ហ៊ិន ច័ន្ទនីរ័ត្ន ត្រូវតែងតាំងជាទូតសុឆន្ទៈនៃគណៈកម្មការផលិតទូកងបំបែកឯតទគ្គកម្មពិភពលោក

ភ្នំពេញ ៖ ពិធីការិនីស្រីរូបស្រស់របស់ស្ថានីយទូរទស្សន៍បាយ័នកញ្ញា ហ៊ិន ច័ន្ទនីរ័ត្ន ថ្មីៗនេះ ត្រូវបានស.ស.យ.កខេត្តព្រៃវែង ប្រកាសតែងតាំងជាទូតសុឆន្ទៈនៃគណៈកម្មការផលិតទូកងដើម្បីបំបែកឯតទគ្គកម្មពិភពលោក។

នៅក្នុងសេចក្តីប្រកាសចុះថ្ងៃទី០១ខែមិថុនា ឆ្នាំ២០១៨ បានបញ្ជាក់ថា គណៈកម្មការផលិតទូកងបានសម្រេចតែងតាំងលោក ហម ឈរ៉ា និងកញ្ញា ហ៊ិន ច័ន្ទនីរ័ត្ន ជាទូតសុឆន្ទៈនៃគណៈកម្មការផលិតទូកងដើម្បីបំបែកឯតទគ្គកម្មពិភពលោក។

ទូតសុឆន្ទៈទាំងពីរជាតំណាងផ្លូវការក្នុងការកៀងគរស្វែងរកការគាំទ្រកម្មវិធីផលិតទូកងក៏ដូចជាផ្សព្វផ្សាយព័ត៌មាននានាអំពីកម្មវិធីផលិតទូកងទៅសាធារណជនទូទៅតាមប្រព័ន្ធព័ត៌មាន បណ្តាញសង្គម ឬក្នុងពិធីផ្សេងៗ។

សេចក្តីប្រកាសព័ត៌មានដដែលបានបញ្ជាក់ថា ការផលិតទូកងដែលមានប្រវែង វែងជាងគេលើពិភពលោកនេះគឺក្នុងគោលបំណង៖១,រំលឹកឡើងវិញនៅប្រវត្តិដ៏យូរលង់នៃការផលិតនិងការប្រើប្រាស់ទូកងរបស់ខ្មែរតាំងពីបុរាណក៏ដូចជារំលឹកឡើងវិញនៅស្នាមព្រះហ្ដរបស់ព្រះមហាក្សត្រខ្មែរគ្រប់ជំនាន់ជាពិសេសព្រះបាទជ័យវរ្ម័នទី៧ ដែលបានប្រើប្រាស់ទូកងជាមធ្យោបាយមួយក្នុងការធ្វើសឹកសង្គ្រាមជាមួយសត្រូវ ការពារបូរណភាពទឹកដី។

២,ជួយលើកកម្ពស់កិត្យានុភាពជាតិដោយបង្ហាញពិភពលោកទាំងមូលឲ្យកាន់តែច្បាស់ថាកម្ពុជាអាចបង្កើតស្នាដៃដ៏អស្ចារ្យមួយ និង៣,ជំរុញស្មារតីស្នេហាជាតិ និងសាមគ្គីភាពនៃយុវជនជាកូនចៅជំនាន់ក្រោយក្នុងការថែរក្សានិងអភិរក្សកេរដំណែលពីដូនតា។

សូមបញ្ជាក់ថា ទូកងរបស់ខ្មែរ ដែលមានប្រវែងវែងជាងគេលើពិភពលោក(៨៥,៥០ម៉ែត្រ)កំពុងដំណើរការផលិតនៅតំបន់ចុចប៉មក្រុងព្រៃវែង ខេត្តព្រៃវែង ហើយគ្រោងនឹងបញ្ចប់ជាស្ថាពរក្នុងខែកក្កដាឆ្នាំ២០១៨។

ដោយស្របពេលនេះដែរកញ្ញា ហ៊ិន នីរ័ត្ន បាននិយាយរៀបរាប់ថា នាងខ្ញុំសូមអរគុណយ៉ាងជ្រាលជ្រៅ ស.ស.យ.បខេត្តព្រៃវែងដែលបានសម្រេចតែងតាំងនាងខ្ញុំជាទូតសុឆ្ឆន្ទៈនៃគណៈកម្មការផលិតទូកងដើម្បីបំបែកឯតទគ្គកម្មពិភពលោក។ នាងខ្ញុំនឹងខិតខំផ្សព្វផ្សាយឲ្យបានច្រើននូវអ្វីដែលជាវប្បធម៌និងមរតកដូនតាដែលបានបន្សល់សម្រាប់យុវជនជំនាន់ក្រោយជាក់ស្តែងទូកងដែលកំពុងផលិតនេះ និង ធ្វើឲ្យពិភពលោកស្គាល់កាន់តែច្បាស់ពីទំនៀមទម្លាប់របស់ប្រទេសកម្ពុជា៕