កណ្តាល ៖ លោកលី សាម៉េត ក្នុងនាមជាសមាជិករបស់គណបក្សប្រជាជនកម្ពុជា បានធ្វើការអំពាវនាវដល់ពលរដ្ឋ ក៏ដូចបុគ្គលិកកម្មករក្នុងក្រុមហ៊ុនអេងឌីប៉ូ អភិវឌ្ឍន៍ ទាំងអស់អញ្ជើញទៅចូលរួមការបោះឆ្នោតឲ្យបានគ្រប់ៗគ្នានៅថ្ងៃទី២៩កក្កដាខាងនេះ ក្នុងនាមពលរដ្ឋល្អ ដើម្បីគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រី និងការបន្តថែរក្សាសន្តិភាព ទាំងស្រុងដែលធានាបានដល់ការអភិវឌ្ឍឲ្យមានការរីក ចម្រើនឥតឈប់ឈរ បន្ថែមទៀត។
លោក លី សាម៉េត ក្នុងនាមជាសមាជិកគណបក្សប្រជាជនកម្ពុជាបានលើកឡើងបែបនេះ ខណៈអញ្ជើញចូលរួមជួបសំណេះសំណាលជាមួយបុគ្គលិកកម្មករក្រុមហ៊ុនអេងឌីប៉ូអភិវឌ្ឍន៍ជាង១០០នាក់កាលពីម្សិលមិញនេះ ស្ថិតនៅឃុំកំពង់អុស ស្រុកពញាឮ ខេត្តកណ្ដាល ដែលពិធីនោះ ប្រារព្ធឡើងក្រោមវត្តមានលោកឧកញ៉ា ឌី ប៉ូ ក្នុងនាមជាអគ្គនាយកក្រុមហ៊ុនអេងឌីប៉ូអភិវឌ្ឍន៍ចូលរួមផងដែរ។
លោកលី សាម៉េតថ្លែងបន្តថា ក្រោយពីប្រទេសជាតិរួចផុតពីសង្គ្រាម ដោយបានចាប់ផ្តើមអភិវឌ្ឍន៍ប្រទេសពីចំណុចសូន្យ គឺមានតែគណបក្សប្រជាជនកម្ពុជាតែមួយគត់ ដែលជាខ្នងបង្អែកធានាបាន នូវសុខសន្តិភាព និងជម្រុញការអភិវឌ្ឍន៍ប្រទេស ឱ្យមានការអភិវឌ្ឍរីកចម្រើនមានអ្វីៗគ្រប់បែបយ៉ាងរហូតមកដល់បច្ចុប្បន្ន ។ ការអភិវឌ្ឍប្រទេសកម្ពុជា តាំងពីបាតដៃទទេរហូតមានថ្ងៃនេះពិតជាបានឆ្លងកាត់ ឧបសគ្គគ្រប់ដំណាក់កាល តាំងពីប្រជាពលរដ្ឋមិនមានបាយហូបគ្រប់គ្រាន់ រហូតមកដល់សព្វថ្ងៃមានជីវភាពសមរម្យ ការរស់នៅប្រកបដោយសុខសាន្ដត្រាណ ក្រោមដំបូលសន្តិភាពតែមួយរបស់សម្តេចអគ្គមហាសេនាបតីតេជោហ៊ុន សែន ជានាយករដ្ឋមន្ត្រីដ៏ឆ្នើមគ្មានពីរ។
លោក បានបន្តថា ដើម្បីបន្តរក្សាសន្តិភាព ជាពិសេសធានាដល់ការអភិវឌ្ឍន៍ឲ្យមានការរីកចម្រើនឥតឈប់ឈរ សូម ឲ្យបងប្អូនទាំងអស់ ទៅចូលរួមការបោះឆ្នោតឲ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា លេខរៀងទី២០ដែលនឹងជិត មកដល់នាថ្ងៃ២៩ ខែកក្កដា ២០១៨ ខាងមុខនេះ ដើម្បីបន្តឲ្យសម្តេចតេជោ ហ៊ុន សែន ធ្វើជានាយករដ្ឋមន្ត្រី ក្នុងការដឹកនាំ នាវាកម្ពុជា ឆ្ពោះទៅកាន់ត្រើយវិបុលភាព និងវឌ្ឍនភាព។
ក្នុងពិធីជួបសំណេះសំណាលនាឱកាសនោះដែរ លោកឧកញ៉ា ឌី ប៉ូ អគ្គនាយកក្រុមហ៊ុនអេង ឌី ប៉ូ អភិវឌ្ឍន៍ បានថ្លែងថា សេរីភាព ដែលយើងទទួលបានជាង៣០ឆ្នាំមកនេះ គឺមានតែគណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីតែមួយគត់ បានអភិវឌ្ឍន៍ប្រទេសជាតិពីបាទដៃទទេរ ដោយចាប់ផ្តើមកសាង ស្តារ និងជម្រុញការអភិវឌ្ឍន៍ឱ្យមាន ការរីកចម្រើន មិនសន្យាខ្យល់ ដូចអ្នកនយោបាយប្រថុយប្រឋានមួយចំនួននោះឡើយ ។
លោកឧកញ៉ាឌី ប៉ូបន្តថា ដោយមានគោលការណ៍ និងយុទ្ធសាស្ត្រដឹកនាំដ៏ត្រឹមត្រូវប្រកបដោយកិត្យិបណ្ឌិតរបស់សម្តេចតេជោនាយករដ្ឋមន្ត្រីជាពិសេសក្នុង អាណត្តិទី៥នេះ បានជម្រុញអភិវឌ្ឍន៍គ្រប់ហេដ្ឋារចនាសម្ព័ន្ធ គឺទទួលបានសមិទ្ធផលជាច្រើនកើតឡើងជាហូរហែ ដូចជា ផ្លូវ ស្ពាន សាលារៀន វត្តអារាម ជាក់ស្តែងការផ្តល់ឱកាសឲ្យក្រុមហ៊ុនអេង ឌី ប៉ូ អភិវឌ្ឍន៍ បានចូលរួមចំណែកអភិវឌ្ឍន៍ លើវិស័យកសិកម្មដាំដុះដំណាំស្រូវធម្មជាតិមកដល់ពេលនេះ គឺជាផ្នែកមួយក្នុងការចូលរួមចំណែកជាមួយរាជរដ្ឋាភិបាលផងដែរ។
តំណាងបុគ្គលិកក្រុមហ៊ុនអេង ឌី ប៉ូ អភិវឌ្ឍន៍ជាច្រើននាក់ក៏បានលើកឡើងស្រដៀងៗគ្នាថា ពួកគាត់ មានការសង្ឃឹមជឿជាក់លើគណបក្សប្រជាជនកម្ពុជាយ៉ាងខ្លាំង ព្រោះក្រោយថ្ងៃរំដោះ៧ មករា ១៩៧៩ គឺមានតែគណបក្ស ប្រជាជនកម្ពុជាតែមួយគត់ បានធ្វើឲ្យពួកគាត់ចៀសផុតពីសេចក្តីស្លាប់។
តំណាងបុគ្គលិកកម្មករបានបន្ថែមថា គណបក្សប្រជាជនកម្ពុជាដែលមានសម្តេចតេជោជាប្រធានបានដឹកនាំប្រទេសជាតិមានសុខសន្តិភាពពោរពេញដោយរីកចម្រើនលើគ្រប់វិស័យជាពិសេសការជំរុញ អភិវឌ្ឍនៅតាមមូលដ្ឋាន ឲ្យមានផ្លូវ មានស្ពាន ផ្សារ សាលារៀន វត្តអារាម និងការផ្តល់នូវសុវត្ថិភាពនៅតាមមូលដ្ឋានជាដើម។ សរុបមកពួកគាត់ទាំងអស់គ្នា ត្រូវតែទៅបោះឆ្នោតជូនគណបក្សប្រជាជនកម្ពុជា នៅថ្ងៃទី២៩កក្កដាខាងមុខនេះដើម្បីគាំទ្រសម្តេចតេជោហ៊ុន សែន ធ្វើជានាយករដ្ឋមន្ត្រី ក្នុងអាណត្តិនេះ ក៏ដូចអាណត្តិក្រោយៗទៀត៕
Source: Kampuchea Thmey Daily
0 Comments