សៀមរាប ៖ ប្រភពព័ត៌មានច្បាស់ការណ៍មួយបានបង្ហើបឲ្យដឹងថា ការគ្រោង និងតែងតាំងប្រធានមន្ទីរប្រៃសនីយ៍ និងទូរគមនាគមន៍ ខេត្តសៀមរាប ថ្មីនាពេលខាងមុខ ហាក់មានភាពមិនប្រក្រតី ហើយករណីនេះ បានធ្វើឲ្យមហាជនរិះគន់យ៉ាងចាស់ដៃថា ជារឿងបក្សពួកនិយម អាចនាំឲ្យមានអំពើពុករលួយ។
ប្រភពបន្តថា ការតែងតាំងប្រធានមន្ទីរប្រៃសនីយ៍ និងទូរគមនាគន៍ ខេត្តសៀមរាប ថ្មីនេះ ដោយសារប្រធានមន្ទីរចាស់បានចូលនិវត្តន៍កាលពីខែមីនា កន្លងទៅនេះ ឥឡូវសមាសភាពប្រធានមន្ទីរថ្មី ត្រូវគេទម្លាយហើយ ដោយគេគ្រោងនឹងតែងតាំងប្រធានការិយាល័យដែលទើបនឹងធ្វើចូលថ្មី។
ប្រភពបន្តទៀតថា ប្រធានការិយាល័យរូបនោះ ត្រូវគេឲ្យដឹងថា មានឈ្មោះ សុខ សីហា ជាមន្ត្រីដែលផ្ទេរក្របខណ្ឌពីគ្រូបង្រៀននៅសាលាបឋមសិក្សាវត្តបូព៌កាលពីឆ្នាំ២០១៤ ក្នុងតួនាទីជាមន្ត្រីក្រមការ លុះមួយរយៈមក លោកក៏ត្រូវបានគេតែងតាំងជាប្រធានការិយាល័យនៅឆ្នាំ២០១៦។
ប្រភពបានបន្ថែមថា ក្នុងតួនាទីជាប្រធានការិយាល័យក្រោមការជ្រោមជ្រែងរបស់លោក ហុង ប៊ុនធ្វី ដែលនៅជាប្រធានចាស់នោះ លោក សុខ សីហា បានបំពេញការងារមិនជាជាប់លាប់នោះទេ ដោយម្តងឃើញ ម្តងបាត់ ព្រោះតែលោកជាប់បំពេញការងារផ្ទាល់ខ្លួនរបស់លោក ពោលគឺលោកជាមគ្គុទេសទេសចរណ៍ផងដែរ។ តែនៅពេលដែលលោក ហុង ប៊ុនធ្វី ចូលនិវត្តន៍នៅដើមឆ្នាំ២០១៨នេះ ស្រាប់តែលេចឮព័ត៌មានមកថា លោកប្រធានមន្ទីរចាស់ បានស្នើទៅអភិបាលខេត្តសៀមរាប ដើម្បីដាក់លោក សុខ សីហា ឲ្យមកកាន់តំណែងជាប្រធានជំនួសលោក ដែលវាបានធ្វើឲ្យមន្ត្រីរាជការក្នុងមន្ទីរប្រៃសនីយ៍ និងទូរគមនាគមន៍ខេត្តសៀមរាបមួយចំនួនមិនពេញចិត្ត ដោយពួកគេគិតថា ការឡើងតំណែងដ៏លឿននេះ គឺបានមកពីលុយកាក់ និងខ្សែបក្ខពួក។
ចំពោះសំណើឲ្យមានការតែងតាំងលោក សុខ សីហា ឲ្យកាន់តំណែងជាប្រធានមន្ទីរប្រៃសនីយ៍ និងទូរគមនាគមន៍នេះ លោក ហុង ប៊ុនធ្វី បានថ្លែងថា លោកមិនបានដឹងពីរឿងនេះទេ វាគឺជាការចាត់ចែងរបស់រដ្ឋបាលខេត្ត ហើយបើតាមលោកដឹង សំណើនោះ គឺនឹងត្រូវសម្រេចដោយក្រសួង។
ដោយឡែកលោក លីវ គីមហេង ប្រធាននាយកដ្ឋានបុគ្គលិក នៃក្រសួងប្រៃសនីយ៍ និងទូរគមនាគមន៍បានមានប្រសាសន៍ថា លោក សុខ សីហា ពិតជាត្រូវបានក្រសួងសម្រេចឲ្យធ្វើជាប្រធានមន្ទីរប្រៃសនីយ៍ និងទូរគមនាគមន៍ តាមសំណើរបស់សាលាខេត្តសៀមរាប ហើយក្រសួងគ្រោងនឹងធ្វើការប្រកាសនៅពេលសមស្របណាមួយ។
ទោះជាយ៉ាងណាក៏ដោយ បើសិនជាលោក សុខ សីហា ដែលឡើងតួនាទីដូចផ្លេកបន្ទោរ ត្រូវបានគេតែងតាំងជាប្រធានមន្ទីរប្រៃសនីយ៍ និងទូរគមនាគមន៍ខេត្តសៀមរាបមែន ច្បាស់ជាធ្វើឲ្យមន្ត្រីរាជការមួយចំនួនធំនៅក្នុងមន្ទីរនេះមិនសប្បាយចិត្តឡើយ ដែលពួកគាត់គិតថា មិនបាច់ប្រឹងធ្វើការអ្វីទេ គឺចាំតែអែបមេ និងចេះសែនព្រេនទៅជាការស្រេចហើយ។
គួរបញ្ជាក់ដែរថា កាលពីដើមខែឧសភា នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសថា សម្តេចនឹងពិនិត្យឡើងវិញ នូវការដំឡើងឋានន្តរស័ក្តិ និងថ្នាក់នៅក្នុងក្រសួង មន្ទីរ ស្ថាប័នទាំងអស់ថា តើបានដំឡើងឲ្យមន្ត្រី និងកងកម្លាំងក្នុងក្រសួងរបស់ខ្លួនបានត្រឹមត្រូវទៅតាមការកំណត់ក្នុងច្បាប់ហើយ ឬនៅ។
ជាមួយគ្នាសម្តេចក៏បានស្នើដល់រដ្ឋមន្ត្រីដែលគ្រប់គ្រងក្រសួងទាំងអស់ ត្រូវយកចិត្តទកដាក់លើរឿងនេះ គឺត្រូវដំឡើងឋានន្តរស័ក្តិឲ្យបានត្រឹមត្រូវទៅតាមច្បាប់ កុំធ្វើតាមតែបទបញ្ជា ហើយកុំគិតតែដំឡើងឋានន្តរស័ក្តិ និងតួនាទីរបស់ខ្លួន ឬបក្ខពួកខ្លួនមិនបានគិតដល់មន្ត្រីនៅក្រោមឱវាទ ដោយតាមច្បាប់នៅក្នុងក្របខណ្ឌមន្ត្រីរាជការស៊ីវិល គឺក្រោយរយៈពេល២ឆ្នាំ ទើបត្រូវស្នើសុំដំឡើងឋានន្តរស័ក្តិចំនួន១ដង។
មហាជនបានធ្វើការកត់សម្គាល់ថា មួយរយៈចុងក្រោយនេះការតែងតាំងមន្ត្រីរាជការមួយចំនួនហាក់មានភាពមិនប្រក្រតីគឺខ្លះជាមន្ត្រីលោតផ្លោះតែម្តងសង្ស័យតែគាត់ អាងមានខ្សែហោនឹងទឹកប្រាក់ហើយមើលទៅ៕
Source: Kampuchea Thmey Daily
0 Comments