រដ្ឋធានី​របស់​ប្រទេស​ឥណ្ឌា​ ដែល​រងគ្រោះ​ ដោយ​ព្យុះ​ធូលី​កំពុង​រង់ចាំ​ទឹកភ្លៀង

អាជ្ញាធរ​នៅ​ក្នុង​រដ្ឋធានី​ប្រទេស​ឥណ្ឌា​ បាន​ផ្អាក​ការសាងសង់​ទាំង​អស់​ កាល​ពីថ្ងៃ​សុក្រ និង​បាន​បញ្ជូន​ឡានទឹក​ជាច្រើន​គ្រឿង​ទៀត ​ដើម្បី​បាញ់​សម្អាត​នៅ​តាម​ដង​ផ្លូវ​ក្នុង​ការ​កែ​លម្អ​កម្រិត​គុណភាព​ខ្យល់​ក្នុង​ទីក្រុង​ ដែល​ត្រូវ​បាន​បង្កឡើង ​ដោយ​ព្យុះ​ធូលី​ជាច្រើន​ថ្ងៃ​មកនេះ។

កម្រិត​គុណភាព​ខ្យល់​នៅ​ទីក្រុង Delhi ដែល​ជា​ទីក្រុង​មួយ​មាន​ជាតិ​បំពុល​ខ្លាំង​បំផុត​នៅ​លើ​ពិភពលោក​ ដោយ​ផ្អែកលើ​ទិន្នន័យ​របស់​អង្គការ​សុខភាព​ពិភពលោក​ បាន​បណ្ដាល​ឲ្យ​មាន “​សុខភាព​មិនល្អ​” ហើយ​ឈាន​ដល់ “​គ្រោះ​ថ្នាក់​” កាលពី​ថ្ងៃ​សុក្រ​ នៅ​ពេល​ដែល​មាន​ខ្យល់​បក់​យ៉ាងខ្លាំង។

អ្នក​បរិស្ថាន​ម្នាក់​ឈ្មោះ Sunita Narain បាន​និយាយ​នៅលើ​បណ្តាញ​សង្គម Twitter បន្ទាប់ពី​ចូលរួម​កិច្ចប្រជុំ​បន្ទាន់​មួយ​ ដែល​ត្រូវ​បាន​កោះហៅ​ដោយ​អនុប្រធាន​អភិបាលក្រុង​លោក Anil Baijal ថា “​សកម្មភាព​សាងសង់​ទាំងអស់​ត្រូវ​បិទ​រហូត​ថ្ងៃអាទិត្យ​” ។​
​
លោក Narain បាន​បន្ថែមថា "​អ្វីដែល​សំខាន់​គឺ​ការ​ផ្តោតលើ​ការដាំ​ដើមឈើ​ធំៗ​នៅ​រដូវ​មូសុង​នេះ​"។ តំបន់​កណ្តាល​នៅ​អាស៊ី​ខាងត្បូង​មួយ​នេះ​ ត្រូវបាន​គេ​មើលឃើញ​សីតុណ្ហភាព​ត្រជាក់ និង​ខ្យល់​បក់​ខ្លាំង​ ដែល​បោកបក់​ព្យុះ​ធូលី​យ៉ាង​ឃោរឃៅ​នៅ​ឆ្នាំនេះ ​មុន​ពេល​រដូវវស្សា​ចាប់ផ្ដើម។

ក្រុមប្រឹក្សា​ត្រួតពិនិត្យ​ការ​បំពុល​កណ្តាល​និយាយ​ថា ខ្យល់​កំពុង​បក់​ធូលី​ពីរ​ដ្ឋ​វាល​ខ្សាច់ Rajasthan ទៅ​ក្រុង Delhi ខណៈ​មនុស្ស​ដែល​ត្អូញត្អែរ​ពី​បញ្ហា​ផ្លូវដង្ហើម​បាននាំគ្នា​ទៅ​មន្ទីរពេទ្យក្រុង ។​
​
វេជ្ជបណ្ឌិត Prashant Saxena ជំនាញ​ផ្នែក​សួត​នៅ​មន្ទីរពេទ្យ Max Smart Super Specialty បាន​និយាយថា "​អ្នកជំងឺ​ដែល​មិនមាន​ប្រវត្តិ​ជំងឺ​ផ្លូវដង្ហើម​ត្រូវបាន​ត្អូញត្អែរ​អំពី​បញ្ហា​ក្អក និង​ដកដង្ហើម​" ។​
​
សូមបញ្ជាក់ថា ប្រទេស​ឥណ្ឌា​មាន​ទីក្រុង​ដែលមាន​សារធាតុពុល​ច្រើន​ជាង​គេ​បំផុត​ចំនួន​១៤ នៅលើ​ពិភពលោក​ដោយ​ផ្អែកលើ​បរិមាណ​សារធាតុ​កាបូន​ក្រោម ២.៥ មីក្រូ​ក្រាម​ដែល​ត្រូវបាន​គេ​រកឃើញ​ក្នុង​ខ្យល់៕ REUTERS

​

Source: Kampuchea Thmey Daily