ភ្នំពេញ ៖ ចាប់ពីថ្ងៃទី០៦ ដល់ថ្ងៃទី០៨ ខែមិថុនា ឆ្នាំ២០១៨ ដោយមានការណែនាំ និងគាំទ្រពីថ្នាក់ដឹកនាំ នៃក្រសួងសាធារណការ និងដឹកជញ្ជូន ជាពិសេស លោក ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ នាយកដ្ឋានសំណង់ប្រព័ន្ធចម្រោះទឹកកខ្វក់ ដែលមាន លោក ចៅ សុភៈភិបាល ជាប្រធាន បានសហការជាមួយអង្គការកិច្ចផ្តួចផ្តើមអភិវឌ្ឍន៍ទីក្រុងសម្រាប់ទ្វីបអាស៊ី-CDIA/GIZ រៀបចំវគ្គបណ្តុះបណ្តាលមួយស្តីពី ការគ្រប់គ្រងទឹកកខ្វក់ នៅសណ្ឋាគារ វ៉ៃគោ ក្នុងក្រុងស្វាយរៀង ខេត្តស្វាយរៀង។
វគ្គបណ្តុះបណ្តាលនេះមានការចូលរួមពីមន្ត្រីបច្ចេកទេសតាមបណ្តាអង្គភាពពាក់ព័ន្ធមួយចំនួន ដូចជាមន្ទីរសាធារណការ និងដឹកជញ្ជូន សាលាក្រុង និងមន្ទីរបរិស្ថាន តាមបណ្តាខេត្ត ចំនួន ០៥ ដូចជា ខេត្តស្វាយរៀង ខេត្តព្រៃវែង ខេត្តស្ទឹងត្រែង ខេត្តព្រះវិហារ និងខេត្តរតនគិរី។
គោលបំណង នៃវគ្គបណ្តុះបណ្តាលនេះគឺ ដើម្បីចូលរួមអភិវឌ្ឍន៍សមត្ថភាពមន្ត្រីរដ្ឋាភិបាល ដើម្បីស្វែងយល់ពីទិដ្ឋភាពទូទៅនៃការធ្វើផែនការ ការអនុវត្តលើដំណើរការ ការថែទាំ ការផ្សព្វផ្សាយ/អប់រំទាក់ទងនឹងការគ្រប់គ្រងទឹកកខ្វក់។
គូសបញ្ជាក់ផងដែរថា វគ្គបណ្តុះបណ្តាលនេះផ្តោតសំខាន់លើប្រធានបទមួយចំនួន ដូចជា ការបង្កើតអង្គភាពគ្រប់គ្រងទឹកកខ្វក់ ជម្រើសបច្ចេកវិទ្យាប្រព្រឹត្តកម្មទឹកកខ្វក់ ស្ថានភាពទូទៅនៃការគ្រប់គ្រងទឹកកខ្វក់ក្នុងប្រទេសកម្ពុជា ការគណនាទំហំអាងស៊ិបទិច និងការគ្រប់គ្រងថែទាំ ប្រតិបត្តិការ និងថែទាំរបស់ស្ថានីយប្រព្រឹត្តកម្មទឹកកខ្វក់ ការគ្រប់គ្រងសំណល់ភក់ និងការចែករំលែកបទពិសោធន៍ស្តីពីយុទ្ធនាការអប់រំ និងការយល់ដឹងលើវិស័យទឹកកខ្វក់ មិនត្រឹមតែបង្រៀនតែមេរៀននោះទេ ក្នុងនោះក៏មានការរៀបចំដឹកនាំសិក្ខាកាមធ្វើទស្សនកិច្ចការដ្ឋាននៅស្ថានីយប្រព្រឹត្តកម្មទឹកកខ្វក់ក្នុងតំបន់សេដ្ឋកិច្ចពិសេសមេនហាធេន ក្នុងក្រុងបាវិត ក៏ដូចជាការអនុវត្តការគណនាទំហំអាងស៊ិបទិច ការគណនាមុខកាត់លូ និងការធ្វើតេស្តទឹកសាកល្បងជូនសិក្ខាកាមបានស្វែងយល់ឲ្យកាន់តែច្បាស់អំពីមេរៀន។
ក្រោយបញ្ចប់វគ្គបណ្តុះបណ្តាល លោក ចៅ សុភៈភិបាល តំណាងឲ្យក្រសួងសាធារណការ និងដឹកជញ្ជូន បានផ្តល់ជាវិញ្ញាបនបត្រនៃការចូលរួមជូនសិក្ខាកាមទាំងអស់ផងដែរ៕
Source: Kampuchea Thmey Daily
0 Comments