ភ្នំពេញ ៖ លោក កែវ វី អ្នកនាំពាក្យគណៈកម្មការជាតិ គ្រប់គ្រងគ្រោះមហន្តរាយ បានឲ្យដឹងថានៅក្នុងរយៈពេល៥ខែដើមឆ្នាំ២០១៨នេះ មានមនុស្ស៦៨នាក់បានស្លាប់ និងរបួស៧៥នាក់ ហើយបានងាប់គោ-ក្របី៦៩ក្បាល ដោយសារបាតុភូតរន្ទះនិងខ្យល់កន្ត្រាក់។
លោក កែវ វី បានប្រាប់សារព័ត៌មានក្នុងស្រុកកាលពីថ្ងៃទី០១មិថុនាឲ្យដឹងថា ក្នុងរយៈពេល៥ខែនេះដែរ ពោលចាប់ពីខែមករា ដល់ ខែឧសភា ឆ្នាំ២០១៨ គ្រោះធម្មជាតិភ្លៀងលាយខ្យល់កន្ត្រាក់ ធ្វើឲ្យរលំ និងខូចខាតផ្ទះប្រជាពលរដ្ឋ២១៩១ខ្នងក្នុងនោះធ្ងន់ធ្ងរ៤៧២ខ្នង, ខូចខាតស្រាល១៧០៨ខ្នង, សាលារៀន៧អគារ និងអគារផ្សេងៗ៩អគារ, ស្លាប់៣នាក់, របួស២៩នាក់។
លោកបានកត់សំគាល់ថាចំណែក បាតុភូតរន្ទះនៅឆ្នាំនេះវិញ មានលក្ខណៈកាចសាហាវជាងឆ្នាំមុន ដោយគិតត្រឹម៥ខែដំបូងនេះបាតុភូត រន្ទះបណ្តាលឲ្យពលរដ្ឋ ស្លាប់ ៦៥នាក់ របួស៤៦នាក់ងាប់គោ-ក្របីចំនួន៦៩ក្បាល។
ចំពោះគ្រោះទឹកជំនន់វិញ លោក កែវ វី បានបញ្ជាក់ថា មានផលប៉ះពាល់ខ្លាំងនៅស្រុកមង្គលបូរី ខេត្តបន្ទាយមានជ័យ មានរហូតដល់៧០០ហិកតា ដែលបណ្តាលមកពីទឹកភ្លៀង។ មន្ត្រីដដែលនេះ បានអំពាវនាវ ឲ្យប្រជាពលរដ្ឋទាំងអស់ មានការប្រុងប្រយ័ត្នខ្ពស់ ព្រោះពេលនេះជាខែវស្សា ដែលសំបូរទៅដោយបាតុភូតធម្មជាតិ។
ចំណែកអ្នកនាំពាក្យក្រសួងសុខាភិបាលបានណែនាំពីវិធីការពារខ្លួននិងសង្គ្រោះបឋមពីបាតុភូតរន្ទះដល់ប្រជាពលរដ្ឋឲ្យបានយល់ដឹងដើម្បីឲ្យចេះការពារខ្លួនជៀសផុតពីគ្រោះថ្នាក់ដែលបណ្តាលមកពីបាតុភូតរន្ទះនៅក្នុងរដូវភ្លៀងនេះ។
លោកវេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាលបានមានប្រសាសន៍ថា វិធីមួយចំនួនដើម្បីការពារខ្លួនពីបាតុភូតរន្ទះដូចជានៅពេលមានផ្លេកបន្ទោរឬផ្គររន្ទះត្រូវបន្ទន់ខ្លួនដោយបញ្ឈរជង្គង់ទាំងពីរជិតគ្នានិងយកដៃខ្ទប់ត្រចៀក ត្រូវរត់ចេញពីទឹកឬស្រែនៅខាងក្នុងឬរត់ចូលផ្ទះជាប្រញាប់ ត្រូវដកឌុយដោតភ្លើងឬឌុយទូរសព្ទ័ដោយទុកចម្ងាយ១ម៉ែត្រពីប្រភពចរន្តអគ្គិសនី និងត្រូវបន្ទន់ខ្លួនអោបក្បាលជង្គង់និងបិទត្រចៀកទាំងសងខាងនៅក្រោមបង្គោលភ្លើង។
ជាមួយគ្នានេះដែរមិនត្រូវនិយាយទូរស័ព្ទនៅពេលឮសំឡេងផ្គរ មិនត្រូវជិះម៉ូតូឬកង់នៅពេលមេឃភ្លៀងឬអង្គុយក្នុងតង់និងអង្គុយនៅក្រោមដើមឈើឡើយត្រូវអង្គុយបន្ទន់ខ្លួនដោយរក្សាចម្ងាយ៤ម៉ែត្រពីមែកឈើ។
ចំពោះ វិធីសង្គ្រោះបឋមនៅពេលមានគ្រោះរន្ទះវិញ លោកវេជ្ជបណ្ឌិតលី សូវ៉ាន់បានណែនាំឲ្យប្រជពលរដ្ឋត្រូវផ្លុំខ្យល់ចូលមាត់និងមាត់ជាមួយជនរងគ្រោះក្នុងករណីជនរងគ្រោះមិនដកដង្ហើមនិងសង្កាត់ដៃទាំងពីរលើសន្ទះទ្រូងក្នុងករណីជនរងគ្រោះគ្មានជីពចរ ត្រូវក្រាលកន្ទេលឬបាវឆ្នួតកុំឲ្យជនរងគ្រោះនៅផ្ទាល់ដីឬទឹកជ្រាំការពារដើម្បីកុំឲ្យជនរងគ្រោះរងភាពត្រជាក់ខ្លួនពេកនិងចល័តជនរងគ្រោះដោយប្រុងប្រយ័ត្នក្នុងករណីជនរងគ្រោះមានបាក់ឆ្អឹងឬហូរឈាម។
លោកវេជ្ជបណ្ឌិត លីសូវ៉ាន់បានអំពាវនាវដល់ប្រជាពលរដ្ឋទាំងអស់ត្រូវអនុវត្តវិធីទាំងនេះឲ្យបានល្អនិងខ្ជាប់ខ្ជួនដើម្បីការពារខ្លួនក៏ដូចជាកាត់បន្ថយការរងគ្រោះនិងការស្លាប់ដោយសារបាតុ ភូតរន្ទះព្រោះថាបច្ចុប្បន្ននេះដោយសារអាកាសធាតុមានការប្រែប្រួលបានធ្វើឲ្យមានបាតុភូតរន្ទះកើតឡើងច្រើនដោយធ្វើឲ្យប្រជាពលរដ្ឋរងគ្រោះនិងស្លាប់ជាញឹកញាប់ពិសេសនៅក្នុងរដូវភ្លៀង៕
Source: Kampuchea Thmey Daily
0 Comments