ភ្នំពេញ ៖ រដ្ឋមន្ត្រីក្រសួងមហាផ្ទៃ សម្ដេចក្រឡាហោម ស ខេង និងប្រធានគណៈកម្មាធិការជាតិរៀបចំការបោះឆ្នោត លោក ស៊ិក ប៊ុនហុក នៅថ្ងៃទី៤ ខែមិថុនា ឆ្នាំ២០១៨ បានធ្វើសេចក្តីណែនាំរួមមួយ ស្ដីពីកិច្ចសហប្រតិបត្តិការរវាងអាជ្ញាធររដ្ឋបាលថ្នាក់ក្រោមជាតិ និងគណៈកម្មការរៀបចំការបោះឆ្នោតគ្រប់លំដាប់ថ្នាក់ ក្នុងកិច្ចដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ហើយសេចក្តីណែនាំនេះ បានតម្រូវឲ្យអង្គភាពពាក់ព័ន្ធទាំងអស់ ក្រោមចំណុះក្រសួងមហាផ្ទៃ ត្រូវសហការធ្វើការផ្សព្វផ្សាយឲ្យបានទូលំទូលាយដល់អង្គភាព ឬស្ថាប័នពាក់ព័ន្ធ ដូចជាមន្ត្រីរាជការ កងកម្លាំងមានសមត្ថកិច្ច គណបក្សនយោបាយ សមាគម អង្គការមិនមែនរដ្ឋាភិបាល អាជ្ញាធរគ្រប់លំដាប់ថ្នាក់ ព្រមទាំងមហាជនទូទៅ។
សេចក្តីណែនាំបានបញ្ជាក់ថា យោងតាមរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្ដីពីការបោះឆ្នោតជ្រើសតាំងតំណាងរាស្ត្របទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ច្បាប់ និងលិខិតបទដ្ឋានគតិយុត្តិនានា ក្រសួងមហាផ្ទៃបានដាក់ចេញលិខិតណែនាំជាបន្តបន្ទាប់ដល់អាជ្ញាធររដ្ឋបាលថ្នាក់ក្រោមជាតិ និងកងកម្លាំងមានសមត្ថកិច្ចគ្រប់លំដាប់ថ្នាក់ឲ្យបង្កលក្ខណៈងាយស្រួលព្រមទាំងផ្ដល់នូវកិច្ចសហប្រតិបត្តិការដល់គណៈកម្មការរៀបចំការបោះឆ្នោតគ្រប់លំដាប់ថ្នាក់សំដៅរួមគ្នាសម្រេចបានលទ្ធផលជាវិជ្ជមាន នូវកិច្ចការនានាក្នុងដំណើរការរៀបចំការបោះឆ្នោតនាពេលខាងមុខ។ ទន្ទឹមនឹងកិច្ចការ ដែលសម្រេចបានកន្លងមក ក៏នៅមានកិច្ចការសំខាន់ៗមួយចំនួនទៀត ដែលត្រូវបន្តចូលរួមក្នុងដំណើរការរៀបចំការបោះឆ្នោតនេះ ដែលរួមមាន យុទ្ធនាការឃោសនាបោះឆ្នោត ការដឹកជញ្ជូនសម្ភារៈការបម្រើឲ្យការបោះឆ្នោត និងការដឹកជញ្ជូនត្រឡប់មកវិញ ការរាប់សន្លឹកឆ្នោត និងការប្រកាសលទ្ធផលនៃការបោះឆ្នោត ហើយដើម្បីឲ្យការងារនេះដំណើរទៅដោយសេរី ត្រឹមត្រូវ និងយុត្តិធម៌ ក្រសួងមហាផ្ទៃ និង គ.ជ.ប បានបញ្ជាក់ថា គឺត្រូវបង្កលក្ខណៈងាយស្រួលដល់គណបក្សនយោបាយ ដែលបានចូលរួមប្រកួតប្រជែងនៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខ។ ជាពិសេសនៅពេលមុនឃោសនាបោះឆ្នោត រដ្ឋាបាលរាជធានី ខេត្ត ត្រូវណែនាំដល់អាជ្ញាធរឃុំ សង្កាត់ ដើម្បីសម្របសម្រួល និងបង្កលក្ខណៈងាយស្រួលដល់គណបក្សនយោបាយ ដែលចូលរួមប្រកួតប្រជែង ក្នុងការធ្វើសកម្មភាពនានា ស្របតាមច្បាប់ស្តីពីគណបក្សនយោបាយ និងបទបញ្ជា និងនីតិវិធីផ្សេងៗ។
ទាក់ទងនឹងអព្យាក្រឹតភាពក្នុងតួនាទី និងភារកិច្ចរបស់អាជ្ញាធរដែនដីគ្រប់លំដាប់ថ្នាក់នៅក្នុងដំណើរការបោះឆ្នោតនេះ សេចក្តីណែនាំបានតម្រូវ មិនអោយប្រើប្រាស់ឥទ្ធិពល នៃតួនាទីរបស់ខ្លួនទៅលើអ្នកបោះឆ្នោត ដែលនាំអោយបាត់បង់សិទ្ធិសេរីភាពនៃការជ្រើសរើសរបស់ប្រជាពលរដ្ឋ ក្នុងការបោះឆ្នោត, មិនត្រូវដកហូតអត្តសញ្ញាណប័ណ្ណសញ្ជាតិខ្មែរ ឬឯកសារបញ្ជាក់អត្តសញ្ញាណប័ណ្ណបម្រើឱ្យការបោះឆ្នោត ទោះក្នុងកាលៈទេសៈណាក៏ដោយ, មិនត្រូវសួរនាំអ្នកបោះឆ្នោតក្នុងគោលបំណង ដើម្បីជះឥទ្ធិពល ឬចង់ដឹងពីលទ្ធផលនៃការបោះឆ្នោតជាសម្ងាត់របស់អ្នកបោះឆ្នោតឡើយ៕
Source: Kampuchea Thmey Daily
0 Comments