ឆៃ លីដាឡែន រិះគន់លើទង្វើ មិនទទួលខុសត្រូវរបស់គ្រូពេទ្យស្រុកខ្មែរមួយចំនួន

ភ្នំពេញ ៖ ស្របពេលដែលមានការបង្ហោះបង្ហាញពីអារម្មណ៍សោកសៅ និងឈឺចាប់ខ្លាំងក្រោយពេលស្ត្រីម្នាក់ឆ្លងទន្លេទើបបានរយៈពេល៤ថ្ងៃ ក៏ត្រូវបានបាត់បង់កូន(ទារក) ដោយសារតែភាពមិនទទួលខុសត្រូវ និងខ្វះការយកចិត្តទុកដាក់ពីសំណាក់គ្រូពេទ្យនោះ តារាចម្រៀងអ្នកនាង ឆៃ លីដាឡែន បានចេញមុខរិះគន់ទាំងភាពឈឺចាប់ចំពោះករណីមួយនេះ។

អ្នកនាង ឆៃ លីដាឡែន បានរៀបរាប់ភ្ជាប់ជាមួយរូបភាពនោះថា ហេតុអ្វីពេទ្យខ្មែរចូលចិត្តអញ្ចឹងម៉េស? បើនៅស្រុកគេវិញ ក្មេងមិនស្លាប់ទេ អ្វីដែលសំខាន់គេជួយជីវិតមនុស្សសិន ទើបគេនិយាយរឿងលុយ តែខ្មែរចូលចិត្តសួរលុយមុន? អ្វីដែលសំខាន់គឺជីវិតមនុស្សដែលគេត្រូវជួយ ទោះអ្នកជំងឺជាហើយ ឬមិនស្លាប់អោយលុយគេឬមិនអោយ ក៏គេមិនដែលខ្វល់ដែរ សំខាន់គឺជីវិតមនុស្ស។

តារាចម្រៀងអ្នកនាង ឆៃ លីដាឡែន បាននិយាយទៀតថា ហើយមួយទៀតឆ្ងល់ថាទៅរៀនពេទ្យអស់ទាំងលុយៗចង់ក្លាយជាពេទ្យដើម្បីជួយជីវិតប្រជាជន ចុះហេតុអ្វីបានក្លាយជាពេទ្យហើយ ម្តេចមិនជួយជីវិតមនុស្សទៅ? ជាពេទ្យ ឬគ្រាន់តែឈ្មោះថាជាពេទ្យទេ? អាណិតគ្នាណាស់ឃើញពន្លឺទើបតែបាន៤ថ្ងៃ ឥឡូវទៅវិញ។ ហ៊ឺ ហើយម្តាយខំពរពោះតាំងពីមួយខែរហូត៩ខែ១០ថ្ងៃរហូត វេទនាចាញ់ផង អីផងព្រោះតែកូនសុខចិត្តទ្រាំ ហើយទន្ទឹងចាំមើលមុខកូន ពេលនេះតើអោយគាត់ធ្វើយ៉ាងម៉េច? ។

អ្នកនាង ឆៃ លីដាឡែន បន្ថែមថា បើសិនជាអ្នកដែលជាពេទ្យវិញអ្នកមានអារម្មណ៍យ៉ាងម៉េច? នេះគ្រាន់តែខ្ញុំមិនមែនជាពេទ្យខ្ញុំខ្លោចចិត្តជំនួសបើសិនខ្ញុំជាពេទ្យវិញខ្ញុំមិនអង្គុយបើកភ្នែកមើលដូចពេទ្យដែលគ្មានសីលធម៌ដូចពេទ្យឯងទេ សុំអស់យោបល់ហើយ ខ្ញុំនិយាយលែងចេញព្រោះណែនទ្រូងណាស់នៅពេលខ្ញុំឃើញរូបភាពនេះ។

សូមជម្រាបថា ប្រតិកម្មរិះគន់ពីសំណាក់តារាស្រីអ្នកនាង ឆៃ លីដាឡែន ខាងលើនេះ បានធ្វើឡើងក្រោយពីមានម្ចាស់Account Facebook មួយឈ្មោះថា Jolly BabyShop បានបញ្ចេញអារម្មណ៍រិះគន់ថាពេលដែលស្ត្រីពរពោះម្ដងៗមិនមែនស្រួលទេ ទម្រាំគ្រប់ខែធ្វើជាពេទ្យគួរតែដឹងហេតុអ្វីក៏ធ្វេសប្រហែសម្ល៉េះ? សូមបងប្អូនជួយស៊ែរផងដើម្បីកូនៗទាំងអស់គ្នា។ ខ្ញុំជួបរឿងអយុត្តិធម៌នៅមន្ទីរពេទ្យបានធ្វើអោយកូនខ្ញុំស្លាប់ដោយសារតែពួកគ្រូពេទ្យវាមិនយកចិត្តទុកដាក់ នឹងយើងទេវាមិនខ្វល់ពីកូនយើងទេ។
ប្រភពបន្តថា ពេលដែលកូនយើងឈឺក្តៅខ្លួនយើងប្រាប់ពេទ្យថា កូនយើងក្អួតរាគ ក្ដៅ ខ្លួនវាចេះតែថាមិនអីៗរហូតដល់កូនយើងហើមពោះខ្លាំងមែនទែនពេទ្យមកមើល ហើយថាមើលលែងបានហើយរួចបញ្ជូនកូនយើងទៅពេទ្យកាល់ម៉ែត ពេលទៅដល់កាល់ម៉ែតគេលែងទទួល និងប្រាប់ថា ឧបករណ៍មិនគ្រប់គ្រាន់ឲ្យមកពេទ្យគន្ធបុប្ផា។ ខ្ញុំមិនដឹងថាពេទ្យស្រុកខ្មែរមួយចំនួនបានរៀនពីក្រមសីលធម៌របស់គ្រូពេទ្យដែរឬអត់នោះទេ ព្រោះខ្ញុំឈឺចាប់ខ្លាំងណាស់ហ្នឹងទង្វើ មិនខ្វល់ មិនអើពើបែបនេះ។

ម្ចាស់Account Facebookដដែលនេះលើកឡើងទៀតថា ក្នុងនាមយើងជាម្ដាយ ឪពុកក្មេងកំពុងស្រក់ទឹកភ្នែកអាណិតកូន វាពិតជាសោកស្ដាយ ខ្លាំងណាស់។ អ្នកជំងឺ បានចាត់ទុកគ្រូពេទ្យដូចទេវតាអោយតម្លៃណាស់ទៅលើគ្រូពេទ្យ តែគ្រូពេទ្យធ្វើអោយខ្លួនឯងក្លាយជាគ្មានតម្លៃគួរអោយស្អប់ខ្ពើម និងគួរអោយចង់ធាក់មួយជើងអោយបាក់ក តែយើងក៏មិនអាចធ្វើ។ ទីបំផុត ក្មួយខ្ញុំបានបាត់បង់ជីវិតនៅម៉ោង២ថ្ងៃត្រង់ថ្ងៃទី៧ខែ៦ឆ្នាំ២០១៨។ ឯណាទៅពាក្យថាមិនអី?នៅពេលបានដឹងថាកូនបាត់បង់ជីវិត បងខ្ញុំស្ទើរដួលសន្លប់ ទ្រហោយំ អោបសពកូន។ ខ្ញុំពិតជាខ្លោចចិត្តណាស់កូន លីណា ទើបកើតបាន៤ថ្ងៃត្រូវស្លាប់ទៅវិញដោយសារការធ្វេសប្រហែលរបស់ពេទ្យ៕