បន្ទាយមានជ័យ ៖ លោកប៉ាន សូរស័ក្ត រដ្ឋមន្ត្រីក្រសួងពាណិជ្ជកម្មបានជំរុញឲ្យប្រជាជននិងមន្ត្រីរាជការទាំងអស់ទៅចូលរួមបោះឆ្នោតឲ្យបានគ្រប់ក្នុងពិធីប្រកាសលោកប៊ុក ឡាយជី ជាប្រធានមន្ទីរពាណិជ្ជកម្មថ្មីជំនួសលោកថោង ស៊ីណា ប្រធានមន្ទីរពាណិជ្ជកម្មចាស់ចូលនិវត្តន៍និងត្រូវបន្តការងារនិងយកចិត្តទុកដាក់ផ្នែកពាណិជ្ជកម្មពីលោកថោង ស៊ីណា ប្រធានមន្ទីរពាណិជ្ជកម្មចាស់នៅព្រឹក ថ្ងៃទី៧ ខែមិថុនា ឆ្នាំ២០១៨នៅសាលប្រជុំសាលាខេត្តបន្ទាយមានជ័យ។
ពិធីនេះមានការចូលរួមលោកសុំ វណ្ណរិទ្ធ អនុរដ្ឋលេខាធិការស្រសួងសុខាភិបាល លោកសួន បវរ អភិបាលខេត្តបន្ទាយមានជ័យ មន្ត្រីជាន់ខ្ពស់ ប្រធានមន្ទីរ សមត្ថកិច្ច និស្សិត និងប្រជាពលរដ្ឋជាច្រើននាក់ទៀត។
ក្នុងនោះលោកម៉ី ប៊ុនលី ប្រធាននាយកដ្ឋានបុគ្គលិកនៃក្រសួងពាណិជ្ជកម្មបានឡើងអានសេក្តីប្រកាស លេខ២២ ពណ ប ល ប្រ ក បានប្រកាស តែងតាំងលោកប៊ុក ឡាយជី ជាប្រធានមន្ទីរពាណិជ្ជកម្មថ្មីជំនួសលោកថោង ស៊ីណា ប្រធានមន្ទីរពាណិជ្ជកម្មចាស់ចូលនិវត្តន៍។
ក្នុងពិធីប្រកាសផ្ទេរភារកិច្ចនោះ លោកសួន បវរ បានធ្វើការកោតសរសើរនិងធ្វើការវាយតម្លៃខ្ពស់ចំពោះសមិទ្ធផលទាំងអស់ ដែលលោកថោង ស៊ីណា ប្រធានមន្ទីរពាណិជ្ជកម្មចាស់ខិតខំប្រឹងប្រែងរួមសាមគ្គីសហការគ្នា ក្នុងការអភិវឌ្ឍន៍ ជាមួយប្រធានមន្ទីរអង្គភាពដើម្បីគ្រប់គ្រង ដឹកនាំចាត់ចែងការងារក្នុងមន្ទីរឲ្យបានល្អឲ្យស័ក្តិសមជាមន្ត្រីរាជការជាសេនាធិការរបស់ក្រសួងពាណិជ្ជកម្ម និងរដ្ឋបាលខេត្តក្នុងវិស័យពាណិជ្ជកម្មនៅមូលដ្ឋានឲ្យស្របទៅក្នុងគោលបំណងគោលនយោបាយរបស់ក្រសួង ដែលបានប្រគល់ជូនក្នុងរយៈពេលជាង៣០ឆ្នាំកន្លងមកនេះ។
ក្នុងនោះលោកប៉ាន សូរស័ក្ត បានមានប្រសាសន៍ដែរថា ការតែងតាំងលោកប៊ុក ឡាយជីជាប្រធានមន្ទីរពាណិជ្ជកម្មថ្មីនេះ គឺជាដំណើរការធម្មតា នៃនីតិវិធីស្របទៅតាមសហលក្ខន្តិកៈមន្ត្រីរាជការនៅពេលនេះ លោកប៊ុក ឡាយជី ជាប្រធានមន្ទីរពាណិជ្ជកម្មថ្មីត្រូវបន្តខិតខំរួមសហការសាមគ្គីគ្នា ដើម្បីធ្វើការអភិវឌ្ឍន៍ និងពង្រឹងការផ្តល់សេវាសាធារណៈ ទីផ្សារ និង ការអភិវឌ្ឍវិស័យឯកជននៅមន្ទីរពាណិជ្ជកម្មខេត្ត ការគ្រប់គ្រងអាជីវកម្ម និងជំរុញអភិវឌ្ឍន៍ពាណិជ្ជកម្ម និងកសាងសមត្ថភាពមន្ត្រីឲ្យមានវិជ្ជាជីវៈ ដែលមានកម្រិតជំនាញពិតប្រាកដអាចប្រាស្រ័យការងារថ្នាក់ជាតិនិងថ្នាក់អន្តរជាតិ។
លោក ប៉ាន សូរស័ក្ត បានមានប្រសាសន៍បញ្ជាក់ទៀតថា ត្រូវបន្តរួមគ្នាថែរក្សាសុខសន្តិភាព ស្ថិរភាពនយោបាយនិង សណ្ដាប់ធ្នាប់សង្គមក្នុងមូលដ្ឋាន សំដៅធានាបាននូវកំណើនសេដ្ឋកិច្ច តាមរយៈផលិតកម្មលើគ្រប់ផ្នែកគ្រប់វិស័យដើម្បីលើកកម្ពស់ជីវភាពរស់នៅរបស់ប្រជាជនឲ្យបានកាន់តែប្រសើរឡើងថែមមួយកម្រិតទៀត៕
Source: Kampuchea Thmey Daily
0 Comments