ដើមសប្ដាហ៍នេះអ្នកចាំទីដៃស្អិត ស៊ូ យ៉ាទី សមាជិកក្នុងក្រុមជម្រើសជាតិកម្ពុជា បានប្រកាសថា ចាកចេញពីក្រុមជើងឯកឆ្នាំចាស់បឹងកេត ដោយទៅចូលរួមជាមួយក្រុមណាហ្គាវើល ដែលជាគូប្រជែងនៅតំបន់កំពូលតារាងក្នុងរដូវកាលឆ្នាំ២០១៨នេះ។ ដំណើរទៅដល់របស់រូបគេគឺជាការបំពេញចន្លោះខ្វះខាតរបស់ក្រុមនៅជើងទី២ដែលនឹងចាប់ផ្តើមពីចុងសប្ដាហ៍នេះ។
លោក មាស ចាន់ណា គ្រូបង្វឹករបស់ក្រុមណាហ្គាវើល បានលើកឡើងជុំវិញដំណើរទៅដល់ ស៊ូ យ៉ាទី ថា «ខ្ញុំសប្បាយចិត្តមែនទែន ដែលបានគាត់ចូលរួមជាមួយយើង ព្រោះគាត់ជាកម្លាំងដ៏សំខាន់ និងអាចជួយក្រុមបានច្រើនមែនទែន។ ម្យ៉ាងទៀតកីឡាករទាំងអស់សប្បាយចិត្តពេលគាត់មកដល់ ហើយអាចធ្វើឲ្យពួកគាត់កាន់តែមានឆន្ទៈក្នុងការប្រកួតប្រជែងជាងមុន»។
កីឡាករ ស៊ូ យ៉ាទី អាចចូលជួយក្រុមណាហ្គាវើល ចាប់ពីចុងសប្ដាហ៍នេះតទៅ ខណៈរបួសរហែកសាច់ដុំរបស់រូបគេនៅតែមិនទាន់ច្បាស់១០០% នៅឡើយ។ យ៉ាងណាក្តីណាហ្គាវើលមានកម្រិតលេងល្អមួយទាំងនៅតំបន់ការពារ បម្រើ និងប្រយុទ្ធ ប៉ុន្តែណាហ្គាវើល នៅអន់ប្រៀបត្រង់អ្នកចាំទីតែម្តង ដែលកម្រិតរបស់អ្នកចាំទីចាស់នៅមិនអាចបំពេញចន្លោះប្រហោងបាននៅឡើយ។
បើនិយាយពីកៅអីជម្រើស១១នាក់ដំបូងរបស់អ្នកចាំទី ស៊ូ យ៉ាទី នៅណាហ្គាវើល ដែលជាទ្រនំថ្មី អាចមានភាគរយច្រើនថានឹងបង្ហាញខ្លួននៅលើទីលានពោលគឺមានប្រៀបជាងសិស្សច្បងជើងចាស់គឺអ្នកចាំទី សំរឹទ្ធ សីហា និងសិស្សប្អូន សាន ឧសភា និង សៀង ណាំងជៀវ ដែលជាកីឡាករចាស់។
និយាយពី ស៊ូ យ៉ាទី រូបគេបានចាប់អាជីពជាអ្នកចាំទីដំបូងជាមួយក្រុមបៀលប្រាយ នៅឆ្នាំ២០១៦ដល់២០០៧ ខណៈនៅឆ្នាំ២០០៩ ដល់២០១៣ រូបគេចូលរួមជាមួយក្រុមក្រសួងការពារជាតិ និងពីឆ្នាំ២០១៣ ដល់២០១៥ គេផ្លាស់ទៅក្រុមភ្នំពេញក្រោន និងពីឆ្នាំ២០១៥ ដល់បច្ចុប្បន្ន ចូលរួមជាមួយបឹងកេត។ ចាប់ពីឆ្នាំ២០១២ ដល់បច្ចុប្បន្នរូបគេជាប់ឈ្មោះក្នុងក្រុមជម្រើសជាតិកម្ពុជា ពីឈុត U22 ដល់ឈុតធំផងដែរ។
មុនមានការវិវត្តន៍អាជីពរបស់ខ្លួនពីក្លិបមួយទៅក្លិបមួយ ស៊ូ យ៉ាទី ធ្លាប់ឈ្នះពានរង្វាន់សម្តេចតេជោ ហ៊ុន សែន ឆ្នាំ២០១០ ជាមួយក្រសួងការពារជាតិ ហើយនៅឆ្នាំ២០១៤ ឈ្នះជើងឯកពានរង្វាន់លីគកំពូលកម្ពុជា ជាមួយភ្នំពេញក្រោន ខណៈនៅឆ្នាំ២០១៦និង២០១៧ ឈ្នះជើងឯកលីគកំពូលកម្ពុជា ជាមួយបឹងកេតម្តង។ នៅឆ្នាំ២០១៥ គេធ្លាប់ឈ្នះជើងឯករងពានរង្វាន់ 2015 Mekong Club Championship ជាមួយបឹងកេត ក្រោយចាញ់ក្រុមថៃ Buriram United ១ទល់០។ ចំណែកពានរង្វាន់ឯកត្តជនវិញគេធ្លាប់ឈ្នះពានរង្វាន់ស្រោមដៃមានលីគកំពូលកម្ពុជាឆ្នាំ២០១៤ និង២០១៧ ផងដែរ ខណៈក្នុងពាន 2015 Mekong Club Championship ឈ្នះស្រោមដៃមាសដូចគ្នា៕
Source: Kampuchea Thmey Daily
0 Comments