បង្ក្រាបទីតាំងធ្វើរ៉ែមាស គ្មានអាជ្ញាប័ណ្ណ ជាច្រើនកន្លែងនៅស្រុកភ្នំព្រឹក

បាត់ដំបង ៖ ការដ្ឋានលួចធ្វើអាជីវកម្មរ៉ែមាសជាច្រើនកន្លែង ដែលគ្មានច្បាប់អនុញ្ញាត ត្រូវបានកម្លាំងចម្រុះរបស់ខេត្ត និងក្រសួង បានសហការគ្នាធ្វើការបង្ក្រាប ព្រមទាំងមានការឈូសឆាយកម្ទេចចោលនូវទីតាំងមួយចំនួនផងដែរ ដោយសារតែតំបន់នេះមានការរុករករ៉ែមាសយ៉ាងអនាធិបតេយ្យ។

របាយការណ៍ដែលយើងទទួលបាន គឺកិច្ចប្រតិបត្តិការនេះ បានប្រព្រឹត្តឡើង កាលពីថ្ងៃទី១ ខែមិថុនា ឆ្នាំ២០១៨ ដោយក្នុងនោះមានកម្លាំងកងរាជអាវុធហត្ថស្រុកភ្នំព្រឹកសហការជាមួយកម្លាំងកងរាជអាវុធហត្ថលើផ្ទៃប្រទេស កម្លាំងអាវុធហត្ថខេត្ត មន្ត្រីជំនាញរបស់ ក្រសួងរ៉ែនិងថាមពល ក្រសួងបរិស្ថាន និងកម្លាំងនគរបាលខេត្ត បាត់ដំបង បានចុះបង្ក្រាបទីតាំងការដ្ឋានរ៉ែមាសចំនួន០៥គោលដៅ ដែលក្នុងនោះគ្មានអាជ្ញាប័ណ្ណ៤ ទីតាំង និងមានអាជ្ញាប័ណ្ណ១ ទីតាំង ព្រមទាំងបានធ្វើការបំផ្លាញចោលនូវទីតាំងមួយកន្លែងផងដែរ។

ម្ចាស់ទីតាំងដែលលួចប្រព្រឹត្តគ្មានច្បាប់អនុញ្ញាតអោយបានត្រឹមត្រូវនោះ រួមមាន ១-ឈ្មោះ ខេង សុវណ្ណ ទីតាំងក្នុងភូមិបារាំងធ្លាក់ ឃុំបារាំងធ្លាក់ ស្រុកភ្នំព្រឹក ២-ឈ្មោះ បូ ខៀវ
ទីតាំងនៅ ភូមិភ្នំព្រឹក ឃុំភ្នំព្រឹក ស្រុកភ្នំព្រឹក ៣-ឈ្មោះ កាំង តាំង ទីតាំង នៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ៤-ឈ្មោះ ខូវ ចិត្រា ទីតាំងនៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ៤ទីតាំងនេះសុទ្ធតែគ្មានអាជ្ញាប័ណ្ណត្រឹមត្រូវនោះឡើយ និង ៥-ឈ្មោះ ឡាយ ស្រីពៅ ទីតាំងនៅ ភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង (មានអាជ្ញាប័ណ្ណ)។

នៅក្នុងកិច្ចប្រតិបត្តិការនេះ កម្លាំងសមត្ថកិច្ចចម្រុះ បានដកហូតនូវសម្ភារៈ និងវត្ថុតាងមួយចំនួនរួមមាន ៖ ១. ម៉ាស៊ីនកិនកម្ទេចថ្មរ៉ែ ចំនួន ៨ គ្រឿង ២. ម៉ាស៊ីនអុកបំបែកថ្ម រ៉ែ ចំនួន ១គ្រឿង ៣. សារធាតុគីមីមួយចំនួន ៤. គីបខ្យល់ (បំពង់ជ័រ) ១០៧០ គីប ៥. គីបអគ្គិសនី ២០៣០ គីប ៦,ក្បាលកិន ចំនួន ៤ គ្រឿង ៧. ម្សៅ Amoni Nitrat hat. (24 បាវ × 25. Kg) ៨. Sodium Cyanide ចំនួន២០ ធុង និងសារធាតុគីមីមួយចំនួនទៀត។ ដោយបច្ចុប្បន្នសម្ភារៈ និងវត្ថុតាង ទាំងអស់នេះ ត្រូវបានប្រគល់អោយទៅខាងជំនាញ ដើម្បីរៀបចំឯកសារ តាមនីតិវិធីច្បាប់៕