ក្រុមបាល់ទាត់បឹងកេតអែហ្វស៊ី បានវ៉ាដាច់ក្រុមណាហ្គាវើល ឡើងឈរកំពូលកំពូលតារាងវិញ សប្ដាហ៍ទី៨ នៃពានរង្វាន់លីគកំពូលកម្ពុជា (Metfone Cambodian League 2018) ដែលរៀបចំពីសំណាក់គណៈកម្មការប្រកួតបាល់ទាត់ជាតិ (CNCC) សេនាធិការរបស់សហព័ន្ធកីឡាបាល់ទាត់កម្ពុជា កាលពីចុងសប្ដាហ៍ថ្មីៗនេះ ខណៈក្រុមទាំង១២បានទាត់បញ្ចូលទីគ្នាទៅវិញទៅមកចំនួន១៦គ្រាប់។
សរុបលទ្ធផលប្រចាំសប្ដាហ៍ទី៨នេះមាន នៅថ្ងៃសៅរ៍ ទី២ ខែមិថុនា ក្រុមអាស៊ីអឺរ៉ុប ស្មើគ្នាជាមួយក្រុមអគ្គស្នងការដ្ឋាននគរបាលជាតិ ១ទល់១ លើទីលានកីឡដ្ឋាន AEU Park ហើយក្រុមបឹងកេត ឈ្នះអង្គរថាយហ្គឺរ ៤ទល់០ នៅលើទីលានមជ្ឈមណ្ឌលហ្វឹកហ្វឺនកីឡាកងយោធពលខេមរភូមិន្ទ (ស្តាតចាស់) និងក្រុមណាហ្គាវើល ចាញ់ក្រុមវិសាខា ៣ទល់០នៅលើទីលានជាមួយគ្នា។
ចំណែកនៅថ្ងៃអាទិត្យ ទី៣ ខែមិថុនា វិញក្រុមវេស្ទើនភ្នំពេញ ចាញ់ក្រុមភ្នំពេញក្រោន ១ទល់០ លើទីលានកីឡដ្ឋានវេស្ទើន ហើយក្រុមអគ្គីសនីកម្ពុជា ចាញ់ក្រុមសូលទីឡូអង្គរ ៣ទល់០ លើទីលានកីឡដ្ឋានអគ្គីសនីកម្ពុជា និងចុងក្រោយក្រុមព្រះខ័នរាជស្វាយរៀង ចាញ់ក្រុមក្រសួងការពារជាតិ ២ទល់១ លើទីលានកីឡដ្ឋានខេត្តស្វាយរៀង។
សរុបចំណាត់ថ្នាក់ត្រឹមសប្ដាហ៍ទី៨ នេះឃើញថាក្រុមបឹងកេត ឡើងឈរកំពូលតារាង មាន២០ពិន្ទុ តាមពីក្រោយដោយក្រុមលេខ២ ណាហ្គាវើល មាន១១៩ពិន្ទុ។ ក្រុមលេខ៣គឺវិសាខា មាន១៦ពិន្ទុ ហើយក្រុមលេខ៤ភ្នំពេញក្រោន មាន១៤ពិន្ទុស្មើគ្នាជាមួយក្រុមលេខ៥អគ្គស្នងការដ្ឋាននគរបាលជាតិ តែឈ្នះតែមត្រង់ Head to Head។ ក្រុមលេខ៦គឺក្រសួងការពារជាតិ មាន១២ពិន្ទុ ក្រុមលេខ៧ ព្រះខ័នរាជស្វាយរៀង មាន១ពិន្ទុ។ ក្រុមអង្គរថាយហ្គឺរ ឈរលេខ៧ មាន១០ពិន្ទុ ក្រុមអាស៊ីអឺរ៉ុប លេខ៩មាន៩ពិន្ទុ ហើយក្រុមលេខ១០ ក្រុមសូលទីឡូអង្គរ មាន៤ពិន្ទុហើយក្រុមអគ្គីសនីកម្ពុជា ឈរលេខ១១ មាន៤ពិន្ទុ និងក្រុមវេស្ទើនភ្នំពេញ ឈរលេខ១២ មិនទាន់មានពិន្ទុ។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងមាន២២សប្ដាហ៍ ដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម។
សម្រាប់កម្មវិធីប្រកួតសប្ដាហ៍ទី៩ នៃពានរង្វាន់លីគកំពូលកម្ពុជា នឹងបន្តធ្វើឡើងនៅចុងសប្ដាហ៍នេះដោយនៅថ្ងៃសៅរ៍ ទី៩ ខែមិថុនា ឆ្នាំ២០១៨ក្រុមអង្គថាយហ្គឺរ ប៉ះក្រុមសូលទីឡូអង្គរ នៅវេលាម៉ោង៣និង៣០នាទីល្ងាច លើទីលានកីឡដ្ឋានខេត្តសៀមរាប ហើយវេលាម៉ោង៣រសៀលមួយគូទៀតក្រុមវិសាខា ប៉ះក្រុមព្រះខ័នរាជស្វាយរៀង លើទីលានកីឡដ្ឋានវេស្ទើន និងក្រុមភ្នំពេញក្រោន ទទួលបឹងកេត នៅវេលាម៉ោង៦ល្ងាចលើទីលានកីឡដ្ឋាន RSN Stadium។ ចំណែកនៅថ្ងៃអាទិត្យ ទី១០ ខែមិថុនា វិញក្រុមអាស៊ីអឺរ៉ុប ទទួលក្រុមវេស្ទើនភ្នំពេញ លើទីលានកីឡដ្ឋាន AEU Park ហើយក្រុមក្រសួងការពារជាតិ ទទួលក្រុមអគ្គីសនីកម្ពុជា លើទីលានស្តាតចាស់ វេលាម៉ោង៦ល្ងាចនិងក្រុមអគ្គស្នងការដ្ឋាននគរបាលជាតិ ប៉ះណាហ្គាវើល លើទីលានពហុកីឡដ្ឋានជាតិ វេលាម៉ោង៦ល្ងាច៕
Source: Kampuchea Thmey Daily
0 Comments