលចុះទៅពិនិត្យជាក់ស្ដែង ហើយបានរកឃើញថាជនរងគ្រោះស្លាប់ដោយអំពើឃាតកម្ម ដោយមានស្នាមជាំដាច់រយះនៅលើចិញ្ចើមមួយកន្លែង ស្នាមជាំដាច់រយះនៅលើបបូរមាត់ក្រោមចំហៀងខាងឆ្វេងមួយកន្លែង ស្នាមជាំហើមនៅត្រចៀកខាងឆ្វេងមួយកន្លែង ស្នាមជាំកោសពងស្វាស នៅចង្កេះខាងឆ្វេងមួយកន្លែង និងគូទមានលាមកនឹងឈាម។ តាមការសន្និដ្ឋានគឺ ស្លាប់ដោយការប៉ះទង្គិចក្បាលយ៉ាងធ្ងន់ធ្ងរដោយការ(វាយសម្លាប់) បន្ទាប់មកនគរបាលបានហៅម្ចាស់ផ្ទះជួលម្នាក់ និងអ្នកជួយជូនទៅពេទ្យម្នាក់ទៅកាន់ប៉ុស្តិ៍ដើម្បីសាកសួរ រីឯជនដៃដល់បានរត់គេចខ្លួនបាត់ស្រមោល៕
Source: Kampuchea Thmey Daily
0 Comments