សហព័ន្ធកីឡាបាល់ទាត់អន្តរជាតិ ឬ ហៅកាត់ថា FIFA បានបញ្ចេញតារាងចំណាត់ថ្នាក់ក្រុមបាល់ទាត់ទាំងអស់ជាសមាជិករបស់ខ្លួន (FIFA World Ranking) ដែលមាន ២០៦ ប្រទេស ប្រចាំខែ មិថុនា ឆ្នាំ២០១៨ នៅថ្ងៃព្រហស្បតិ៍ ទី៧ ខែមិថុនា ថ្មីៗនេះ ស្របពេលក្រុមកម្ពុជា នៅឈរចំណាត់ថ្នាក់ចំនួនលេខ១៦៦ ពោលគឺឡើងចំណាត់ថ្នាក់៤លេខ បើធៀបទៅនឹងខែឧសភា កន្លងទៅឈរលេខ១៧០។
យោងតាមវិបសាយ fifa.com បានបញ្ជាក់ថា តារាងចំណាត់ថ្នាក់នេះគិតចាប់ពីថ្ងៃទី៧ ខែមិថុនា រហូតដល់ថ្ងៃទី១៩ ខែកក្កដា ឆ្នាំ២០១៨ ខាងមុខ។ តារាងចំណាត់ថ្នាក់នេះ មិនមានការប្រែប្រួលច្រើន ព្រោះក្រុមជម្រើសជាតិកម្ពុជា មិនមានសកម្មភាពប្រកួតកាលពីខែឧសភា កន្លងទៅ ពោលគឺមានសកម្មភាពតាំងពីខែមីនា ម្ល៉េះក្រោយបានប្រកួតឈ្នះលើក្រុមឡាវ ក្នុងប្រកួតមិត្តភាពអន្តរជាតិ ១ទល់០ តែចាញ់ក្រុមអាហ្វហ្គានីស្ថាន ២ទល់១ ក្នុងប្រកួតជម្រុះជើងឯកទ្វីបអាស៊ី (AFC Asian Cup 2019 UAE)។
សរុបតារាងចំណាត់ថ្នាក់ប្រចាំតំបន់អាស៊ាន ប្រទេសវៀតណាម ឡើងមកឈរកំពូលតារាង៧ខែជាប់គ្នា ដោយឈរលេខ១០២ពិភពលោក បន្ទាប់ពីវ៉ាដាច់ហ្វីលីពីន នៅលេខ១១៥ តាមពីក្រោយក្រុមថៃ ឈរលេខ១២២ពិភពលោក ,មីយ៉ាន់ម៉ា លេខ១៣៨,ឥណ្ឌូណេស៊ី លេខ១៦៤, កម្ពុជា លេខ១៦៦, សិង្ហបុរី លេខ ១៦៩, ម៉ាឡេស៊ី លេខ១៧១, ឡាវ លេខ១៧៨,ទីម័រខាងកើត លេខ១៩០ និងប្រ៊ុយណេ លេខ១៩៥។
បើរាល់តារាងចំណាត់ថ្នាក់ក្រុមល្អទាំង១០ ប្រចាំទ្វីបអាស៊ី ក្នុងខែមិថុនា នេះមានអូស្ត្រាលី ឡើងមកឈរលេខ៣៦ ពិភពលោកក្នុងតារាងក្រោយទម្លាក់ក្រុមអ៊ីរ៉ង់ ឈរលេខ៣៧ពិភពលោក,កូរ៉េខាងត្បូង លេខ៥៧, ជប៉ុន លេខ៦១, អារ៉ាប់ប៊ីសាអ៊ូឌីត លេខ៦៧, ស៊ីរី លេខ៦៣, ចិន លេខ៧៥, អារ៉ាប់រួម លេខ៧៧, លីបង់ លេខ ៧៩, និងអូម៉ង់ លេខ៨៤ពិភពលោក។
សម្រាប់ចំណាត់ថ្នាក់ក្រុមខ្លាំងជាងគេប្រចាំពិភពលោកក្នុងខែមិថុនា នេះមានអាល្លឺម៉ង់ ឡើងមកឈរចំណាត់ថ្នាក់លេខ១ ចំនួន១០ខែជាប់គ្នា ខណៈក្រុមប្រេស៊ីល បន្តឈរលេខ២ ហើយប៊ែលហ្ស៊ិក ឈរលេខ៣ ,ព័រទុយហ្គាល់ ធ្លាក់ទៅលេខ ៤, ប្រទេសអាហ្សង់ទីន ឈរលេខ៥, ស្វីស លេខ៦ បារាំង លេខ៧, ប៉ូឡូញ លេខ៨, ឈីលី ឡើងមកលេខ ៩ និង អេស្ប៉ាញ ឈរចំណាត់ថ្នាក់លេខ១០៕
Source: Kampuchea Thmey Daily
0 Comments