កណ្តាល ៖ ជនសង្ស័យ ៤នាក់ រួមទាំងថ្នាំញៀន ១១កញ្ចប់ ត្រូវបានសមត្ថកិច្ចនគរបាលស្រុកកៀនស្វាយបង្ក្រាបបាន។
ហេតុការណ៍ បង្ក្រាបមុខសញ្ញាជួញដូរ និងប្រើប្រាស់នូវសារធាតុញៀនដោយខុសច្បាប់ (ម៉ាទឹកកក) ធ្វើ ឡើង កាលពីថ្ងៃទី៨ ខែមិថុនា ឆ្នាំ២០១៨ វេលាម៉ោង២០ និង៣០នាទី នៅចំណុចភូមិសំរោងក្អែរ៣ ឃុំសំរោងធំ ស្រុកកៀនស្វាយ ខេត្តកណ្តាល។
សមត្ថកិច្ចប្រាប់ឲ្យដឹងថា ជនសង្ស័យទាំង ៤នាក់ ដែលត្រូវឃាត់ខ្លួន ១.ឈ្មោះ ចន ញាណ ភេទប្រុស អាយុ៣៤ឆ្នាំ ជនជាតិខ្មែរ មុខរបរ មិនពិតប្រាកដ ២.ឈ្មោះ យី វិត ភេទប្រុស អាយុ៥០ឆ្នាំ ជនជាតិខ្មែរ មុខរបរ កសិករ ៣.ឈ្មោះ ហ៊ិន គឹមលី ភេទប្រុស អាយុ២៩ឆ្នាំ ជនជាតិ ខ្មែរ មុខរបរ ជាងផ្សាដែក ជនសង្ស័យទាំងបីនាក់ខាងលើ មានទីលំនៅភូមិសំរោងក្អែរ៣ ឃុំសំរោងធំ ស្រុកកៀនស្វាយ ខេត្តកណ្តាល។ ៤.ឈ្មោះ ក្តឹប សារុំ ភេទប្រុស អាយុ២០ឆ្នាំ ជនជាតិ ខ្មែរ មុខរបរ មិនពិតប្រាកដ មានទីលំនៅភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ខេត្តកណ្តាល។
វត្ថុតាងចាប់យក រួមមាន ម្សៅក្រាមពណ៌សថ្លាសង្ស័យជាសារធាតុញៀន (ម៉ាទឹកកក) ចំនួន ១១កញ្ចប់តូច ទូរស័ព្ទដៃ ចំនួន ០៤ គ្រឿង (ម៉ាក NOKIA អ៊ិនចុចពិល ចំនួន ០២គ្រឿង, iPhone5 ចំនួន ០១គ្រឿង, SINTECH ចំនួន ០១គ្រឿង) អត្តសញ្ញាណប័ណ្ណសញ្ជាតិជាតិខ្មែរ ចំនួន ០២សន្លឹក
ម៉ូតូ ចំនួន ០១គ្រឿង ម៉ាក HONDA C125 ពណ៌ខ្មៅ ពាក់ស្លាកលេខ ភ្នំពេញ.1DB-0943។
សមត្ថកិច្ចបញ្ជាក់ឲ្យដឹងថា មុនពេលកើតហេតុ កម្លាំងប៉ុស្តិ៍នគរបាលសំរោងធំបានចេញល្បាតនៅក្នុងភូមិសាស្ត្ររបស់ខ្លួន និងសហការជាមួយកម្លាំងជំនាញផ្នែកប្រឆាំងគ្រឿងញៀនស្រុក លុះមកដល់ចំណុចកើតហេតុខាងលើត្រង់ចំណុចក្រោយវត្តសិរីដីដុះក៏ឃើញឈ្មោះ យី វិត និងឈ្មោះ ក្តឹប សារុំ កំពុងឈរនៅលើផ្លូវលំក្រោយវត្តសិរីដីដុះ ពេលនោះកម្លាំងសមត្ថកិច្ចក៏បានហៅសួរនាំ និងធ្វើការត្រួតពិនិត្យ ឆែកឆេរឃើញ (ម៉ាទឹកកក) ចំនួន ០៦កញ្ចប់តូចនៅក្នុងហោប៉ៅខោឈ្មោះ យី វិត និង ០១ កញ្ចប់តូចទៀតឈ្មោះ ក្តឹប សារុំ បោះចោលទៅលើដី ឃើញដូច្នេះកម្លាំងសមត្ថកិច្ចក៏ឃាត់ខ្លួនជនសង្ស័យទាំងពីរនាក់ យកមកសួរនាំនៅប៉ុស្តិ៍។
នៅចំពោះមុខសមត្ថកិច្ចឈ្មោះ យី វិត បានឆ្លើយសារភាពថា ថ្នាំញៀនម៉ាទឹកកកខាងលើខ្លួនបានទិញពីឈ្មោះ ចន ញាណ មានទីលំនៅ ភូមិ ឃុំកើតហេតុ លុះដល់ម៉ោង ២១និង៣០ នាទី ថ្ងៃខែដដែល កម្លាំងសមត្ថកិច្ចក៏ចុះទៅដល់ផ្ទះឈ្មោះចន ញាណ ធ្វើការត្រួតពិនិត្យរកឃើញ (ម៉ាទឹកកក) ចំនួន ០៤ កញ្ចប់តូចទៀត ។ ប្រហែល ៣០នាទី ក្រោយមកឈ្មោះ ហ៊ិន គឹមលី (ម៉េង) មានទីលំនៅភូមិ ឃុំ កើតហេតុ បានតេទូរស័ព្ទមកឈ្មោះ ចន ញាណ ដើម្បីទិញថ្នាំញៀនចំនួន ០១កញ្ចប់តូច រួចកម្លាំងសមត្ថកិច្ចក៏បន្តឃាត់ខ្លួនឈ្មោះ ហ៊ិន គឹមលី (ម៉េង) ។
បច្ចុប្បន្នសង្ស័យទាំង ០៤នាក់រួមទាំងវត្ថុតាង ត្រូវបានបញ្ជូនទៅអធិការដ្ឋាននគរបាលស្រុកកៀនស្វាយ ដើម្បីចាត់ការតាមនីតិវិធី៕
Source: Kampuchea Thmey Daily
0 Comments