បុរសម្នាក់ ចងកធ្វើអត្តឃាតចោលប្រពន្ធ កូន សង្ស័យមានវិបត្តិផ្លូវចិត្ត
កំពត ៖ បុរសម្នាក់ បានសម្រេចចិត្តចងកធ្វើអត្តឃាត ស្លាប់ចោលក្រុមគ្រួសារ សាច់ញាតិដោយគ្មានអាឡោះអាល័យ ដោយការគិតខ្លីបែបនេះអាចផ្ដើមឡើងព្រោះតែបញ្ហាវិបត្តិក្នុងគ្រួសារដោះស្រាយមិនចេញ។
ករណីបុរសចងកធ្វើអត្តឃាតខាងលើ បានបង្កការភ្ញាក់ផ្អើលកាលពីវេលាម៉ោង១១និង០៥នាទី ព្រឹក ថ្ងៃទី០៧ ខែមិថុនា ឆ្នាំ២០១៨ ត្រង់ចំណុចផ្ទះជនរងគ្រោះ ស្ថិតក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
ជនរងគ្រោះ ដែលសម្រេចចិត្តគិតខ្លីចងកសម្លាប់ខ្លួននេះ ឈ្មោះឃឹម ចាន់ថុន ភេទប្រុស អាយុ៤៩ឆ្នាំ មុខរបរជាមន្ត្រីផ្នែកកសិកម្ម រស់នៅក្នុងភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត។
បើតាមប្រភពព័ត៌មានពីប្រជាពលរដ្ឋដែលជាអ្នកជិតខាង បានឲ្យដឹងថា កន្លងមកបុរសរងគ្រោះ(សព)ជាមនុស្សញៀនល្បែងស៊ីសង ហើយស្ត្រីជាប្រពន្ធតែងតែហាមប្រាមមិនឲ្យគាត់ទៅលេងនោះទេ ប៉ុន្តែ គាត់មិនស្តាប់ឡើយ ទើបមួយរយៈចុងក្រោយនេះ ស្ត្រីជាប្រពន្ធសុំគាត់លែងលះតែម្តង តែជនរងគ្រោះជាប្តីមិនព្រមលែងលះនោះទេ ទើបក្រុមគ្រួសារទ្រាំរស់នៅជាមួយដោយមិនចុះសម្រុងគ្នាដូចគ្រាមុនឡើយ ដែលធ្វើឲ្យបុរសជាប្តីតូចចិត្តជាខ្លាំង។
ប្រភពដដែលបានបញ្ជាក់ទៀតថា នៅថ្ងៃកើតហេតុគាប់ជួនប្រពន្ធមិននៅផ្ទះ បុរសរងគ្រោះ ក៏លួចចងកធ្វើអត្តឃាតតែម្តង។
ក្រោយពីកើតហេតុដូចខាងលើ សមត្ថកិច្ចជំនាញក៏បានចុះមកត្រួតពិនិត្យ ធ្វើកោសល្យវិច័យក្រែងមានពាក់ព័ន្ធនឹងករណីផ្សេង ប៉ុន្តែដោយសារពិនិត្យទៅគ្មានស្លាកស្នាមអ្វីគួរឲ្យកត់សម្គាល់ ទើបប្រគល់សាកសពទៅក្រុមគ្រួសារដើម្បីចាត់ចែងធ្វើបុណ្យតាមប្រពៃណី៕
Source: Kampuchea Thmey Daily
0 Comments