ភ្នំពេញ ៖ ក្រសួងអប់រំយុវជននិងកីឡានឹងធ្វើសន្និសីទកាសែតស្តីពីការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០១៧-២០១៨នៅថ្ងៃចន្ទសប្តាហ៍ក្រោយនេះនៅអគារក្រសួងងប់រំនៅក្នុងស្តាតអូឡាំពិកវេលាម៉ោង២រសៀលក្រោមអធិបតីភាពលោកបណ្ឌិតសភាចារ្យហង់សជួនណារ៉ុនរដ្ឋមន្ត្រីក្រសួងអប់រំយុវជននិងកីឡា។
ជាមួយគ្នានេះដែរ ក្រសួងអប់រំ យុវជននិងកីឡានឹងបិទ បញ្ជីឈ្មោះបេក្ខជន លេខតុ លេខបន្ទប់ និងបទបញ្ញត្តិផ្សេងៗ ទាក់ទងនឹងការប្រឡងបាក់ឌុប នឹងបិទផ្សព្វផ្សាយ តាមមណ្ឌលប្រឡង ចាប់ពីម៉ោង ៩ ព្រឹក ថ្ងៃទី១៩ ខែសីហា ឆ្នាំ២០១៨ខណៈដំណើរការសំណេរ នៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០១៧-២០១៨ នឹងប្រព្រឹត្តទៅរយៈពេលពីរថ្ងៃ គឺថ្ងៃទី ២០-២១ ខែសីហា ឆ្នាំ២០១៨ ។
គួររំលឹកថា កាលពីឆ្នាំមុនការប្រឡងសញ្ញាបត្រ មធ្យមសិក្សាទុតិយភូមិ បានធ្វើឡើង នៅថ្ងៃទី២១-២២ ខែសីហា ដោយមានសិស្សប្រឡង ជាប់ជាង៦ម៉ឺន ៣ពាន់នាក់ ស្មើនឹង ៦៣.៨៤% នៃបេក្ខជនវត្តមានសរុបចំនួន ៩៩,៧២៨នាក់ ហើយក្នុងចំណោមសិស្ស ប្រឡងជាប់ទាំងនោះទទួលនិទ្ទេស A៖ ចំនួន ៤២៤នាក់, និទ្ទេស B៖ ចំនួន ២,៤៦៤នាក់, និទ្ទេស C៖ ចំនួន ៥ ០០០នាក់, និទ្ទេស D៖ ចំនួន ៩,១២៣នាក់ និងនិទ្ទេស E៖ ចំនួន ៤៦,៦៥៧នាក់។
គួរបញ្ជាក់ថា ចាប់តាំងពីឆ្នាំ២០១៤មក ក្រសួងអប់រំយុវជននិងកីឡា ក្រោមការដឹកនាំរបស់លោក ហង់ ជួនណារ៉ុន បានធ្វើកំណែទម្រង់ស៊ីជម្រៅលើប្រព័ន្ធអប់រំក្នុងនោះការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ត្រូវបានរឹតបន្តឹងក្រោមពាក្យស្លោកអ្នកចេះគឺជាប់៕
Source: Kampuchea Thmey Daily
0 Comments