ភ្នំពេញ ៖ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានបញ្ជាក់ជូនសមាជិកព្រឹទ្ធសភាបារាំងថា ប្រទេសកម្ពុជាបានគោរពដ៏ពេញលេញនូវគោលការណ៍លទ្ធិប្រជាធិបតេយ្យ សេរី ពហុបក្ស។
នៅក្នុងជំនួបសម្តែងការគួរសម និងសវនាការជាមួយលោក Christophe Andres Frassa សមាជិកព្រឹទ្ធសភាបារាំង និងជាសមាជិកនៃសភានិយាយភាសាបារាំង កាលពីរសៀលថ្ងៃទី១ ខែមិថុនា ឆ្នាំ២០១៨ នៅវិមានព្រឹទ្ធសភា សម្តេចវិបុលសេនាភក្តី សាយ ឈុំ បានមានប្រសាសន៍បញ្ជាក់ជូនថា ប្រទេសកម្ពុជានឹងធ្វើការបោះឆ្នោតជ្រើសរើសតំណាងរាស្ត្រ តាមកាលកំណត់នៅថ្ងៃទី២៩ ខែកក្កដា ឆ្នាំ២០១៨។ ការងារនេះបច្ចុប្បន្នគណៈកម្មាធិការជាតិរៀបចំការបោះឆ្នោតបានសម្រេចផ្តល់សុពលភាពដល់គណបក្សចំនួន ២០គណបក្ស ចូលរួមប្រកួតប្រជែងបោះឆ្នោតជ្រើសរើសតំណាងរាស្ត្រ នីតិកាលទី៦។ ការចូលរួមប្រកួតប្រជែងបោះឆ្នោតជ្រើសរើសតំណាងរាស្ត្រ នីតិកាលទី៦ ដែលមានគណបក្សដ៏ច្រើនចូលរួមនេះ បញ្ជាក់ច្បាស់ថា ប្រទេសកម្ពុជាបានគោរពដ៏ពេញលេញនូវគោលការណ៍លទ្ធិប្រជាធិបតេយ្យ សេរី ពហុបក្ស ជាពិសេសគោរពពេញលេញនូវគោលការណ៍រដ្ឋធម្មនុញ្ញ និងច្បាប់របស់រដ្ឋ នៃព្រះរាជាណាចក្រកម្ពុជា។ សម្តេចវិបុលសេនាភក្តីបន្តថា ចំពោះការបោះឆ្នោតជ្រើសរើសតំណាងរាស្ត្រ នីតិកាលទី៦ ក៏ដូចនីតិកាលទី៥ រាជរដ្ឋាភិបាលប្រកាន់នូវជំហរយ៉ាងម៉ឺងម៉ាត់ និងធានាឱ្យមានបរិយាកាសនយោបាយ មានស្ថិរភាព សន្តិសុខ សណ្ដាប់ធ្នាប់ល្អ ដើម្បីធានាឱ្យការបោះឆ្នោតប្រព្រឹត្តទៅក្នុងបរិយាកាស សេរី ត្រឹមត្រូវ យុត្តិធម៌ គ្មានអំពើហិង្សា និងទទួលយកបានទាំងអស់គ្នា។ ក្នុងនាមព្រឹទ្ធសភា និងប្រជាជនកម្ពុជា សម្តេចវិបុលសេនាភក្តី សាយ ឈុំ បានសម្តែងនូវការស្វាគមន៍ដ៏កក់ក្តៅបំផុតចំពោះលោក Christophe Andres Frassa និងគណៈប្រតិភូ ដែលបានអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា។ សម្តេចបានលើកឡើងថា ប្រទេសបារាំង គឺជាប្រទេស ដែលស្គាល់ប្រទេសកម្ពុជាច្រើនជាងគេបង្អស់ និងជាអ្នកផ្តល់ជំនួយដល់ប្រទេសកម្ពុជាតាំងពីប្រទេសកម្ពុជាទទួលបានឯករាជ្យ រហូតមកដល់ពេលបច្ចុប្បន្ននេះ។ សម្តេចមានជំនឿជឿជាក់ថា ទស្សនកិច្ចរបស់លោក នៅប្រទេសកម្ពុជានាឱកាសនេះ បានរួមចំណែកដ៏សំខាន់ក្នុងការបន្តពង្រឹងពង្រីកចំណងមិត្តភាព កិច្ចសហប្រតិបត្តិការរវាងប្រជាជន និងប្រទេសទាំងពីរ ព្រមទាំងរួមចំណែកដល់ការលើកកម្ពស់កិច្ចសហប្រតិបត្តិការរវាងស្ថាប័ននីតិប្បញ្ញត្តិកម្ពុជា-បារាំង ក៏ដូចជាកិច្ចសហប្រតិបត្តិការរវាងប្រទេសទាំងពីរ ក្នុងក្របខណ្ឌ APFផងដែរ។ ក្នុងនាមព្រឹទ្ធសភា និងក្នុងនាមសម្តេចផ្ទាល់ សម្តេចបានថ្លែងអំណរគុណដល់រដ្ឋាភិបាល និងប្រជាជនបារាំង ដែលបានផ្តល់ជំនួយឥតសំណង បច្ចេកទេស កម្ចីសម្បទាន និងជំនួយផ្សេងៗលើច្រើនវិស័យ ព្រមទាំងការបណ្តុះបណ្តាលធនធានមនុស្សដល់កម្ពុជា។ បច្ចុប្បន្នប្រទេសកម្ពុជាកំពុងតែបោះជំហានទៅមុខលើមាគ៌ាសន្តិភាព ប្រជាធិបតេយ្យ សហប្រតិបត្តិការ និងការអភិវឌ្ឍន៍។ សន្តិភាព ស្ថិរភាព សន្តិសុខ និងសណ្តាប់ធ្នាប់សង្គម ដែលជាបំណងប្រាថ្នាដ៏ពិសិដ្ឋរបស់ប្រជាជនកម្ពុជា គឺត្រូវបានរាជរដ្ឋាភិបាល និងប្រជាជនកម្ពុជា ថែរក្សា និងពង្រឹង ពង្រីកជាបន្តបន្ទាប់នៅគ្រប់ស្ថានភាព និងគ្រប់កាលៈទេសៈទាំងអស់។ ប្រជាជនកម្ពុជាកំពុងតែសប្បាយរីករាយ ដោយទទួលបានពីមនុញ្ញផល នៃសន្តិភាព សម្រាប់ជីវភាពរស់នៅរបស់ខ្លួន។
នៅក្នុងឱកាសនោះលោក Christophe Andres Frassa បានថ្លែងអំណរគុណដ៏ជ្រាលជ្រៅចំពោះសម្តេច ប្រធានព្រឹទ្ធសភា ដែលបានអនុញ្ញាតឱ្យឯកឧត្តម និងគណៈប្រតិភូ ចូលជួបសម្តែងការគួរសមនាពេលនេះ និងបានពាំនាំនូវការ នឹករលឹក និងសួរសុខទុក្ខពីលោក ប្រធានព្រឹទ្ធសភាបារាំង និងលោកប្រធានសភានិយាយភាសាបារាំង (APF) ជូនចំពោះសម្តេចប្រធានព្រឹទ្ធសភាផងដែរ។ លោក Christophe Andres Frassa ក៏បានជម្រាបជូនអំពីទំនាក់ទំនងរវាងប្រទេសទាំងពីរកម្ពុជា-បារាំង ដែលមានតាំងពីយូរលង់ណាស់មកហើយ តាមរយៈភាសា វប្បធម៌ និងប្រវត្តិសាស្ត្រ ហើយប្រទេសបារាំងបានផ្តល់ ជំនួយដល់កម្ពុជាតាំងពីប្រទេសកម្ពុជាទទួលបានឯករាជ្យ រហូតមកដល់បច្ចុប្បន្ននេះ។ ប្រទេសបារាំងក៏បានជួយផងដែរ ដល់ការអភិវឌ្ឍសេដ្ឋកិច្ចកម្ពុជា ធ្វើឱ្យប្រទេសកម្ពុជាបានវិវឌ្ឍឈានឡើងជាបន្តបន្ទាប់ ក្លាយជាសមាជិកអង្គការ ពាណិជ្ជកម្មពិភពលោក (WTO) និងជាប្រទេសដែលទទួលបាននូវការគោរពនៅក្នុងឆាកអន្តរជាតិ ក្លាយជាដៃគូ ពិសេស នៅក្នុងអាស៊ាន ព្រមទាំងជាប្រទេសមួយដែលទទួលបាននូវការវិយោគពីអ្នកវិនិយោគិនបារាំងជាច្រើន។ លោកបានបញ្ជាក់ទៀតថា ប្រទេសបារាំងមិនអាចបំភ្លេចបាននូវប្រវត្តិសាស្ត្ររបស់ប្រទេសកម្ពុជា ដែលបានឆ្លងកាត់សម័យកាលដ៏ជូរចត់កាលពីពេលកន្លងទៅ។ ប្រទេសបារាំងបានចូលរួមជួយប្រទេសកម្ពុជាឱ្យឆ្លងផុតនូវសម័យកាលដ៏ជូរចត់ និងប្រែក្លាយប្រទេសកម្ពុជាឱ្យមានការរីកចម្រើនខាងសេដ្ឋកិច្ច ព្រមទាំងទទួលបាននូវភាពថ្កុំថ្កើង និងរុងរឿងនៅក្នុងអាស៊ាន។ លោក Christophe Andres Frassa បានវាយតម្លៃខ្ពស់ចំពោះប្រទេសកម្ពុជា ដែលជាប្រទេសនិយាយភាសាបារាំង ហើយប្រទេសកម្ពុជា គឺជាសមាជិកនៃសមាគមអាស៊ាន។ លោកបន្ថែមថា ជាការពិត សមាគមនេះមិនមែនជាសមាគម ដែលនិយាយភាសាបារាំងនោះទេ ប៉ុន្តែប្រទេសកម្ពុជា វៀតណាម និងប្រទេសឡាវ ជាប្រទេសនិយាយភាសាបារាំង ដែលបានជួយលើកតម្កើងភាសាបារាំងនៅក្នុងតំបន់អាស៊ាននេះ៕
Source: Kampuchea Thmey Daily
0 Comments