ភ្នំពេញ ៖ យុវជនជាជាងដែកម្នាក់ បានស្លាប់ភ្លាមៗនៅកន្លែងកើតហេតុ បន្ទាប់ពីត ខ្សែភ្លើងឆក់ ខណៈកំពុងឆក់ បានត្រីផ្ទក់មួយប៉ុនកដៃក្មេង និង ត្រីកំភ្លាញ២-៣ ស្រាប់តែរអិលជើងធ្លាក់ចូលប្រឡាយឆក់ខ្លួនឯងស្លាប់យ៉ាងអាណោចអាធ័ម។
ហេតុការណ៍នេះ មានការភ្ញាក់ផ្អើលឡើង នៅថ្ងៃទី០៩ ខែមិថុនា ឆ្នាំ២០១៨ វេលាម៉ោង១៤និង១៥នាទី ត្រង់ចំណុច ដីឡូដ៍គ្មានលេខ ផ្លូវលំក្នុងបុរីខាំខូស៊ីធី ក្រុមទី១ ភូមិពោងពាយ សង្កាត់ទួលសង្កែទី២ ខណ្ឌឫស្សីកែវ។
ជនរងគ្រោះឈ្មោះ ហៀង សំរ៉ុង ភេទប្រុស អាយុ២៦ឆ្នាំ មុខរបរ ជាងផ្សារដែក ស្នាក់នៅក្នុងការដ្ឋានសំណង់ ក្នុងបុរីខាំខូស៊ីធី មានស្រុកបារាយណ៍ ខេត្តកំពង់ធំ។
សមត្ថកិច្ចឲ្យដឹងថា មុនពេលកើតហេតុជនរងគ្រោះនិងបក្ខពួក២នាក់ បានបន្លាយ ខ្សែភ្លើងពីកន្លែងស្នាក់នៅទៅកន្លែងកើតហេតុ(ប្រហែល៣០ម៉ែត្រ) ដើម្បីឆក់ត្រី ពេលកំពុងដាក់ឆក់ត្រីក៏រអិលជើងធ្លាក់ចូលក្នុងប្រឡាយ បណ្តាលឲ្យឆក់ខ្លួនឯងស្លាប់ ហើយ២នាក់ ដែលនៅខាងលើគោកក៏បានរត់ទៅដកឌុយចេញ ហើយក៏ដឹកតាមម៉ូតូទៅមន្ទីរពេទ្យលោកសង្ឃដើម្បីសង្គ្រោះ តែជាអកុសលជនរងគ្រោះបានដាច់ខ្យល់ស្លាប់ទៅហើយ។
ចំពោះមុខជំនាញខណ្ឌប៉ុស្តិ៍ បានសហការជាមួយវេជ្ជបណ្ឌិតតុលាការ និងការិយាល័យបច្ចេកទេសវិទ្យាសាស្ត្រ បានពិនិត្យសាកសព បញ្ជាក់ថា ពិតបានឆក់ចរន្តអគ្គិសនីស្លាប់ប្រាកដមែនរួចប្រគល់សពទៅឲ្យក្រុមគ្រួសារ យកទៅធ្វើបុណ្យនៅស្រុកបារាយ ខេត្តកំពង់ធំ៕
Source: Kampuchea Thmey Daily
0 Comments